រាជធានីភ្នំពេញ ៖ ដើម្បីផ្ដល់ភាពងាយស្រួលដល់ប្រជាជននៃប្រទេសទាំងពីរក្នុងការទូទាត់ទំនិញ ឬសេវាកម្ម និងជួយសម្រួលដល់ពលករខ្មែរដែលធ្វើការនៅប្រទេសថៃក្នុងការផ្ទេរប្រាក់មកក្រុមគ្រួសារ ពិសេសក្នុងគោលដៅលើកកម្ពស់ការប្រើប្រាស់ប្រាក់រៀលខ្មែរ ធនាគារជាតិនៃកម្ពុជា(NBC) កំពុងតែជំរុញការទូទាត់ទំនិញឬសេវាឆ្លងកាត់ព្រំដែនដោយប្រើប្រាស់រូបិវត្ថុជាតិរៀងៗខ្លួនតាមប្រព័ន្ធQR Code ជាមួយភាគីថៃ ។
លោកជំទាវ ជា សិរី អគ្គនាយកបច្ចេកទេស នៃធនាគារជាតិនៃកម្ពុជា មានប្រសាសន៍ថា ការរៀបចំឲ្យមានការទូទាត់តាមប្រព័ន្ធ QR Codeនេះ ក្នុងគោលបំណងអនុញ្ញាតឱ្យប្រជាជនកម្ពុជាដែលមានកាបូបប្រាក់អេឡិចត្រូនិក(E-Wallet) ជាលុយរៀល អាចទូទាត់នៅហាងណាដែលមានQR Code ក្នុងប្រទេសថៃបាន ដោយមិនចាំបាច់ប្ដូរជាប្រាក់បាតនោះទេ ។ ចំណែកភាគីថៃក៏ដូចគ្នាដែរ លុះត្រាតែកាបូបប្រាក់អេឡិចត្រូនិករបស់គាត់ជាលុយបាត ទើបអាចទូទាត់នៅកម្ពុជាបាន ។
លោកជំទាវថ្លែងថា ៖« យើងកំពុងតែរៀបចំច្បាប់ និងនីតិវិធីមួយចំនួនទៀត ជាមួយធនាគារកណ្តាលថៃ ហើយសង្ឃឹមថានៅពាក់កណ្តាលឆ្នាំក្រោយនេះ(២០១៩) យើងអាចជំរុញការងារនេះទៅតាមការកំណត់ »។
ការប្រើប្រាស់ QR Code នឹងអនុញ្ញាតឱ្យប្រជាជនកម្ពុជា ដែលមានគណនីជាប្រាក់រៀលទទួលបានផលចំណេញច្រើន ដូចជា អាចធ្វើការទូទាត់ចេញពីគណនីជាប្រាក់រៀលរបស់ខ្លួន សម្រាប់ចំណាយទិញទំនិញ ឬទូទាត់ចំណាយនានាដូចជា សេវាព្យាបាល ជាដើម នៅលើទឹកដីថៃ ដោយងាយស្រួល សុវត្ថិភាព និងចំណាយតិចបំផុត បើធៀបនឹងការប្តូរ ឬកាន់សាច់ប្រាក់បាតទៅចាយលើទឹកដីថៃ ។ ដូច្នេះ ប្រជាជនកម្ពុជា នឹងមិនចាំបាច់ខ្វល់ខ្វាយពីការប្តូរប្រាក់ ដែលពេលខ្លះអាចទទួលរងនូវការខាតបង់ពីការប្តូរប្រាក់ » ។
យោងតាមធនាគារជាតិនៃកម្ពុជា ការប្រើប្រាស់ប្រព័ន្ធ QR Code ក៏នឹងអាចអនុញ្ញាតឱ្យពាណិជ្ជករទូទាត់ថ្លៃទំនិញឱ្យគ្នាដោយផ្ទាល់ ដោយមិនចាំបាច់ធ្វើការប្តូរប្រាក់នៅតាមភ្នាក់ងារប្តូរប្រាក់នានាផងដែរ ។ ចំណែកពលករកម្ពុជា ដែលធ្វើការនៅប្រទេសថៃ ក៏អាចផ្ទេរប្រាក់មកគ្រួសារតាមរយៈប្រព័ន្ធនេះផងដែរ ជាមួយនឹងការចំណាយទាប និងមានសុវត្ថិភាពបំផុត ។
ធនាគារជាតិនៃកម្ពុជា បានបញ្ជាក់ថា ៖« គម្រោងតភ្ជាប់ប្រព័ន្ធទូទាត់តាមរយៈ QR Code នេះ នឹងក្លាយជាកម្លាំងចលករមួយទៀត ក្នុងការលើកទឹកចិត្តឱ្យប្រជាជនកម្ពុជា មានគណនីជាប្រាក់រៀល ដោយទទួលបាននូវអត្ថប្រយោជន៍ជាច្រើនទាំងក្នុងនិងនៅក្រៅស្រុក ស្របតាមគោលនយោបាយជំរុញការប្រើប្រាស់ប្រាក់រៀលរបស់ធនាគារជាតិនៃកម្ពុជា » ។
ទីប្រឹក្សាជាន់ខ្ពស់ផ្នែកសេដ្ឋកិច្ចនិងអភិវឌ្ឍន៍នៃក្រុមហ៊ុន Emerging Markets Consulting លោក ង៉ែត ជូ បានឲ្យដឹងកាលពីពេលថ្មីៗនេះ ថា នៅពេលធនាគារកណ្តាលនៃប្រទេសទាំងពីរ ដាក់ឱ្យប្រើប្រាស់ប្រព័ន្ធQR Codeនេះសម្រាប់ទូទាត់ទូទៅ វានឹងផ្តល់ផលចំណេញផ្នែកសេដ្ឋកិច្ចទាំងសងខាង ។
លោកថ្លែងថា ៖« ថៃនឹងចំណេញសេដ្ឋកិច្ច តាមរយៈការជំរុញឱ្យពលរដ្ឋខ្មែរចាយវាយនៅក្នុងប្រទេសថៃច្រើន ។ មួយទៀត វាចំណេញមកដល់កម្ពុជាវិញ ជាពិសេស ធ្វើឱ្យកម្មករដែលធ្វើការនៅប្រទេសថៃ កាត់បន្ថយនូវហានិភ័យទៅលើការវេរលុយតាមរយៈអ្នកស្គាល់គ្នា ដែលប្រឈមនឹងការបាត់បង់ រួមនឹងបញ្ហាផ្សេងៗទៀត »។
លោកបន្ដថា ប្រព័ន្ធ QR Code នេះ នឹងចូលរួមជំរុញការប្រើប្រាស់ប្រាក់រៀលខ្មែរបានមួយចំណែក ប្រសិនបើចំនួនអ្នកប្រើប្រាស់កាន់តែច្រើន។ ទន្ទឹមនឹងនេះ ក៏បានចូលរួមកាត់បន្ថយហានិភ័យដល់ពលករខ្មែរនៅប្រទេសថៃផងដែរ៕
ចែករំលែកព័តមាននេះ