ខេត្តកណ្តាល ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានថ្លែងនៅព្រឹកថ្ងៃទី ២៣ សីហានេះថា បណ្តាមេដឹកនាំគណបក្សនយោបាយដែលបានគាំទ្រនូវគំនិតផ្តួចផ្តើមរបស់សម្តេចដើម្បីបង្កើត«ឧត្តមក្រុមប្រឹក្សាពិគ្រោះ និងផ្តល់យោបល់» នឹងទទួលបានឱកាសចូលរួមផ្តល់មតិយោបល់លើសេចក្តីព្រាងច្បាប់ដ៏សំខាន់មួយនាពេលខ្លីខាងមុខនេះ ។
សម្តេចតេជោថ្លែងនា ឱកាសអញ្ជើញចុះជួបសំណេះសំណាលជាមួយកម្មករ-កម្មការិនីចំនួន១៧,៥០៣នាក់ មកពីរោងចក្រសហគ្រាសចំនួន១២ នៅក្នុងខេត្តកណ្តាល បានបញ្ជាក់ជូនចំពោះលោក ប៊ិន ឈិន រដ្ឋមន្ត្រីស្តីទីនៃគណៈរដ្ឋមន្ត្រីថា បើទោះបីជាឧត្តមក្រុមប្រឹក្សានេះកើតឡើងទាន់ ឬមិនទាន់ក៏ប៉ុន្តែច្បាប់មួយដែលក្រុមប្រឹក្សានេះត្រូវធ្វើមុនគេដែលអាចចូលរួមប្រជុំ និងផ្តល់មតិមុនគេ គឺច្បាប់ថវិកាសម្រាប់ការគ្រប់គ្រងឆ្នាំ២០១៩ គឺច្បាប់ថវិកាតែម្តង ។
សម្តេចតេជោ ហ៊ុន សែនបានពន្យល់ថា ត្រង់ចំណុចនេះមានន័យថា គឺអញ្ជើញមេបក្សនយោបាយឲ្យផ្តល់យោបល់លើសេចក្តីព្រាងច្បាប់ដែលសង្ឃឹមថា បើទោះបីជាព្រះរាជក្រឹត្យទាន់ ឬមិនទាន់ក៏នៅតែអញ្ជើញប្រធានបក្សនយោយបាយមកផ្តល់មតិ មុនសេចក្តីព្រាងច្បាប់ចូលទៅដល់គណៈរដ្ឋមន្ត្រី ព្រោះច្បាប់ថវិកាជាទំនាស់នយោបាយជាទំនាស់សេដ្ឋកិច្ចធំណាស់ «អញ្ចឹងយើងបើកទ្វារចំហរការចូលរួមផ្តល់មតិ សម្រាប់ច្បាប់ថវិកា បើទោះបីជាឯកឧត្តមលោកជំទាវមិនទាន់មានបទពិសោធន៍ក៏ដោយ» ។
យោងទៅលើប្រតិទិននៃច្បាប់ថវិកាចុងខែតុលានេះ គណៈរដ្ឋមន្ត្រីនឹងធ្វើការអនុម័ត អញ្ចឹងក្នុងរង្វង់ខែតុលា នូវសេចក្តីព្រាងច្បាប់ថវិកាសម្រាប់ការគ្រប់គ្រងឆ្នាំ២០១៩ ដូច្នេះប្រធានបក្សនយោបាយត្រូវចូលរួមប្រជុំផ្តល់មតិលើសេចក្តីព្រាងច្បាប់ ។
