ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា ទីបំផុតតុលាការខេត្តស្វាយរៀង បានកាត់ទោសអ្នករត់តាក់ស៊ី២នាក់ក្នុងករណីជាប់ចោទពីបទរំលោភសម្លាប់នារីជាបុគ្គលិកកាស៊ីណូនៅក្រុងបាវិតដោយឲ្យជាប់ទោសមួយជីវិត និងសងសំណងរដ្ឋបវេណីដល់ដើមបណ្តឹងគ្រួសារនារីរងគ្រោះ ។ ករណីកាត់ទោសនេះធ្វើឡើងអស់រយៈពេលមួយថ្ងៃពេញចាប់ពីម៉ោង១០ព្រឹកបញ្ចប់នៅម៉ោង៤និង៤៥នាទីល្ងាច ថ្ងៃទី២៣ ខែសីហា ឆ្នាំ២០១៨ នៅសាលបើកសវនាការសាលាដំបូងខេត្តស្វាយរៀង ។
បើតាមលោកគង់ ច័ន្ទខេមរិទ្ទ ព្រះរាជអាជ្ញាអមសាលាដំបូងខេត្តឲ្យដឹងថា តុលាការបានបើកសវនាការជំនុំជំរះជនត្រូវចោទ១-ឈ្មោះ ឆឺយ សុជាតិ អាយុ៣៦ឆ្នាំ រស់នៅភូមិព្រៃតាញ៉យ ឃុំខ្សែត្រ ស្រុកកំពង់រោទិ៍ និង២-បក្សពួកឈ្មោះ ផ្លេក សូនី អាយុ៣២ឆ្នាំ ឲ្យជាប់ពន្ធនាគារក្នុងម្នាក់ៗអស់មួយជីវិត និងសងសំណងរដ្ឋបវេណីជាប្រាក់ចំនួន៦ម៉ឺនដុល្លារឲ្យទៅដើមបណ្តឹងដែលជាក្រុមគ្រួសារនារីរងគ្រោះ ចំណែករថយន្តរបស់ជនត្រូវចោទធ្វើសកម្មភាពនោះ ត្រូវដកហូតទុកជាសម្បត្តិរដ្ឋ។
គួររំលឹកថា ករណីឃាតកម្មរំលោភសម្លាប់ និងប្លន់យកទ្រព្យសម្បតិ្ដពីនារីបុគ្គលិកកាស៊ីណូវ័យ១៨ឆ្នាំនៅក្រុងបាវិត ខេត្តស្វាយរៀង គឺកម្លាំងសមត្ថកិច្ចស្រាវជ្រាវឃាត់ខ្លួនជនសង្ស័យ២នាក់ និងដកហូតរថយន្តម៉ាក Highlander ១គ្រឿង ខ្សែ.ក១ខ្សែ ចិញ្ចៀន១វង់ ហើយជនសង្ស័យទាំងពីរនាក់នេះមុខរបរបើកបររថយន្តតាក់ស៊ីដែលបានរំលោភសម្លាប់ជនរងគ្រោះអាយុ១៨ឆ្នាំ កាលពីថ្ងៃទី២ សីហា ២០១៧ និងបោះសពចោលក្នុងទឹកកែងស្រែក្នុងភូមិតាពៅ សង្កាត់បាវិត។
សូមបញ្ជាក់ថា នារីរងគ្រោះបានបាត់ខ្លួន ខណៈជិះរថយន្តតាក់ស៊ីមកពីខួបកំណើតក្មួយពីខេត្តព្រះវិហារមកក្រុងបាវិតកាលថ្ងៃទី២ សីហានោះ ហើយត្រូវប្រជាពលរដ្ឋ និងសមត្ថកិច្ចប្រទះឃើញសពនៅថ្ងៃទី៤ សីហា ដោយមានការស្រាវជ្រាវរហូតដល់ល្ងាចថ្ងៃទី៨ សីហា ទើបសមត្ថកិច្ចចាប់ឃាតករដែលរំលោភសម្លាប់នារីរងគ្រោះ និងប្លន់ទ្រព្យសម្បត្តិទៀត។
ក្រោយពីបើកសវនាការកាត់ទោសជនត្រូវចោទទាំងពីរនាក់ឲ្យជាប់ពន្ធនាគារមួយជីវិត ក្រុមគ្រួសារនារីរងគ្រោះបានពេញចិត្ត និងទទួលយកដែលបានរង់ចាំមើលយ៉ាងអន្ទះសារអស់រយៈពេលជាង១ឆ្នាំ។ ទោះបីជាយ៉ាងណា តុលាការទុកពេល១ខែឲ្យជនត្រូវចោទប្តឹងឧទ្ធរណ៍។
ព័ត៌មានលំអិតនឹងមានផ្សាយជូននៅលើកាសែតកោះសន្តិភាព
ចែករំលែកព័តមាននេះ