ម្ចាស់មេដាយមាសកីឡា Asian Games 2014 កីឡាការិនីស៊ន សៀវម៉ី មិនអាចការពារមេដាយមាសរបស់ខ្លួនបានឡើយ បន្ទាប់ពីចាញ់កីឡាការិនីវ័យក្មេងអ៊ូសប៉េគីស្ថានដោយពិន្ទុ៥-៣វគ្គ៨នាក់ចុងក្រោយក្នុងព្រឹត្តិការណ៍កីឡាAsian Games 2018…
ម្ចាស់មេដាយមាសកីឡា Asian Games 2014 កីឡាការិនីស៊ន សៀវម៉ី មិនអាចការពារមេដាយមាសរបស់ខ្លួនបានឡើយ បន្ទាប់ពីចាញ់កីឡាការិនីវ័យក្មេងអ៊ូសប៉េគីស្ថានដោយពិន្ទុ៥-៣វគ្គ៨នាក់ចុងក្រោយក្នុងព្រឹត្តិការណ៍កីឡាAsian Games 2018 នៅប្រទេសឥណ្ឌូណេស៊ី។
ការប្រកួតវគ្គ៨នាក់ចុងក្រោយនេះ វីរកីឡាការិនីកម្ពុជាផ្នែកតេក្វាន់ដូ ស៊ន សៀវម៉ី ត្រូវកីឡាការិនីវ័យក្មេងសញ្ជាតិអ៊ូសប៉េគីស្ថានឈ្មោះ Osipova Svetlana នាំមុខដោយពិន្ទុ២-០ ក្នុងទឹកទី១ លុះចូលទឹកទី២នាងបាននាំមុខ ៣-០វិញ ។ ប៉ុន្តែគួរឱ្យស្ដាយសម្រាប់ការប្រកួតក្នុងទឹកទី៣ដែលជាទឹកបញ្ចប់ ស៊ន សៀវម៉ី បែរជាភ្លាត់ស្នៀតបណ្ដាលឱ្យគូប្រកួតដណ្ដើមបាន៣ពិន្ទុវិញ ធ្វើឱ្យចប់ការប្រកួតនាងត្រូវចាញ់ដោយលទ្ធផល៥-៣ ។
ចំណែកកីឡាការិនីអ៊ូសប៉េគីស្ថានដែលទើបមានវ័យ១៨ឆ្នាំ បទពិសោធន៍ប្រកួតលើឆាកអន្តរជាតិក៏មានមិនច្រើនប៉ុន្មានដែរនោះបានឡើងទៅវគ្គពាក់កណ្តាលផ្តាច់ព្រ័ត្រដោយ
រីករាយ។
ការបរាជ័យរបស់ស៊ន សៀវម៉ី ពេលនេះគេមិនទាន់ដឹងថា តើក្រុមអត្តពលិកកម្ពុជាអាចដណ្ដើមមេដាយមាសឱ្យបានលើសពី២តាមការគ្រោងទុកឬយ៉ាងណាទេ ? ទោះបីយ៉ាងណា កម្ពុជាមិនអស់សង្ឃឹមក្នុងការប្រជែងយកមេដាយនៅឡើយទេ ព្រោះក្រៅពីតេក្វាន់ដូ នៅមានអត្តពលិក៣ប្រភេទកីឡាទៀតដែលកម្ពុជារំពឹងឈ្នះមេដាយ គឺកីឡាជឺជិតស៊ូ ម៉ូតូទឹក និងកីឡាសូហ្វតេន្នីស។
សូមបញ្ជាក់ថា កម្ពុជាបានបញ្ជូនអត្តពលិកចំនួន១៣ប្រភេទកីឡាទៅចូលរួមប្រកួតក្នុងព្រឹត្តិការណ៍កីឡាប្រចាំទ្វីបអាស៊ី៤ឆ្នាំម្ដងនេះប៉ុន្ដែក្នុងនោះមានតែកីឡា៤ប្រភេទប៉ុណ្ណោះដែលថ្នាក់ដឹកនាំកីឡាកម្ពុជារំពឹងដណ្ដើមមេដាយមាសជូនជាតិ រួមមានកីឡាតេក្វាន់ដូ និងកីឡា៣ប្រភេទខាងលើ ។ នេះបើតាមការបញ្ជាក់របស់លោក ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា មុនលោកដឹកនាំប្រតិភូ និងអត្តពលិកម្ពុជា ចេញទៅប្រកួតកីឡា Asian Games លើកទី១៨ នៅប្រទេសឥណ្ឌូណេស៊ីកាលពីពេលថ្មីៗ។
ដោយឡែកកីឡាមួយចំនួនទៀត ដូចជាកីឡាតេក្វាន់ដូ ហែលទឹក ចំបាប់ គុនដាវ និងកាយសម្ព័ន្ធបានធ្លាក់ជាបន្ដបន្ទាប់ ពោលគឺគិតត្រឹមរសៀលថ្ងៃទី២១ ខែសីហានេះ កម្ពុជានៅមិនទាន់រកបានមេដាយអ្វីនោះទេ ស្របពេលកីឡាការ៉ាតេដូ យូដូ ទូកក្ដោង ទូកកានូ និងអត្តពលកម្ម មិនទាន់បានប្រកួតនោះទេ ហើយគ្រោងចេញដំណើរពីកម្ពុជាតាមកម្មវិធីប្រកួតរៀងៗខ្លួនជាបន្ដបន្ទាប់ ចាប់ពីថ្ងៃទី២២ រហូតដល់ថ្ងៃទី២៧ ខែសីហាខាងមុខ គ្រាដែលព្រឹត្តិការណ៍កីឡា៤ឆ្នាំម្ដងនេះ គ្រោងនឹងបញ្ចប់នៅថ្ងៃទី២ ខែកញ្ញា ឆ្នាំ២០១៨៕
ចែករំលែកព័តមាននេះ