ខេត្តកណ្តាល ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជាអាណត្តិទី៦ បានផ្ញើសារនយោបាយដ៏សំខាន់មួយថាមានអ្នកកំពុងជាប់ពន្ធគារចំនួន១២នាក់ ដែលជាសកម្មជនអតីតគណបក្សប្រឆាំងអាចនឹងត្រូវដោះលែងពីពន្ធនាគារ ព្រោះខណៈពេលនេះរដ្ឋមន្ត្រីក្រសួងយុត្តិធម៌កំពុងតែពិនិត្យសំណុំរឿង…
ខេត្តកណ្តាល ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជាអាណត្តិទី៦ បានផ្ញើសារនយោបាយដ៏សំខាន់មួយថាមានអ្នកកំពុងជាប់ពន្ធគារចំនួន១២នាក់ ដែលជាសកម្មជនអតីតគណបក្សប្រឆាំងអាចនឹងត្រូវដោះលែងពីពន្ធនាគារ ព្រោះខណៈពេលនេះរដ្ឋមន្ត្រីក្រសួងយុត្តិធម៌កំពុងតែពិនិត្យសំណុំរឿង ដោយសារអ្នកទាំងនោះបានសរសេរលិខិតស្នើសុំលើកលែងទោសហើយ ។
យ៉ាងណាមិញ សម្តេចតេជោបានអញ្ជើញចុះជួបសំណេះសំណាលជាមួយកម្មករ កម្មការិនីចំនួន ១៧,៥០៣នាក់ មកពីរោងចក្រ សហគ្រាសចំនួន១២ នៅក្នុងខេត្តកណ្តាល ដែលពិធីសំណេះសំណាលនេះធ្វើឡើងនៅភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្តាល ។ សម្តេចតេជោបានបញ្ជាក់ថា ការលើកលែងទោស និងដោះលែងអ្នកជាប់ឃុំមួយចំនួនកាលពីពេលថ្មីៗនេះ គឺដោយសារតែក្តីសណ្តោសរបស់នាយករដ្ឋមន្ត្រី តែកុំយល់ច្រឡំឲ្យសោះ ការដោះលែងនោះ គឺដោយសារតែសម្ពាធពីបរទេសដោយសម្តេចបញ្ជាក់ថា«សុំកុំនិយាយថា វាមកពីសម្ពាធបរទេស ខ្ញុំស្អប់ណាស់ពាក្យនឹង» ។
សម្តេចតេជោ ហ៊ុន សែនបានបញ្ជាក់ថា ១២នាក់បន្ថែមទៀតអាចនឹងត្រូវដោះលែង តែបើអ្នកនៅក្រៅ (អតីតមេដឹកនាំអតីតគណបក្សសង្គ្រោះជាតិ លោក សម រង្ស៊ី) ដែលកំពុងតែរត់គេចខ្លួននៅក្រៅប្រទេសចោទប្រកាន់ថា ការដោះលែងថ្មីៗនេះ គឺដោយសារតែសម្ពាធពីបរទេសនោះ វាសនាអ្នកកំពុងជាប់ឃុំ១២នាក់ អាចត្រូវបន្តរស់នៅក្នុងគុកបន្តទៀត ។ ហើយអាចនឹងតម្រូវឲ្យអ្នកជាប់ឃុំត្រូវសរសេរលិខិតសុំលើកលែងទោសជាថ្មីម្តងទៀត ហើយលោក សម រង្ស៊ី ក៏ត្រូវធ្វើលិខិតបញ្ជាក់ផងដែរថា ការដោះលែង ឬលើកលែងទោសមិនពាក់ព័ន្ធនឹងសម្ពាធឬដោយសារតែការកៀបសង្កត់ពីបរទេសនោះទេ ។
សម្តេចក៏បានផ្តាំផ្ញើ អ្នកនៅក្រៅប្រទេសថា អ្នកហាក់មិនសោកស្តាយ អ្នកកំពុងជាប់ពន្ធនាគារថា ពួកគេធ្លាប់រួមប្រព្រឹត្តបទល្មើសជាមួយរូបគាត់ ដូច្នេះកុំនិយាយពាក្យណាមួយដែលអាចធ្វើឲ្យអ្នកទាំងនោះត្រូវបន្តជាប់ពន្ធនាគារអី ។ សម្តេចនាយករដ្ឋមន្ត្រីបានបញ្ជាក់ថា ការលើកលែងទោស និងដោះលែងក្រៅឃុំកន្លងមក គឺមកពី «អំពើសណ្តោសប្រណីរបស់ខ្ញុំ និងការអនុវត្តនូវច្បាប់ពន្ធនាគារ» នៅកម្ពុជា ។ សម្តេចក៏បានសើចចំអកទៅលើអតីតថ្នាក់ដឹកនាំអតីតគណបក្សប្រឆាំងដែលរិះគន់ថា សម្តេចប្រើអំណាចក្នុងការដោះលែងមនុស្សមួយចំនួនថ្មីៗនេះ ដោយសម្តេចបញ្ជាក់ថា ពិតណាស់ គឺអំណាចមានតែសម្តេច គឺនៅលើចុងប៊ិចរបស់នាយករដ្ឋមន្ត្រី ជាអ្នកស្នើសុំលើកលែងទោសទៅព្រះមហាក្សត្រសម្រាប់អ្នកណាដែលសាលក្រមចូលជាស្ថាពរ ហើយព្រះមហាក្សត្រព្រះអង្គមានអំណាចថា លើកលែងទោសតាមការស្នើសុំរបស់នាយករដ្ឋមន្ត្រី ឬអត់ ។ សម្តេចក៏បានផ្តាំផ្ញើទៅអ្នកដែលត្រូវបានដោះលែងផងដែរថា កុំនិយាយអ្វីដែលធ្វើឲ្យប៉ះពាល់ដល់សិទ្ធអ្នកដ៏ទៃ ព្រោះពួកគេក៏អាចត្រូវប្រឈមមុខត្រូវចាប់ខ្លួនវិញផងដែរ ។
សូមរម្លឹកថាយ៉ាងហោចណាស់ស្ត្រីបឹងកក់៤នាក់ត្រូវបានព្រះមហាក្សត្រលើកលែងទោស និងដោះលែងក្រៅឃុំក្នុងនោះផងដែរ អ្នកអត្ថាធិប្បាយនយោបាយ គឹម សុខ និងអតីតអ្នកយកព័ត៌មានវិទ្យុអាស៊ីសេរី២រូបក៏ត្រូវបានដោះលែងឲ្យនៅក្រៅឃុំបណ្តោះអាសន្ន ៕
ចែករំលែកព័តមាននេះ