ខេត្តព្រះសីហនុ ៖ រថយន្តម៉ាកមែរសឺដែសមួយគ្រឿង មិនមានពន្ធនាំចូល មានម្ចាស់ជនជាតិចិន ត្រូវបានសាខាគយនិងរដ្ឋាករខេត្តព្រះសីហនុឃាត់យកទៅរក្សាទុកដើម្បីអនុវត្តន៍នីតិវិធី។
លោក ទុំ ណូ ប្រធានសាខាគយនិងរដ្ឋាករខេត្តព្រះសីហនុ បានឲ្យដឹងកាលពីរសៀលថ្ងៃទី២៣ ខែសីហា ឆ្នាំ២០១៨នេះថា មន្ត្រីសាខាគយ និងរដ្ឋាករ ខេត្តព្រះសីហនុ ដោយមានការសម្របសម្រួលពីលោកស្រីព្រះរាជអាជ្ញាអមសាលាដំបូងខេត្តព្រះសីហនុ និងមានការចូលរួមពីសមត្ថកិច្ចកងរាជអាវុធហត្ថខេត្ត និងអាជ្ញា
ធររដ្ឋបាលខេត្តព្រះសីហនុ។
កម្លាំងជំនាញសាខាខាងលើបានចុះឃាត់រថយន្តមួយគ្រឿង ម៉ាកមែរសឺដែស ពណ៌ស ចង្កូតឆ្វេង ប្រើប្រាស់ស្លាកលេខក្លែងបន្លំ ២A-៣៨០០ មិនមានពន្ធនាំចូល ដែលមានម្ចាស់ជាជនជាតិចិន ដែលកំពុងតែចតនៅខាងមុខហាងលក់ទំនិញមួយកន្លែងនៅតាមបណ្តោយវិថីឯករាជ្យ ស្ថិតក្នុងសង្កាត់លេខ២ ក្រុងព្រះសីហនុ ខេត្តព្រះសីហនុ។
លោក ទុំ ណូ ប្រធានសាខាគយ និងរដ្ឋាករខេត្តព្រះសីហនុ បានបញ្ជាក់ថា រថយន្តមួយគ្រឿងខាងលើនេះនឹងនាំយកទៅរក្សាទុកនៅអង្គភាពសាខាគយនិងរដ្ឋាករ ខេត្តដើម្បីបន្តនីតិវិធីតាមផ្លូវច្បាប់។
លោកសង្កត់ធ្ងន់ថា ប្រតិបត្តិការនេះធ្វើឡើងដើម្បីទប់ស្កាត់ការបន្លំគេចពន្ធពីម្ចាស់យានយន្តគ្រប់ប្រភេទ ដូចដែលសាខាគយ និងរដ្ឋាករខេត្តព្រះសីហនុតែងតែបានអនុវត្តន៍នាពេលកន្លងមកទៅ នៅតាមកន្លែងលក់ទោចក្រយានយន្ត យានយន្តមួយចំនួននាពេលកន្លងមក នៅក្នុងខេត្តព្រះសីហនុ ប្រយោជន៍ដើម្បីឈានទៅប្រមូលប្រាក់ពន្ធតាមច្បាប់ស្តីពីការបង់ពន្ធ ដើម្បីបង្កើនចំណូលថវិការជាតិ សម្រាប់ឈានឆ្ពោះទៅការអភិវឌ្ឍន៍ប្រទេសជាតិយើង ហើយយុទ្ធនាការខាងលើនៅតែបន្តឲ្យបានដូចជាភ្លៀងរលឹម តាមបទបញ្ជារបស់លោកអគ្គនាយកដ្ឋានគយនិងរដ្ឋាករ ក្នុងព្រះរាជាណាចក្រកម្ពុជាយើង៕
ចែករំលែកព័តមាននេះ