ខេត្តប៉ៃលិន ៖ បន្ទាយយោធាមួយកន្លែងកំពុងក្លាយជាកំផែងការពារយ៉ាងរឹងមាំ ដល់ពួកអ្នកប្រព្រឹត្តល្បែងស៊ីសងបង្កើតសង្វៀនបញ្ជល់មាន់ ដែលបានដំណើរការយ៉ាងគគ្រឹកគគ្រេងជិតមួយឆ្នាំកន្លងមកនេះ ។ នេះបើតាមប្រភពព័ត៌មាន ដែលផ្ដល់ដោយមន្ត្រីម្នាក់ ។
ប្រភពបានឲ្យដឹងថា គេមិនទាន់ស្គាល់ឈ្មោះមន្ត្រីយោធា ដែលថ្លើមធំហ៊ានយកបន្ទាយយោធា ធ្វើជាជម្រកល្បែងស៊ីសងនេះនៅឡើយទេ ។ ប៉ុន្តែសង្វៀនបញ្ជល់មាន់គ្មានច្បាប់ទម្លាប់ដ៏ធំនោះ ស្ថិតនៅក្នុងបន្ទាយយោធាក្នុងវរ:សេនាតូចលេខ៥៣៤ ដែលមានទីតាំងស្ថិតនៅភូមិកន្ធៀងវ៉ា ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
បើតាមប្រភពព័ត៌មានបានទម្លាយឲ្យដឹងថា សង្វៀនបញ្ជល់មាន់ដ៏ធំជ្រក ក្នុងកំផែងបន្ទាយយោធាដ៏រឹងម៉ាំខាងលើនេះ បានបើកដំណើរការជិត១ឆ្នាំកន្លងមកហើយ។ ក្នុងមួយសប្ដាហ៍បើកទទូលអតិថិជន២ថ្ងៃ គឺនៅថ្ងៃពុធនិងថ្ងៃសៅរ៍ ។ អ្នកដែលញៀននឹងល្បែងបញ្ជល់មាន់នេះ រាប់រយនាក់មានគ្រប់សមាសភាពពេលដល់ថ្ងៃណាត់ផ្គូរផ្គងមាន់ម្ដងៗ ដែលមកពីតាមបណ្ដាស្រុកនានា ទាំងនៅខេត្តប៉ៃលិន និងបាត់ដំបង ។
អ្នកញៀននឹងល្បែងនេះបានលើកឡើងថា ទីតាំងសង្វៀនមាន់នេះ មានសុវត្ថិភាពល្អ មានភាពកក់ក្ដៅក្នុងការភ្នាល់ល្បែងស៊ីសង ដោយសារតែទីតាំងនេះ ហ៊ុំព័ទ្ធដោយកំផែងយោធាយ៉ាងរឹងម៉ាំ ដែលសមត្ថកិច្ចមិនអាចមករំខានបានឡើយ។
ជុំវិញការបង្កើតឲ្យមានសង្វៀនមាន់បង្កប់ ក្នុងបន្ទាយយោធាវរ:សេនាតូចលេ៥៣៤ ខាងលើនេះ កោះសន្តិភាពបានស្វែងរកប្រភពពីមន្ត្រីនានា និងមេបញ្ជាការអង្គភាពនេះ ដើម្បីសុំការបំភ្លឺ តែមិនអាចទំនាក់ទំនងបានឡើយ រហូតដល់ពេលនេះ ។
ប្រជាពលរដ្ឋដែលនៅតំបន់នោះ បានត្រឹមតែជ្រួញចិញ្ចើមឆ្ងល់គ្រប់ៗគ្នា ដោយតែងឃើញមនុស្សម្នាជិះម៉ូតូស្ពាយ ឬបីមាន់ជល់ចូលបន្ទាយយោធានេះបណ្ដាក់គ្នាដូចខ្យង ស្ទើររៀងរាល់សប្ដាហ៍ ។
មហាជនបានរិះគន់ថ្នាក់ដឹកនាំបន្ទាយយោធានោះថា មិនគួរយកបន្ទាយយោធាធ្វើជាទីតាំងប្រព្រឹត្តល្បែងស៊ីសងបែបនេះទេ ដែលនាំឱ្យប៉ះពាល់ដល់កិត្តិយសកងទ័ព ដែលជាកម្លាំងការពារជាតិ ៕
ចែករំលែកព័តមាននេះ