ប្រទេសឥណ្ឌា ៖ បើតាមអាជ្ញាធររដ្ឋ KERALA ភាគខាងត្បូងប្រទេសឥណ្ឌា បានរាយការណ៍នាថ្ងៃទី២១ ខែសីហា នេះថា មនុស្សជាង១លាននាក់ បច្ចុប្បន្នត្រូវបានភៀសខ្លួនមកកាន់ជំរំនានា ពេលរដ្ឋនោះជួបប្រទះនឹងគ្រោះទឹកជំនន់យ៉ាងអាក្រក់បំផុត មកពីភ្លៀងធ្លាក់ខ្លាំង ដែលបណ្ដាលឲ្យមនុស្សស្លាប់ឡើងដល់៤២០នាក់ហើយ។
ពេលនេះទឹកចាប់ផ្ដើមស្រកចុះវិញបន្តិចម្ដងៗក្រោយជន់លិចយ៉ាងខ្លាំង ខណៈភ្លៀងចុះថយរយៈពេលប៉ុន្មានថ្ងៃចុងក្រោយនេះនេះ។ ចំណែកទំហំនៃការបំផ្លិចបំផ្លាញក្នុងរដ្ឋនេះពិតជាធំធេងណាស់ ហើយចំនួនមនុស្សស្ថិតនៅក្នុងជំរំមានរហូតដល់១.០២៨.០០០នាក់ឯណោះ។ រីឯពួកអ្នកជួយសង្គ្រោះនាថ្ងៃទី២១ សីហា បានរកឃើញសាកសពមនុស្សថ្មី៨នាក់ទៀត ធ្វើឲ្យតុល្យការអ្នកស្លាប់ឡើងដល់៤២០នាក់ តាំងពីដើមខែមិថុនាមក។
ប្រទេសអេមីរ៉ាត់អារ៉ាប់រួម កាលពីថ្ងៃទី២១ សីហា បានសន្យាផ្ដល់ជំនួយ១០០លានដុល្លារ។ ហើយនាយករដ្ឋមន្ត្រីនៃរដ្ឋ KERALA បានស្នើសុំជំនួយពីរដ្ឋាភិបាន៣៧៥លានដុល្លារ ដោយអះអាងថា ការខូចខាតមានដល់ទៅប្រមាណជា៣ពាន់លានដុល្លារឯណោះ។
ប្រតិបត្តិការជួយសង្គ្រោះពេលនេះផ្ដោតក្នុងបណ្ដាតំបន់រងការប៉ះពាល់ខ្លាំងបំផុត ដូចជាទីក្រុង CHENGANNUR ដែលភ្លៀងបន្តធ្លាក់នៅឡើយ។ យោងតាមកងទ័ពថា មនុស្សច្រើនពាន់នាក់ជាប់នៅក្នុងផ្ទះដែលទឹកជន់លិចចាប់តាំងពី១០ថ្ងៃមកហើយ៕
ចែករំលែកព័តមាននេះ