ការស្រាវជ្រាវថ្មីៗចំនួនពីរដែលត្រូវបានធ្វើបទបង្ហាញនៅក្នុងសន្និបាតប្រចាំឆ្នាំរបស់សមាគមចិត្តសាស្ត្រអាមេរិកបានបង្ហាញថា ការប្រើប្រាស់ទូរស័ព្ទ ទោះតិចពិតមែនក្តី តែអាចបង្កឲ្យមនុស្សងាយបែកអារម្មណ៍ ឆ្ងាយពីអ្នកនៅជុំវិញខ្លួន និងឆាប់អស់កម្លាំង ។ ការសិក្សាមួយបានស្ទង់មតិនិស្សិតប្រមាណ១២០នាក់ បានប្រទះឃើញថា ការប្រើប្រាស់ស្មាតហ្វូនប៉ះពាល់ដល់ទំនាក់ទំនងក្នុងសង្គមរបស់ពួកគេ…
ការស្រាវជ្រាវថ្មីៗចំនួនពីរដែលត្រូវបានធ្វើបទបង្ហាញនៅក្នុងសន្និបាតប្រចាំឆ្នាំរបស់សមាគមចិត្តសាស្ត្រអាមេរិកបានបង្ហាញថា ការប្រើប្រាស់ទូរស័ព្ទ ទោះតិចពិតមែនក្តី តែអាចបង្កឲ្យមនុស្សងាយបែកអារម្មណ៍ ឆ្ងាយពីអ្នកនៅជុំវិញខ្លួន និងឆាប់អស់កម្លាំង ។
ការសិក្សាមួយបានស្ទង់មតិនិស្សិតប្រមាណ១២០នាក់ បានប្រទះឃើញថា ការប្រើប្រាស់ស្មាតហ្វូនប៉ះពាល់ដល់ទំនាក់ទំនងក្នុងសង្គមរបស់ពួកគេ ។ និស្សិតទាំងនោះត្រូវបានសួរ៥ដងក្នុងមួយថ្ងៃអស់មួយសប្តាហ៍ពេញថា ពួកគេមានអារម្មណ៍យ៉ាងណា ? តើពួកគេបានធ្វើអ្វីក្នុងរយៈពេល១៥នាទី មុនពេលឆ្លើយសំណួរ ។
និស្សិតទាំងនោះបានឲ្យដឹងថា ពួកគេបែកអារម្មណ៍ច្រើនជាងមុនពេលប្រាស្រ័យទាក់ទងផ្ទាល់មុខ បន្ទាប់ពីប្រើស្មាតហ្វូនហើយ។ លើសពីនេះ ពួកគេក៏មិនចង់ឬចូលចិត្តទាក់ទងគ្នាដែរ បន្ទាប់ពីប្រើទូរស័ព្ទរួច ។
ជាមួយគ្នានេះដែរ ការសិក្សាមួយទៀតបានប្រទះឃើញថា ការប្រើស្មាតហ្វូនអាចកាត់បន្ថយការចូលរួម និងការចូលចិត្តទទួលទានអាហារពេលយប់ជាមួយនឹងមិត្តភក្តិ ឬគ្រួសារ។
អ្នកស្រាវជ្រាវបានស្ទង់មតិមនុស្សពេញវ័យនិងនិស្សិតច្រើនជាង៣០០នាក់ មកពីទីក្រុង Vancouver ។ ពួកគេត្រូវបានប្រាប់ឲ្យដាក់ទូរស័ព្ទលើតុដោយមិនបិទសំឡេង មុនទទួលទានអាហារ ខណៈអ្នកមួយចំនួនទៀតត្រូវបានប្រាប់ឲ្យបិទសំឡេង និងដាក់វាក្នុងប្រអប់មួយនៅលើតុ ។
បន្ទាប់មក អ្នកចូលរួមការសិក្សាត្រូវឆ្លើយសំណួរទាក់ទិននឹងអារម្មណ៍របស់ពួកគេ នៅពេលប្រើទូរស័ព្ទ ខណៈកំពុងទទួលទានអាហារ និងថាតើពួកគេប្រើទូរស័ព្ទដើម្បីអ្វី ។
អ្នកដែលមានទូរស័ព្ទជិតដៃប្រើស្មាតហ្វូន បានប្រាប់ថា ពួកគេងាយបែកអារម្មណ៍ ។ ជាលទ្ធផល ពួកគេទទួលបានភាពរីករាយពីការទទួលទានអាហារតិចជាងអ្នកដែលមិនមានស្មាតហ្វូននៅជិតដៃ ។
ដូច្នេះអ្នកស្រាវជ្រាវសរុបសេចក្តីមកថា ទូរស័ព្ទដៃធ្វើឲ្យអ្នកប្រើប្រាស់បាត់បង់ក្តីរីករាយព្រោះវាមិនអនុញ្ញាតឲ្យអ្នកប្រើប្រាស់ចូលរួមទាំងស្រុងនឹងសកម្មភាពនានានៅបច្ចុប្បន្នភាពឡើយ ៕
ចែករំលែកព័តមាននេះ