រាជធានីភ្នំពេញ ៖ ក្នុងជំនួបដាច់ដោយឡែកមួយ ដើម្បីឱ្យបានសម្រេចតាមគោលដៅបោសសម្អាតមីនឱ្យអស់ពីទឹកដីកម្ពុជាត្រឹមឆ្នាំ២០២៥ មន្ត្រីជាន់ខ្ពស់នៃអាជ្ញាធរមីនកម្ពុជា បានសុំឱ្យតំណាងអង្គការហាឡូត្រាស់ (Halo Trust) បន្តសហការ និងជួយផ្សព្វផ្សាយដើម្បីកៀរគរជំនួយសម្រាប់សកម្មភាពបោស…
រាជធានីភ្នំពេញ ៖ ក្នុងជំនួបដាច់ដោយឡែកមួយ ដើម្បីឱ្យបានសម្រេចតាមគោលដៅបោសសម្អាតមីនឱ្យអស់ពីទឹកដីកម្ពុជាត្រឹមឆ្នាំ២០២៥ មន្ត្រីជាន់ខ្ពស់នៃអាជ្ញាធរមីនកម្ពុជា បានសុំឱ្យតំណាងអង្គការហាឡូត្រាស់ (Halo Trust) បន្តសហការ និងជួយផ្សព្វផ្សាយដើម្បីកៀរគរជំនួយសម្រាប់សកម្មភាពបោស សម្អាតមីនឱ្យអស់ពីទឹកដីនៃប្រទេសកម្ពុជា ដែលត្រូវការថវិកាជាង៤០០លានដុល្លារ ។ នេះបើតាមការលើកឡើងរបស់លោកនាយឧត្តមសេនីយ៍ សែម សុវណ្ណនី អនុប្រធានទី២អាជ្ញាធរមីនកម្ពុជា កាលពីថ្ងៃទី២២ ខែសីហា ។
ក្នុងជំនួបពិភាក្សាការងារជាមួយប្រធានថ្មីនៃអង្គការហាឡូត្រាស់ប្រចាំកម្ពុជា ដែលបានធ្វើឡើងកាលពីថ្ងៃទី២២ ខែសីហា នៅមជ្ឈមណ្ឌលជាតិរក្សាសន្តិភាព លោកនាយឧត្តមសេនីយ៍ សែម សុវណ្ណនី អនុប្រធានទី២អាជ្ញាធរមីន និងជាអគ្គនាយកមជ្ឈមណ្ឌលជាតិរក្សាសន្តិភាព បានស្នើសុំទៅតំណាងអង្គការហាឡូត្រាស់ ដែលជាអង្គការអន្តរជាតិមួយចូលរួមយ៉ាងសកម្មក្នុងសកម្មភាពបោសសម្អាតមីននៅកម្ពុជា ដើម្បីបន្តសហការនិងជួយកៀរគរជំនួយក្នុងការគាំទ្រដល់សកម្មភាពបោសសម្អាតមីនឱ្យអស់ពីកម្ពុជាត្រឹមឆ្នាំ២០២៥ ដែលត្រូវការថវិកា៤០៦លានដុល្លារអាមេរិក ។
លោក សែម សុវណ្ណនី បញ្ជាក់ថា «ផ្ទៃដីដែលបានបោសសម្អាតមីន និងសំណល់ជាតិផ្ទុះពីសង្គ្រាម ចាប់ពីឆ្នាំ១៩៩២មកដល់ពាក់កណ្តាល ឆ្នាំ២០១៨ មានប្រមាណ១.៨៤៦គីឡូម៉ែត្រការ៉េ ។ ដោយឡែក ផ្ទៃដីដែលសង្ស័យថានៅសល់មិនទាន់បានបោសសម្អាត គឺមានចំនួន១.៩៤៦គីឡូម៉ែត្រការ៉េ ក្នុងនោះផ្ទៃដីសង្ស័យមានមីនចំនួន៩៧០គីឡូម៉ែត្រការ៉េ និងផ្ទៃសង្ស័យថាមានគ្រាប់មិនទាន់ផ្ទុះមានចំនូន៩៧៦គីឡូម៉ែត្រការ៉េ» ។
លោក សែម សុវណ្ណនី ថ្លែងថា បច្ចុប្បន្នកម្លាំងបោសសម្អាតមីននៅកម្ពុជា គឺមានមជ្ឈមណ្ឌលសកម្មភាពកម្ចាត់មីនកម្ពុជា(CMAC)អង្គការហាឡូត្រាស់ អង្គការJMASរបស់ជប៉ុនអង្គការGMASរបស់អាល្លឺម៉ង់ និងកម្លាំងមួកខៀវរបស់មជ្ឈមណ្ឌលជាតិរក្សាសន្តិភាព ។
តាមរយៈអ្នកបកប្រែ លោក ដេមាន អូប្រាយអែន ប្រធានអង្គការហាឡូត្រាស់ប្រចាំកម្ពុជា ថ្លែងថា «ចំពោះការងារសកម្មភាពបោសសម្អាតមីននេះ គឺរាជរដ្ឋាភិបាលកម្ពុជាបានយកចិត្តទុកដាក់ខ្ពស់ និងចូលរួមគាំទ្រខ្លាំងណាស់ ជាមួយប្រតិបត្តិករបោសសម្អាតមីន ធ្វើយ៉ាងណាជំរុញ និងដាក់ផែនការច្បាស់លាស់ ដើម្បីឈានទៅសម្រេចបានតាមផែនការរបស់ខ្លួន ក្នុងឆ្នាំ២០២៥ ឱ្យអស់មីនពីទឹកដីកម្ពុជា» ។ ចំពោះបញ្ហាកៀរគររកជំនួយសម្រាប់ការគាំទ្រសកម្មភាពបោសសម្អាតមីននេះ លោកនឹងបន្តផ្សព្វផ្សាយឱ្យកាន់តែច្រើនថែមទៀត ទៅដល់ប្រទេសនានាដែលធ្លាប់បានផ្តល់ជំនួយខាងវិស័យដោះមីននេះ ។
គួរបញ្ជាក់ថា ចាប់តាំងពីឆ្នាំ១៩៧៩ រហូតមកដល់ខែពាក់កណ្តាលឆ្នាំ២០១៨ ជនរងគ្រោះដោយសារមីនមានចំនួន១០.១៤៧នាក់ ។ បច្ចុប្បន្ន កម្លាំងបោសសម្អាតមីនគឺបង្វែរទិសទៅធ្វើការបោសសម្អាតមីននៅតាមបណ្តោយព្រំដែនកម្ពុជា-ថៃវិញ ដោយសារតំបន់នោះគឺមានគ្រាប់មីនដែលកប់ក្នុងដីច្រើន និងជួយរំដោះដីដែលមានគ្រាប់មីននេះទៅជាដីដែលអាចធ្វើស្រែចម្ការបានវិញ ដែលមានខេត្តប៉ៃលិន បាត់ដំបង ព្រះវិហារ បន្ទាយមានជ័យ និងឧត្តរមានជ័យ ៕
ចែករំលែកព័តមាននេះ