រាជធានីភ្នំពេញ ៖ អ្នកសារព័ត៌មានជាច្រើនស្ទើរតែគ្រប់ស្ថាប័នផ្សព្វផ្សាយព័ត៌មានទាំងជាតិ និងអន្តរជាតិដែលមិត្តរួមអាជីពបានសម្តែងការសារទ ចំពោះអតីតបុគ្គលិកវិទ្យុអាស៊ីសេរី ដែល ត្រូវបានតុលាការក្រុងភ្នំពេញដោះលែងឲ្យមានសេរីវិញ ។
ការដោះលែងអតីតបុគ្គលិកវិទ្យុអាស៊ីសេរីនេះបានធ្វើឲ្យពួកគាត់ទាំងពីរនាក់បានជួបជុំក្រុមគ្រួសារដែលបានបែកគ្នាអស់រយៈពេលជាច្រើនខែមកនោះ បានធ្វើឲ្យមានការភ្ញាក់ផ្អើលពេញបណ្តាញសង្គមហ្វេសប៊ុកយ៉ាងខ្លាំង ពិសេសនោះការអបអរសារទពីមិត្តរួមអាជីពអ្នកសារព័ត៌ មានតែម្តង ។
បុគ្គលិកវិទ្យុអាស៊ីសេរីលោក ទិន ហ្សាការីយ៉ា ដែលកំពុងរស់នៅក្រៅប្រទេសបានសរសេរលើកបណ្តាញសង្គមហ្វេសប៊ុកផ្ទាល់ខ្លួនយ៉ាងដូច្នេះថា «ទោះបីជាការអបអររបស់ពួកយើងកំពុងកំដររឿងអយុត្តិធម៌…ហើយរំភើបនឹងជនរងគ្រោះទទួលបានការអនុគ្រោះ ពីតុលាការអយុត្តិធម៌ដូច្នេះក្តីក៏ជារឿងល្អណាស់ដែលអ្នកទាំងពីរមានសេរីភាពវិញ ខ្ញំពិតជានឹកអ្នកទាំង ពីរ និងចង់ទទួលការអបអរនេះ ដោយផ្ទាល់ដូចអ្នករាល់គ្នាដែរ សង្ឃឹមថា យើងនឹងបានជួ បគ្នាវិញនៅថ្ងៃណាមួយមិនខាន…។
ដោយឡែកលោក ជា រិទ្ធីអតីតបុគ្គលិកសារព័ត៌មានថ្មី ហើយក៏ជាម្ចាស់ស្នាមមេដាយមួយក្នុងចំណោមអ្នកសារព័ត៌មានជាច្រើនដែលផ្តិតមេដាយ ដើម្បីស្នើសុំឲ្យតុលាការដោះលែងអតីតបុគ្គលិកវិទ្យុអាស៊ីសេរីទាំងពីរូបបានលើកឡើងថា «រឿងសប្បាយចិត្តបំផុតរបស់ខ្ញុំសម្រាប់ថ្ងៃ នេះ ។ ពួកខ្ញំរំពឹងទុកយូរហើយ និងតែងស្នើសុំឲ្យដោះលែងបងៗទាំងពីរឲ្យជួបជុំកូនប្រពន្ធវិញ ។ ចូលរួមត្រេកអរជាមួយបងទាំងពីរ និងក្រុមគ្រួសារ ។ ជួបបងទាំងពីរឆាប់ៗនេះ» ។
ចំណែកលោក សូ វិសាលបុគ្គលិកកាសែតភ្នំពេញប៉ុស្តិ៍ក៏បានលើកឡើងថា អតីតអ្នកយ ក ព័ត៌មានវិទ្យុអាស៊ីសេរី២រូប គឺលោក អ៊ួន ឈិន និងលោក យាង សុជា មេត្តាត្រូវបានដោះ លែងឲ្យនៅក្រៅឃុំបណ្តោះអាសន្នពីពន្ធនាគារព្រៃសវិញហើយ នៅយប់ថ្ងៃទី២១ ខែសីហា ឆ្នាំ២០១៨នេះផងដែរ ។
លោកបញ្ជាក់ថា «ឃើញបងឈិន និងប្អូនសុជាមេត្តា ត្រូវគេដោះលែងបានជួបជុំកូនបែជារំជួលចិត្តចង់ស្រក់ទឹកភ្នែក ពីព្រោះតែដឹងច្បាស់ពីទំហំទឹកចិត្តនឹករឭករបស់ឪពុកចំពោះកូន…!» ។
លោកបញ្ជាក់បន្ថែមថា «ការដោះលែងនេះធ្វើឡើងតែមួយថ្ងៃប៉ុណ្ណោះ បន្ទាប់ពីមានការដោះលែងអ្នកស្រី ទេព វន្នី សកម្មជនដីធ្លីនៅតំបន់បឹងកក់ កាលពីពាក់កណ្តាលយប់ថ្ងៃទី២០ ខែ សីហា ឆ្នាំ២០១៨ ដែលការដោះលែងនេះក៏ធ្វើឡើងបន្ទាប់ពីមានការដោះលែងអ្នកវិភាគ លោក គឹម សុខ កាលពីថ្ងៃទី១៧ ខែសីហា ឆ្នាំ២០១៨ ។
សូមជម្រាបមិនត្រឹមតែអ្នកសារព័ត៌មាននោះ ដែលអបអរសាទចំពោះការដោះលែងឲ្យសេរីភាពវិញ អតីតបុគ្គលិកវិទ្យុអាស៊ីសសេរីទាំងពីរូបនេះក៏មានអ្នកនយោបាយ សកម្មជនគណប ក្សនយោបាយបណ្តាអង្គការសង្គមស៊ីវិលជាតិ និងអន្តរជាតិជាច្រើនរូប ។
បញ្ជាក់ថា លោក អ៊ួន ឈិន និងលោក យាង សុធារិន ហៅយាង សុជាមេត្តា ត្រូវបានតុលាការបង្គាប់ឲ្យឃុំខ្លួនដាក់ពន្ធនាគារដែលរហូតមកដល់ពេលនេះ មានរយៈពេលជាង៨ខែ មកហើយ ក្រោមបទចោទប្រកាន់ «ប្រគល់ឲ្យរដ្ឋបរទេសនូវព័ត៌មានជាអាទិ៍ដែលនាំឲ្យអន្ដរាយដល់ការការពារជាតិប្រព្រឹត្តនៅប្រទេសកម្ពុជា កាលពីអំឡុងឆ្នាំ២០១៧ តាមបញ្ញត្តិ មាត្រា៤៤៥ នៃក្រមព្រហ្មទណ្ឌ» ។
គួរបញ្ជាក់ផងដែរថា អ្នកយកព័ត៌មានទាំង២រូបនេះ ក្រៅពីបទចោទប្រកាន់រឿងចារកម្មនោះ ពួកគេក៏ត្រូវបានតុលាការចោទប្រកាន់នូវសំណុំរឿងមួយទៀត គឺ«ការផលិតវីដេអូអាសអាភាស» ផងដែរ ។ អតីតបុគ្គលិកវិទ្យុអាស៊ីសេរីទាំង២រូបនេះ ត្រូវបានអាជ្ញាធរឃាត់ខ្លួន កាលពីយប់ថ្ងៃទី១៤ ខែវិច្ឆិកា ឆ្នាំ២០១៧ នៅផ្ទះសំណាក់មួយឈ្មោះម៉ារ៉ាឌី ស្ថិតក្នុងរាជធានីភ្នំពេញ ៕
ចែករំលែកព័តមាននេះ