ខេត្តបន្ទាយមានជ័យ ៖ បុរសម្នាក់បានស្លាប់នៅនឹងកន្លែងដោយសារ រថយន្តក្រុងបុក ខណៈកំពុងបើកបរម៉ូតូលើដងផ្លូវជាតិលេខ៥ ខាងកើតស្ថានីយដឹកអ្នកដំណើអន្តរជាតិ(ស៊ូជីង)ប្រហែល២០ម៉ែត្រ នៅភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត កាលពីវេលាម៉ោងជិត១០យប់ ថ្ងៃទី២២ សីហា ២០១៨ ។
ជនរងគ្រោះខាងលើមានឈ្មោះ វន សុភក្ត្រា អាយុ៣៣ឆ្នាំ ។ ប្រភពថា គាត់ជាមេការខារ៉ាអូខេមួយកន្លែងនៅក្រុងប៉ោយប៉ែត។
នគរបាលជំនាញចរាចរណ៍នៃអធិការដ្ឋាននគរបាលក្រុងប៉ោយប៉ែតប្រាប់ថា មុនកើតហេតុជនរងគ្រោះបើកបរម៉ូតូម៉ាកអេសស្លេដ ពណ៌ខ្មៅ ពាក់ស្លាកលេខបន្ទាយមានជ័យ 1Q-2556 ពីកើតទៅលិច លុះដល់ចំណុចកើតហេតុ មិនដឹងថា យ៉ាងដូចម្តេចក៏បានបុក និងរថយន្តដឹកអ្នកដំណើររបស់ក្រុមហ៊ុនវរប៊ុនថាំ ម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ3A- 4940 ដែលបើកបរបញ្ច្រាសទិសពីលិចទៅកើត បណ្តាលឲ្យជនរងគ្រោះស្លាប់នៅនឹងកន្លែង ។
សមត្ថកិច្ចបន្តថា អ្នកបើកបររថយន្តបង្ករខាងលើក្រោយកើតហេតុបានចុះរត់គេចខ្លួនបាត់ ។ ក្រោយវាស់វែង និងធ្វើកំណត់ហេតុសពត្រូវបានប្រគល់ឲ្យសាច់ញាតិនាំយកទៅតម្កល់នៅបរិវេណវត្តហៅវត្តត្រាច ដើម្បីធ្វើបុណ្យតាមប្រពៃណី ។ ចំណែករថយន្តបង្ករក្សាទុកនៅប៉ុស្តិ៍រដ្ឋបាលសង្កាត់និមិត្ត ឯម៉ូតូជនរងគ្រោះរក្សាទុកនៅអធិការដ្ឋាននគរបាលក្រុង ៕
ចែករំលែកព័តមាននេះ