ខេត្តកណ្តាល ៖ អំពើហិង្សាមួយបានកើតឡើង បណ្តាលឲ្យមានអ្នករងរបួសធ្ងន់ និងស្រាលបីនាក់នៅនឹង កន្លែងកើតហេតុ បង្កឲ្យមានការភ្ញាក់ផ្អើលដល់អ្នកធ្វើដំណើរ និងប្រជាពលរដ្ឋឈប់មើលយ៉ាងច្រើនកុះករ។ តែអ្វីដែលគួរឲ្យហួសចិត្តនោះ ដែលអ្នកធ្វើដំណើរបានរិះគន់យ៉ាងចាស់ដៃទៅលើលោក ឯម ចាន់រ៉ាត់ មេប៉ុស្តិ៍រដ្ឋបាលព្រែកហូរ ខណៈដែលជនរងគ្រោះដេកដួលសន្លប់នៅកន្លែងកើតហេតុជិត០២ម៉ោងទៅហើយ។
គ្មានទំនាក់ទំនងទៅខាងរថយន្តសង្គ្រោះឲ្យដឹកជនរងគ្រោះយកទៅសង្គ្រោះនៅមន្ទីរពេទ្យ ហើយថែមទាំងមិនឃាត់ខ្លួនជនបង្កទៀត បានត្រឹមតែអញ្ជើញភាគីបង្កទៅប៉ុស្តិ៍រដ្ឋបាល ដើម្បីធ្វើការសាកសួរ។ ហេតុការណ៍គួរឲ្យភ្ញាក់ផ្អើលនេះបានកើតឡើងនៅវេលាម៉ោង៤ និង៣០នាទីល្ងាច ថ្ងៃទី២៣ សីហា ២០១៨ ក្បែរស្ពានព្រែកហូរថ្មី ភូមិបត្តាជីលិច សង្កាត់ព្រែកហូរ ក្រុងតាខ្មៅ ខេត្តកណ្តាល។
ជនរងគ្រោះមានគ្នា០៣នាក់ ទី០១-ឈ្មោះ ស៊ុន សៀវម៉ី ភេទស្រី អាយុ២២ឆ្នាំ ទី០២-ឈ្មោះ ណុប សំអូន ភេទស្រី អាយុ៤១ឆ្នាំ និងទី០៣-ឈ្មោះ ខេន មករា ភេទប្រុស អាយុ៣១ឆ្នាំ អ្នកទាំងបីមានទីលំនៅភូមិបត្តាជី០១ សង្កាត់ព្រែកហូរ សង្កាត់ព្រែកហូរ ក្រុងតាខ្មៅ ខេត្តកណ្តាល។ ប្រភពព័ត៌មានច្បាស់ការបានបង្ហើបឲ្យដឹងថា ពាក់ពន្ធ័នឹងអំពើហិង្សារនេះបានកើតឡើងដោយមូលហេតុ ធ្លាប់មានទំនាស់រឿងព្រំដី និងការសាងសង់ផ្ទះជាយូរមកហើយ ហើយក៏ត្រូវជាបងប្អូននឹងគ្នាទៀត។
លុះដល់ល្ងាចថ្ងៃទី២៣ សីហា នេះ ក៏បានទាក់មាត់គ្នាទៅវិញទៅមក បង្កឲ្យមានអំពើហិង្សាកើតឡើង ដេញវាយគ្នា និងកាប់តែម្តង បណ្តាលឲ្យភាគីរងគ្រោះរងរបួសធ្ងន់ស្រាលបីនាក់។ បើតាមលោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានឲ្យដឹងថាពាក់ពន្ធ័នឹងអំពើហិង្សារវាងបងប្អូនគ្នាខាងលើនេះ កម្លាំងជំនាញកំពុងសហការណ៍ជាមួយកម្លាំងប៉ុស្តិ៍រដ្ឋបាលកំពុងធ្វើការសាកសួរ និងចាត់ការតាមនីតិវិធីច្បាប់៕
ចែករំលែកព័តមាននេះ