ខេត្តកំពង់ធំ ៖ បុរសម្នាក់លង់ទឹកស្លាប់បានបង្កឱ្យមានការភ្ញាក់ផ្អើលកាលពីរសៀលថ្ងៃទី២១ ខែសីហា ឆ្នាំ២០១៨ ស្ថតនៅក្នុងភូមិបាឡត ឃុំពាមបាង ស្រុកស្ទោង ខេត្តកំពង់ធំ។
ជនរងគ្រោះដែលស្លាប់ខាងលើឈ្មោះ ម៉ន មែន ភេទប្រុស អាយុ៣១ឆ្នាំ នៅភូមិជីមាស ឃុំម្សាក្រង ស្រុកស្ទោង ។
តាមការបំភ្លឺរបស់ឈ្មោះ ផាន់ ជា ភេទប្រុស អាយុ៤៨ឆ្នាំ នៅភូមិបាឡត ឃុំពាមបាង បានប្រាប់ឱ្យដឹងថា កាលពីវេលាម៉ោងប្រហែលជា១២ថ្ងៃត្រង់ថ្ងៃទី២១ សីហា ជនរងគ្រោះបានទៅដាក់លបជាមួយនឹងឈ្មោះ អ៊ាន អ៊ុច ភេទប្រុស នៅចំណុចមាត់ទន្លេក្នុងភូមិបាឡត ពេលដាក់លបនោះជនរងគ្រោះនៅលើទូក ចំណែកឈ្មោះ អ៊ាន អ៊ុច ជាអ្នកពាក់បំពង់អ៊ុកស៊ីហ្សែនចុះក្នុងទឹកដើម្បីដាក់លប ពីព្រោះគេមានជំនាញខាងហ្នឹង លុះពេលដាក់លបរួច ឈ្មោះ អ៊ាន អ៊ុច ក៏បានឡើងពីទឹកមកលើទូកវិញ ពេលនោះជនរងគ្រោះក៏សុំឈ្មោះ អ៊ាន អ៊ុច ដើម្បីពាក់បំពង់អ៊ុកស៊ីហ្សែនចុះមុជទឹកម្តងសាកមើល (ជនរងគ្រោះមិនធ្លាប់ពាក់បំពង់អ៊ុកស៊ីហ្សែនមុជទឹកនោះទេ) ។
ប្រភពដដែលបានបន្តថា ពេលនោះឈ្មោះ អ៊ាន អ៊ុច ក៏ឱ្យជនរងគ្រោះសាកពាក់បំពង់អ៊ុកស៊ីហ្សែនចុះមុជទឹក ក្រោយពីជនរងគ្រោះចុះទៅក្នុងទឹកបានមួយសន្ទុះ មិនឃើញមានពពុះទឹកពីក្រោមទឹកមក ឈ្មោះ អ៊ាន អ៊ុច ក៏ចុះមុជទៅតាមនិងទាញជនរងគ្រោះចេញពីក្នុងទឹក ពេលនោះជនរងគ្រោះបានសន្លប់បាត់ស្មារតីទៅហើយ តែនៅមានដង្ហើមនៅឡើយ ក៏ដឹកជនរងគ្រោះមកផ្ទះនៅភូមិបាឡតដើម្បីជួយសង្គ្រោះដែរ តែជនរងគ្រោះនៅតែនិយាយមិនកើត មិនទាន់ដឹងខ្លួនដដែល ក៏បានហៅរថយន្តសង្គ្រោះមកដឹកយកទៅសង្គ្រោះនៅមន្ទីពេទ្យដែរ តែពេលរថយន្តសង្គ្រោះមកដល់មិនទាន់បានលើកដាក់លើរថយន្តផង ស្រាប់តែជនរងគ្រោះបានស្លាប់បាត់តែម្តង។
ពេលទទួលបានពត៌មានភ្លាម សមត្ថកិច្ច គ្រូពេទ្យ និងអាជ្ញាធរ ភូមិ ឃុំ ចុះទៅដល់ ផ្ទះជនរងគ្រោះដើម្បីធ្វើការពិនិត្យសព រកឃើញថា ជនរងគ្រោះពិតជាស្លាប់ដោយសារលង់ទឹកពិតប្រាកដមែន ពុំមានស្លាកស្នាមអ្វីផ្សេងនោះទេ ក៏ប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕
ចែករំលែកព័តមាននេះ