សូមរម្លឹកថា សម្តេចតេជោបានជួបពិភាក្សាជាមួយបក្សនយោបាយចំនួន១៦ កាលពីព្រឹកថ្ងៃទី ២១ សីហាកន្លងទៅថ្មីៗនេះដែលត្រូវបានចាត់ទុកថា ជាកិច្ចប្រជុំដ៏កម្រមួយព្រោះ ការប្រជុំនោះបានសម្រេចបង្កើត«ឧត្តមក្រុមប្រឹក្សាពិគ្រោះ និងផ្តល់យោបល់» ដោយអនុញ្ញាតឱ្យគណបក្សដែលមិនទទួលបានអាសនៈក្នុងរដ្ឋសភាចូលរួមផ្តល់យោបល់ដល់រដ្ឋាភិបាលថ្មី អាណត្តិទី ៦នេះ ។ សម្តេចក៏បានពន្យល់អំពីការទិតៀនដែលគណបក្សប្រជាជនកម្ពុជាបានឈ្នះអាសន្នៈទាំងអស់១២៥អាសន្នៈនៅរដ្ឋសភាថា គឺជាស្ថានភាពដែលចេញពីការប្រកួតប្រជែងយ៉ាងខ្លាំងក្លាចំនួន២០គណបក្សនយោបាយ ។
សម្តេចតេជោ ហ៊ុន សែន ថ្លែងថា «ស្ថានភាពនៃការប្រកួតប្រជែងមាន២០គណបក្សចូលរួមមិនមែនជារឿងធម្មតាទេ» សម្រាប់អាណត្តិនេះដែលមានតែគណបក្ស១នៅក្នុងរដ្ឋសភា ទោះបីជាមានគណបក្សច្រើនជាង១ ក៏ប៉ុន្តែវាមិនអាចទៅដល់២០គណបក្សទេ អញ្ចឹងហើយទើបសម្តេចមានគំនិចផ្តួចផ្តើមបើកវេទិកាពិគ្រោះយោបល់ជាមួយមេដឹកនាំគណបក្សនយោបាយទាំង២០ ដើម្បីបង្កើតជាឧត្តមក្រុមប្រឹក្សាមិនមែនអង្គុយទិតៀនក្នុងសភា និងក្រៅសភាទេ តែតួនាទីនេះអាចចូលរួមចំណែកកសាងប្រទេសយើងផងដែរ ។ សម្តេចក៏យកឱកាសនោះដើម្បីជាការបំភ្លឺចំពោះសាធារណៈមតិខ្លះដែលបាននិយាយថា«ឥឡូវកម្ពុជាបានឈានចូលទៅក្នុងស្ថានភាពឯកបក្សហើយ» ។
សម្តេចនាយករដ្ឋមន្ត្រីមានប្រសាសន៍បញ្ជាក់ថា «ហើយខ្ញុំសុំយកឱកាសនេះ បញ្ជាក់ជូនជនរួមជាតិក៏ដូចជា អង្គការក្រៅរដ្ឋាភិបាលក៏ដូចជា បណ្តាគណបក្សនយោបាយថា ស្ថានភាពឯកបក្សក្នុងរដ្ឋសភា ប៉ុន្តែបានចាប់ផ្តើមពីស្ថានភាពពហុបក្សនៃការបោះឆ្នោតដែលឆន្ទៈប្រជាពលរដ្ឋបានប្រគល់ទាំងស្រុង ឲ្យគណបក្សប្រជាជន ។ យើងមិនអាចទាត់ចោលនោះទេ» ។ សម្តេចតេជោក៏បានថ្លែងពីក្រុមលោក សម រង្ស៊ី និងបក្សពួករបស់អតីតមេដឹកនាំគណបក្សប្រឆាំង គឺជាចោរលួចហ្វេសប៊ុករបស់ពូ បានប្រកាសថា គណបក្សប្រជាជននឹងចែកកៅអីឲ្យគណបក្សនេះប៉ុណ្ណេះ គណបក្សនោះប៉ុណ្ណោះ អានេះពិតជាមេចោរមែន» ធ្វើអីពូមិនបាន បែរជាមកលួចហ្វេសប៊ុករបស់គេ ដែលនេះជា «ឧក្រិដ្ឋកម្មព័ត៌មានវិទ្យាដែលត្រូវទទួលខុសត្រូវនៅពេលខាងមុខ» ៕
ចែករំលែកព័តមាននេះ