ខេត្តកណ្តាល ៖ បុរសម្នាក់បានរងរបួសធ្ងន់កៀបជាប់នៅក្នុងរថយន្ត ពេលបើកបររថយន្តក្នុងស្ថានភាពស្រវឹងជោកក្នុងល្បឿនយ៉ាងលឿន បានរេចង្កូតទៅបុកស្លាកប៉ាណូ រួចបន្តទៅបុកចូលផ្ទះលក់ភេសជ្ជៈយីហោ ស្រីនាង ធ្វើឱ្យរថយន្តទៅមុខលែងរួចតែម្តង។ ហេតុការណ៍គ្រោះថ្នាក់ចរាចរណ៍នេះបានកើតឡើង វេលាម៉ោង១២និង៥នាទីរំលងអាធ្រាត្រឈានចូលថ្ងៃទី២៤ ខែសីហា ឆ្នាំ២០១៨ នៅចំណុចផ្ទះលក់ភេសជ្ជៈស្រីនាង ផ្លូវលេខ២០៦ ស្ថិតនៅភូមិដើមមៀន សង្កាត់តាខ្មៅ ក្រុងតាខ្មៅ។
ជនរងគ្រោះខាងលើឈ្មោះ ថៃ ប៊ុនរ៉ុង ភេទប្រុស អាយុ២៦ឆ្នាំ មានទីលំនៅបច្ចុប្បន្នភូមិពោធិក្រាម ឃុំត្រើយស្លា ស្រុកស្អាង ខេត្តកណ្តាល ជាអ្នកបើកបររថយន្តមួយគ្រឿងម៉ាក FORTUNER ពណ៌ស ពាក់ស្លាកលេខ ភ្នំពេញ ២AR-៧៧៣៧ ។
សាក្សីនៅក្បែរកន្លែងកើតហេតុបានប្រាប់អោយដឹងថា មុនពេលកើតហេតុ គេបានឃើញបុរសម្នាក់បើកបររថយន្តមួយគ្រឿងក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើបានបុកផ្ទាំងប៉ាណូ ហើយជ្រុលទៅបុកទ្វារផ្ទះលក់ភេសជ្ជៈយីហោ ស្រីនាង យ៉ាងពេញទំហឹង បណ្តាលឱ្យរងការខូចខាត ប៉ើងទ្វារដែកអស់ចំនួន៧ប្រលោះ បាក់បង្គោលរបងថ្មអស់មួយ ព្រមទាំងខូចខាតសម្ភារៈក្នុងផ្ទះដូចជាភេសជ្ជៈអស់មួយចំនួនថែមទៀតផង ។ ដោយឡែករថយន្តបង្ករងការខូចខាតខ្ទេចផ្នែកខាងមុខ និងផ្ទុះពោងសុវត្ថិភាព ព្រមទាំងធ្វើអោយអ្នកបើកបររថយន្តរងរបួសបែកមុខសន្លប់ស្តូកស្តឹង ។
ប្រភពដដែលបន្តថា ភ្លាមៗនោះអ្នកបើកបររថយន្តត្រូវបានប្រជាពលរដ្ឋនិងសមត្ថកិច្ចជួយគាស់ទ្វាររថយន្តទាញយកចេញ និងត្រូវបានរថយន្តស៊ីរ៉ែនរបស់ស្នងការដ្ឋាននគរបាលខេត្តកណ្តាលដឹកយកទៅសង្គ្រោះនៅមន្ទីរពេទ្យបង្អែកជ័យជំនះ។
ក្រោយកើតហេតុ រថយន្តខាងលើត្រូវបានសមត្ថកិច្ចជំនាញយកមកកាន់អធិការដ្ឋាននគរបាលក្រុងតាខ្មៅដើម្បីចាត់ការតាមនីតិវិធី ៕
ចែករំលែកព័តមាននេះ