ខេត្តមណ្ឌលគិរី ៖ ដើម្បីការពារផលប្រយោជន៍ និងសុខភាពអ្នកប្រើប្រាស់ទូទៅ មន្ត្រីកាំកុងត្រូលខេត្តមណ្ឌលគិរី បានរកឃើញ និងដកហូតទឹកក្រូចម៉ាកសារាំងហេ ចំនួន១៨១កេះ ស្មើនឹង៤,៣៤៤ដប ពីអាជីវករលក់ដូរក្នុងឃុំពូជ្រៃ…
ខេត្តមណ្ឌលគិរី ៖ ដើម្បីការពារផលប្រយោជន៍ និងសុខភាពអ្នកប្រើប្រាស់ទូទៅ មន្ត្រីកាំកុងត្រូលខេត្តមណ្ឌលគិរី បានរកឃើញ និងដកហូតទឹកក្រូចម៉ាកសារាំងហេ ចំនួន១៨១កេះ ស្មើនឹង៤,៣៤៤ដប ពីអាជីវករលក់ដូរក្នុងឃុំពូជ្រៃ យកមករក្សាទុកនៅមន្ទីរពាណិជ្ជកម្មខេត្ត ដើម្បីធ្វើការដុតកម្ទេចចោល នៅពេលក្រោយ។
ប្រតិបត្តិការនេះ ដឹកនាំដោយលោក ជ័យ សាមឿន អនុប្រធានសាខាកាំកុងត្រួលខេត្ត សហការជាមួយមន្ទីរពាណិជ្ជកម្មខេត្ត នគរបាលប្រឆាំងបទល្មើសសេដ្ឋកិច្ចខេត្ត និងអាជ្ញាធរដែនដី បានចុះត្រួតពិនិត្យទំនិញ និងចំណីអាហារនៅតាមផ្ទះលក់ទំនិញនានា ស្ថិតនៅឃុំពូជ្រៃ ស្រុកពេជ្រាដា នាថ្ងៃទី២៣ ខែសីហា ឆ្នាំ២០១៨។ លោក ជ័យ សាមឿន អនុប្រធានសាខាកាំកុងត្រូលខេត្ត បានឲ្យដឹងថា ការចុះត្រួតពិនិត្យនេះ គឺផ្តោតសំខាន់ទៅលើទំនិញវេចខ្ចប់ស្រាប់ ភេសជ្ជៈ និងចំណីអាហារដែលអាជីវករដាក់តាំងលក់ នៅតាមផ្ទះលក់ចាបហួយនានា ដើម្បីពិនិត្យគុណភាព សុវត្ថិភាពចំណីអាហារ ក្នុងគោលបំណង ការពារផលប្រយោជន៍ និងសុខភាពអ្នកប្រើប្រាស់។
លោក បន្ថែមថា ការចុះត្រួតពិនិត្យនេះ មន្ត្រីជំនាញបានធ្វើតេស្ត រកសារធាតុគីមីហាមឃាត់ លើមុខទំនិញដូចជា៖ ត្រីងៀត សរសៃគុយទាវ នំបញ្ចុក ស្ពៃជ្រក់ ជ្រក់ត្រពាំង ជ្រក់ត្រសក់ សណ្តែកបណ្តុះ ខាត់ណា ស្ពៃក្តោប ត្រសក់។ ជាលទ្ធផលពុំមានសារធាតុគីមីហាមឃាត់ទាំងអស់នោះទេ ក្រៅពីនោះ ក៏បានធ្វើតេស្តរកសារធាតុអ៊ីយ៉ូតក្នុងអំបិល ម៉ាកលីលីដា ជាលទ្ធផលមានជាតិអ៊ីយ៉ូត ត្រឹមត្រូវ។
បន្ទាប់មកមន្ត្រីជំនាញ បានត្រួតពិនិត្យទំនិញវេចខ្ចប់ស្រាប់នៅតាមផ្ទះលក់ទំនិញនានា ដើម្បីស្វែងរកទំនិញខូចគុណភាព និងហួសកាលបរិច្ឆេទប្រើប្រាស់ ជាលទ្ធផលសមត្ថកិច្ចបានរកឃើញ និងដកហូតទឹកក្រូចម៉ាកសារ៉ាងហេចំនួន ១៨១កេះ ស្មើនឹង ៤,៣៤៤ដប មានទម្ងន់ស្មើនឹង ១,៦២៩គីឡូក្រាម យកមករក្សាទុកនៅមន្ទីរពាណិជ្ជកម្ម ដើម្បីធ្វើការដុតកម្ទេចចោល នៅពេលក្រោយផងដែរ។ ជាមួយគ្នានោះដែរ លោក ជ័យ សាមឿន ក៏បានធ្វើការចុះអប់រំណែនាំដល់អាជីវករទាំងអស់ឲ្យចៀសវាងការប្រើប្រាស់សារធាតុគីមីបន្ថែម ទៅលើផលិតផលម្ហូបអាហារ ហើយត្រូវរៀបចំទំនិញលក់ដូរឲ្យមានសណ្តាប់ធា្នប់ទៅតាមប្រភេទទំនិញ នីមួយៗ។
លើសពីនេះមន្ត្រីជំនាញក៏បានបិទរូបភាពដែលរៀបចំដោយអគ្គនាយកដ្ឋានកាំងកុងត្រូល ស្តីពី (សូមពិចារណាមុននឹងជ្រើសរើសផលិតផលម្ហូបអារហារណាមួយមកបរិភោគ) ជូនដល់អ្នកលក់ដូរ និងអ្នកប្រើប្រាស់។ បន្ទាប់មកមន្ត្រីកាំកុងត្រូល បានចុះអង្កេតតម្លៃប្រេងឥន្ធនៈ នៅតាមស្ថានីយនានា ក្នុងក្រុងសែនមនោរម្យ និងបានណែនាំដល់ម្ចាស់ស្ថានីយទាំងអស់ ត្រូវលក់តាមការកំណត់ របស់ក្រសួងពាណិជ្ជកម្មផងដែរ៕
ចែករំលែកព័តមាននេះ