ប្រទេសរុស្ស៊ី ៖ ប្រធានាធិបតីរុស្ស៊ីលោកវ្ល៉ាឌីមៀរពូទីន កាលពីថ្ងៃទី២២ សីហា បានវាយតម្លៃថា បណ្ដាទណ្ឌកម្មរបស់អាមេរិកប្រឆាំង ក្រុងមូស្គូដែលកាន់តែពង្រឹងថែមក្រោយការជួបគ្នារបស់លោកជាមួយលោកដូណាល់ត្រាំ ពុំបានផលអ្វីហើយគ្មានន័យ។លោកអំពាវនាវដល់ក្រុងវ៉ាស៊ិនតោនឲ្យកែប្រែគំនិតដើម្បីឲ្យមានការចរចាធម្មតាឡើងវិញ។
ការចូលជាធរមាននាថ្ងៃទី២២ សីហា នៃការដាក់ទណ្ឌកម្មថ្មីៗរបស់អាមេរិកប្រឆាំងរុស្ស៊ី បណ្ដាលឲ្យប្រាក់រូប្លិ៍រុស្ស៊ីធ្លាក់ថ្លៃជាថ្មី។
នៅមុខសារព័ត៌មានក្រោយទទួលសមភាគីហ្វាំងឡង់លោក SAULI NIINISTO នៅក្រុងសូតជីភាគនិរតីរុស្ស៊ី ប្រមុខវិមានក្រឹមឡាំងហាក់ពុំបង្ហាញពីការចុះញ៉មឡើយ។ លោកថា ទាក់ទិននឹងទណ្ឌកម្ម សកម្មភាពទាំងនោះពុំបានផលអ្វីទាល់តែសោះ ហើយគ្មានន័យ។ ខ្ញុំសង្ឃឹមថា អាមេរិកនឹងភ្ញាក់រលឹកថា នយោបាយបែបនោះពុំមានអនាគតហើយយើងគួរចាប់ផ្ដើមរួមសហការគ្នាជាធម្មតាវិញល្អជាង។ បញ្ហាពុំមែនស្ថិតតែក្នុងជំហររបស់ប្រធានាធិបតីអាមេរិកទេ តែវាក៏ស្ថិតក្នុងជំហរដែលគេហៅថាសំដៅទៅបំផ្លាញសហរដ្ឋអាមេរិកផងដែរ។
ចំណែកលោកស័រហ្គេយ រីយ៉ាបកូវ អនុរដ្ឋមន្ត្រីការបរទេសរុស្ស៊ីវិញ អះអាងប្រាប់ទីភ្នាក់ងារព័ត៌មាន RIA NOVOSTI ថា បណ្ដាទណ្ឌកម្មអាមេរិកពុំមានឥទ្ធិពលអ្វីលើនយោបាយរបស់យើងឡើយ។ លោកបន្តថា ទណ្ឌកម្មទាំងនោះនឹងជារបៀបវារៈនៃការពិភាក្សាគ្នានៅទីក្រុងហ្សឺណែវ នាថ្ងៃទី២៣ សីហា រវាងទីប្រឹក្សាសន្តិសុខជាតិអាមេរិកលោក JOHN BOLTON និងសមភាគីរុស្ស៊ី លោកនីកូឡៃប៉ាទ្រូឆេវ។
ចេញផ្សាយកាលពីដើមខែសីហា ហើយចូលជាធរមាននាថ្ងៃទី២២ សីហា បណ្ដាទណ្ឌកម្មចុងក្រោយរបស់អាមេរិកប្រឆាំងរុស្ស៊ី ទាក់ទិននឹងការបំពុលអតីតចារបុរសរុស្ស៊ីម្នាក់នៅអង់គ្លេស។ ទណ្ឌកម្មនោះគឺការរិតត្បិតលើការនាំចេញផលិតផលបច្ចេកវិទ្យាមួយចំនួនហើយ បន្ទាប់មកទៀតនឹងមានរលកទណ្ឌកម្មថ្មីដែលអាចកាន់តែឈឺចាប់ខ្លាំង។
ក្រុងវ៉ាស៊ិនតោននាថ្ងៃទី២១ សីហា ក៏ដាក់ទណ្ឌកម្មក្រុមហ៊ុនរុស្ស៊ី មួយចំនួនដែលចោទថា ជួយទ្រទ្រង់ដល់សកម្មភាពលួចប្រព័ន្ធព័ត៌មានរបស់រុស្ស៊ី ឬចាប់ផ្ដើមធ្វើពាណិជ្ជកម្មជាមួយកូរ៉េខាងជើង ទោះមានការហ៊ុំព័ទ្ធរបស់អន្តរជាតិ៕
ចែករំលែកព័តមាននេះ