ខេត្តកំពង់ឆ្នាំង ៖ បន្ទាប់ពីអាជ្ញាធរអគ្គិសនីបានផ្អាកការផ្តល់ចរន្តអគ្គិសនីផ្គត់ផ្គង់ដល់ប្រជាពលរដ្ឋរស់នៅក្នុងស្រុកកំពង់លែង រយៈពេល២ថ្ងៃកន្លងទៅនេះនៅរសៀលថ្ងៃទី២១ ខែសីហា បានបើកឲ្យដំណើរការវិញហើយ ក្រោយពីកិច្ចប្រជុំផ្លាស់ប្តូរយោបល់គ្នារវាងថ្នាក់ដឹកនាំខេត្ត មន្ត្រីជំនាញ និងអាជ្ញាធរអគ្គិសនី ។…
ខេត្តកំពង់ឆ្នាំង ៖ បន្ទាប់ពីអាជ្ញាធរអគ្គិសនីបានផ្អាកការផ្តល់ចរន្តអគ្គិសនីផ្គត់ផ្គង់ដល់ប្រជាពលរដ្ឋរស់នៅក្នុងស្រុកកំពង់លែង រយៈពេល២ថ្ងៃកន្លងទៅនេះនៅរសៀលថ្ងៃទី២១ ខែសីហា បានបើកឲ្យដំណើរការវិញហើយ ក្រោយពីកិច្ចប្រជុំផ្លាស់ប្តូរយោបល់គ្នារវាងថ្នាក់ដឹកនាំខេត្ត មន្ត្រីជំនាញ និងអាជ្ញាធរអគ្គិសនី ។
ការផ្ដាច់ចរន្តអគ្គិសនីដែលមានតង់ស្យុងខ្ពស់ទៅស្រុកកំពង់លែងនេះដែរ គឺបន្ទាប់ពីមានករណីគ្រោះថ្នាក់ដោយសារឆក់ខ្សែភ្លើងលើអាជីវករទិញលក់ត្រីម្នាក់ កាលពីព្រឹកថ្ងៃទី២០ ខែសីហាកន្លងទៅ នៅចំណុចទំនប់បារាំង ស្ថិតនៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ខណៈដែលទឹកទន្លេឡើងខ្ពស់ដូចធ្វើឲ្យខ្សែកាបអគ្គិសនីធ្លាក់មកនៅទាប ។
លោក បេ សារុំ អភិបាលរងក្រុងកំពង់ឆ្នាំងមានប្រសាសន៍ថា ការតភ្ជាប់ចរន្តអគ្គិសនីនេះឡើងវិញ គឺបន្ទាប់ពីមានការប្រជុំពិភាក្សាដោះស្រាយពេញមួយព្រឹកទើបសម្រេចឲ្យដំណើរការឡើងវិញ ព្រោះយល់ថាប្រជាពលរដ្ឋនៅស្រុកកំពង់លែងមិនអាចអត់អគ្គិសនីប្រើប្រាស់បានទេ ហើយក៏សម្រេចភ្ជាប់ចរន្តអគ្គិសនីនោះឡើងវិញ ដោយមានការឯកភាពពីគណៈបញ្ជាការឯកភាពខេត្ត មន្ត្រីមន្ទីររ៉ែ និងថាមពល និងមន្ត្រីនៃអគ្គិសនីកម្ពុជាផងដែរ ។
លោកអភិបាលរងក្រុងបានបញ្ជាក់ថា គណៈកម្មការបានសម្រេចបែបនេះ គឺដើម្បីឲ្យប្រជាពលរដ្ឋនៅស្រុកកំពង់លែងបានចរន្តអគ្គិសនីប្រើប្រាស់ឡើងវិញ ។ ប៉ុន្តែការចរាចរណ៍ផ្លូវទឹកនៅចំណុចទំនប់បារាំងដែលជាកន្លែងគ្រោះថ្នាក់ត្រូវបានហាមឃាត់មិនឲ្យធ្វើចរាចរណ៍ សម្រាប់កាណូតធំៗដែលមានកម្ពស់ចាប់ពីជាង១ម៉ែត្រឡើង ព្រោះកម្ពស់ខ្សែកាបអគ្គិសនីនៅចំណុចនោះ មានកម្ពស់តែប្រមាណ៣ម៉ែត្រ ពីលើផ្ទៃទឹកតែប៉ុណ្ណោះ ។
ជាមួយគ្នានេះអាជ្ញាធរខេត្តក៏បានដាក់កម្លាំងសមត្ថកិច្ចនគរបាលចរាចរណ៍ជើងគោកខេត្តឲ្យដាក់ប៉ុស្តិ៍យាមនៅចំណុចនោះប្រចាំ២៤ម៉ោង និងបានដាក់ខ្សែចងខ្វាត់ខ្វែងជាមួយនឹងការុង ពណ៌ស ធ្វើជាសញ្ញាមិនឱ្យឆ្លងកាត់ ហើយនៅពេលយប់ក៏មានដាក់អំពូលភ្លើង និងដាក់ភ្លើងសញ្ញាមិនឲ្យឆ្លងកាត់ផងដែរ ។ ការធ្វើបែបនេះនឹងត្រូវបន្តរហូតដល់ពេលអាជ្ញាធរអគ្គិសនី រកវិធីថ្មីបាន ឬ អាចដល់ទឹកទន្លេស្រក ។ ប៉ុន្តែផ្ទុយទៅវិញអាចនឹងបិទផ្តាច់អគ្គិសនីទាំងស្រុងនៅពេលទឹកទន្លេបន្តឡើងខ្ពស់ជាងនេះ ។
យ៉ាងនេះក្តីលោកនៅតែមានការព្រួយបារម្ភខ្លាចក្រែងមានការគ្រោះថ្នាក់ជាយថាហេតុណាមួយកើតឡើង ហេតុនេះសូមប្រជាពលរដ្ឋដែលធ្វើដំណើរតាមផ្លូវទឹកឆ្លងកាត់ចំណុចទំនប់បារាំង សូមប្រុងប្រយ័ត្ន និងត្រូវបើកផ្លូវវាង ដើម្បីកុំឲ្យមានគ្រោះថ្នាក់ ។
សូមបញ្ជាក់ថា កាលពីព្រឹកថ្ងៃទី២០ ខែសីហា ចរន្តអគ្គិសនីដែលមានតង់ស្យុងខ្ពស់ នៅចំណុចនោះបានឆក់ឆេះខ្លួនបុរសអ្នករកស៊ីទិញត្រីម្នាក់បានរងរបួសធ្ងន់ បន្ទាប់ពីជិះលើដំបូលកាណូតឆ្លងកាត់ទីនោះ ហើយពេលនេះកំពុងស្ថិតក្នុងការសង្គ្រោះនៅប្រទេសវៀតណាម ៕
ចែករំលែកព័តមាននេះ