ខេត្តបន្ទាយមានជ័យ ៖ បុរសម្នាក់ទៅបង់សំណាញ់បែរជាសំណាញ់ទាក់ដៃជាមួយខ្សែសម្រាប់ទាញ ធ្លាក់ទឹក ដែលកំពុងហូរខ្លាំង លុះជិត១ម៉ោងទើបរកឃើញ បង្កការភ្ញាក់ផ្អើលដល់អ្នកនេសាទត្រី ។ ហេតុការនេះបានកើតឡើងនៅចំណុចអូរខៃដន ក្នុងភូមិសុខសាន្ត…
ខេត្តបន្ទាយមានជ័យ ៖ បុរសម្នាក់ទៅបង់សំណាញ់បែរជាសំណាញ់ទាក់ដៃជាមួយខ្សែសម្រាប់ទាញ ធ្លាក់ទឹក ដែលកំពុងហូរខ្លាំង លុះជិត១ម៉ោងទើបរកឃើញ បង្កការភ្ញាក់ផ្អើលដល់អ្នកនេសាទត្រី ។ ហេតុការនេះបានកើតឡើងនៅចំណុចអូរខៃដន ក្នុងភូមិសុខសាន្ត សង្កាត់និមិត្ត ក្រុងប៉ោយប៉ែត នៅរសៀលថ្ងៃទី២២ សីហា ២០១៨ ។
ជនរងគ្រោះឈ្មោះ វី អាយុ២១ឆ្នាំ មានទីលំនៅភូមិ -សង្កាត់ផ្សារកណ្តាល ក្រុងប៉ោយប៉ែត ។
លោក ម៉ា រិន នាយប៉ុស្តិ៍រដ្ឋបាលនគរបាលសង្កាត់និមិត្តប្រាប់ថា នៅវេលាម៉ោង១៣និង១០នាទី ជនរងគ្រោះបានទៅបង់សំណាញ់លើខ្នងប្រឡាយបង្ហូរទឹកខាងកើតជាប់អាងអូរខៃដនក្នុងភូមិកើតហេតុ ។
លោកបន្តថា ពេលជនរងគ្រោះគ្រវាត់សំណាញ់ទៅក្នុងទឹក ស្រាប់តែខ្សែសម្រាប់ទាញស្រាវសំណាញ់មកវិញ បែរជារមូរ ហើយចៃដន្យសំណាញ់ក៏ទាក់ដៃទៀត ធ្វើឲ្យជនរងគ្រោះធ្លាក់ទៅក្នុងទឹកដែលកំពុងហូរខ្លាំងកួចយកទៅបាត់ ។ លោកបន្តថា ភ្លាមៗអ្នករកត្រីខ្លះបានចុះជួយ រកតែមិនឃើញ ទាល់តែគេបិទមុខទឹកបង្ហៀរតិចៗទឹកស្រកទើបនៅម៉ោង២និង២០នាទីរសៀល ថ្ងៃដដែលរកឃើញជនរងគ្រោះត្រូវសំណាញ់រុំជាប់ដូចបាល់ស្លាប់បាត់បង់ជីវិតទៅហើយ ។
ក្រោយមកសពត្រូវបានប្រគល់ជូនគ្រួសារយកទៅលំនៅដ្ឋាន ដើម្បីធ្វើបុណ្យតាមប្រពៃណី ។ លោកមេប៉ុស្តិ៍បញ្ជាក់ថា ដោយព្រួយបារម្ភពីករណីខាងលើ ខ្លាចកើតមានជាថ្មី លោកទទួលបទបញ្ជាពីលោកវរសេនីយឯក ធិន ស៊ិនដេត អធិការនគរបាលក្រុងចុះអប់រំពលរដ្ឋ ពិសេសក្មេងៗដែលចុះលេងតាមមុខទឹកហូរនានាជាច្រើនកន្លែង ក្នុងមូលដ្ឋាន ដើម្បីឲ្យមានការប្រុងប្រយ័ត្ន ៕
ចែករំលែកព័តមាននេះ