ខេត្តកណ្តាល ៖ ក្រុមស្ទាវបង្កអសន្តិសុខនៅលើដងផ្លូវ ត្រូវបាននគរបាលក្រុងតាខ្មៅ សហការជាមួយ ប្រជាពលរដ្ឋ ធ្វើការឃាត់ខ្លួនបានភ្លាមៗ ខណៈដែលក្រុមទាំងនោះបានធ្វើសកម្មភាពជិះម៉ូតូ ដេញជនរងគ្រោះបំបុកពីក្រោយ ដោយសារជនរងគ្រោះគប់ដុំថ្មទៅលើក្រុមខ្លួន។ ហេតុការណ៍គួរឲ្យភ្ញាក់ផ្អើលនេះ បានកើតឡើងនៅថ្ងៃទី២២ សីហា ២០១៨ វេលាម៉ោង១ និង២០នាទីរសៀល នៅចំណុចរង្វង់មូលតាខ្មៅ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។
លោកវរសេនីយ៍ ស កែវពិសិដដ្ឋ អធិការនគរបាលក្រុងតាខ្មៅ បានឲ្យដឹងថា ជនរងគ្រោះឈ្មោះ ប៉ែន រិទ្ធារាជ្យ ភេទប្រុស អាយុ១៨ឆ្នាំ មានទីលំនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល។ មុខរបរសិស្ស (រងរបួសបាក់ធ្មេញ១ និងរយះបបូរមាត់)។ ជនល្មើសមានគ្នា៤នាក់ទី០១-ឈ្មោះ ស្លេះ រុំម៉ាលី ភេទប្រុស អាយុ១៧ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរកម្មកររោងចក្រ ។
ទី០២-ឈ្មោះ លាស់ ខរី ភេទប្រុស អយុ១៨ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាកដ ទី០៣-ឈ្មោះ អាលី មីហ្សាន ភេទប្រុស អាយុ១៧ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរកម្មកររោងចក្រ និងទី០៤-ឈ្មោះ ម៉ាត់ ស្មាអ៊ែល ភេទប្រុស អាយុ១៥ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាកដ។
លោកអធិការបានឲ្យដឹងថា នៅមុនពេលកើតហេតុ ក្រុមជនល្មើសកំពុងតែអង្គុយលេងលើម៉ូតូ នៅចំណុចអ្នកតាថៃជឺ មាត់ទន្លេ ស្រាប់តែជនរងគ្រោះបានជិះម៉ូតូមកគប់ក្រុមជនល្មើស ធ្វើឲ្យជនល្មើសខឹងក៏បានជិះម៉ូតូដេញតាមដល់កន្លែងកើតហេតុខាងលើ ស្រាប់តែជនល្មើសជិះម៉ូតូបុកម៉ូតូ ជនរងគ្រោះពីក្រោយធ្វើឲ្យម៉ូតូទាំងពីរជ្រុលចង្កូតទៅបុកខឿនលោកតាម៉ៅដួលបោកទាំងសងខាង។
បន្ទាប់មកជនល្មើសក៏ស្ទុះទៅទាត់ធាក់ជនរងគ្រោះបន្ថែមទៀតបណ្តាលឲ្យរងរបួសបាក់ធ្មេញ និងរយះបបូរមាត់ ហើយត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យកាល់ម៉ែត្រ តែដោយសារជនរងគ្រោះរបួសគ្រាំក្នុងធ្ងន់ធ្ងរពេកមិនអាចសង្គ្រោះបានក៏បានចាច់ខ្យល់ស្លាប់តែម្តង។ រីឯជនល្មើសត្រូវបានសមត្ថកិច្ចធ្វើឃាត់ខ្លួនបញ្ជូនមកកាន់អធិការដ្ឋាននគរនបាលក្រុងតាខ្មៅ ដើម្បីចាត់ការតាមនីតិវិធី៕
ចែករំលែកព័តមាននេះ