រាជធានីភ្នំពេញ ៖ បុរសប្រាំនាក់បានចូលទៅរាំលេងកម្សាន្តនៅក្នុងក្លឹបកម្សាន្ត ហ្ស៊ូក ស្រាប់តែមានសន្តិសុខដែលយាមកាមនៅក្នុងក្លឹបប្រើអំពើហិង្សា ហេតុការណ៍នេះកើតឡើង កាលពីវេលាម៉ោង១រំលងអធ្រាត្រឈានចូលថ្ងៃទី២២ ខែសីហា ឆ្នាំ២០១៨ ត្រង់ចំណុចក្នុងក្លឹបកម្សាន្ត…
រាជធានីភ្នំពេញ ៖ បុរសប្រាំនាក់បានចូលទៅរាំលេងកម្សាន្តនៅក្នុងក្លឹបកម្សាន្ត ហ្ស៊ូក ស្រាប់តែមានសន្តិសុខដែលយាមកាមនៅក្នុងក្លឹបប្រើអំពើហិង្សា ហេតុការណ៍នេះកើតឡើង កាលពីវេលាម៉ោង១រំលងអធ្រាត្រឈានចូលថ្ងៃទី២២ ខែសីហា ឆ្នាំ២០១៨ ត្រង់ចំណុចក្នុងក្លឹបកម្សាន្ត ហ្ស៊ូក ក្លឹប តាមបណ្តោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
បើតាមសម្តីពីបុរសម្នាក់ឈ្មោះ ងែត ចំរើន អាយុ៣២ឆ្នាំ ជាបុគ្គលិកក្រុមហ៊ុនឯកជនបានរៀបរាប់ប្រាប់ឲ្យដឹងថា នៅមុនពេលកើតហេតុរូបគាត់ និងប្រពន្ធរួមទាំងមិត្តភក្តិប្រុសៗបួននាក់ទៀត បាននាំគ្នាមកចូលរាំលេងកម្សាន្តនៅក្នុងក្លឹបកើតហេតុខាងលើ យ៉ាងសប្បាយរីករាយ ។ លុះដល់វេលាកើតហេតុ ខណៈពេលដែលពួកគាត់កំពុងតែរាំលេង ក៏ស្រាប់តែមានសន្តិសុខដែលយាមនៅក្នុងក្លឹបខាងលើ បួនទៅប្រាំនាក់ បានដើរមកចាប់ក្រៀកមិត្តភក្តិប្រុសរបស់គាត់ ចំនួន៣នាក់ នៅកន្លែងស្ងាត់ ដោយមិនដឹងមូលហេតុអ្វី ។ ពេលនោះដោយគាត់ឆ្ងល់ និងសន្តិសុខទាំងនោះក៏បានដើរទៅសួរថា មានរឿងអ្វី ? ភ្លាមៗនោះបែរជាត្រូវសន្តិសុខទាំងនោះចាប់ក្រៀករូបគាត់ ហើយវាយរូបគាត់មួយដៃចំទ្រូង ហើយគាត់ក៏បានបម្រាស់ខ្លួនរត់ចេញមកខាងក្រៅតែម្នាក់ឯង ដើម្បីយករួចខ្លួនសិន ។
ខណៈពេលដែលចេញមកដល់ខាងក្រៅគាត់ក៏បានរាយការណ៍ជូនសមត្ថកិច្ចមូលដ្ឋានឲ្យចុះមកជួយអន្តគមន៍ ព្រោះមិត្តភក្តិគាត់ចំនួនបីនាក់ត្រូវបានសន្តិសុខយាមក្លឹបខាងលើចាប់ឃាត់ទុកនៅខាងក្នុងមិនឲ្យចេញមកខាងក្រៅនោះទេ ។
មួយសន្ទុះក្រោយមកក៏ឃើញមានសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលភ្នំពេញថ្មីចំនួន២នាក់ បានចុះមកកន្លែងកើតហេតុ ។ ហើយបានជិះម៉ូតូចេញទៅវិញដោយមិនមានចំណាត់ការអ្វីនោះទេ ។ ខណៈពេលនោះដែរក៏មានភាគីខាងក្លឹបកម្សាន្តខាងលើបានទូរស័ព្ទទាក់ទងមកគាត់ឲ្យចូលទៅដោះស្រាយគ្នានៅខាងក្នុងក្លឹប តែគាត់មិនព្រមចូលទៅនោះទេ ព្រោះដោយគ្មានសមត្ថកិច្ចមូលដ្ឋានចូលរួមជាមួយ ។ គឺគាត់បានត្រឹមតែឈរនៅខាងក្រៅក្លឹបដោយគ្មានសមត្ថកិច្ចរូបណាមកអន្តរាគមន៍នោះទេ ។
ដោយឡែកចំពោះករណីខាងលើនោះ គឺមិនមានដំណាងភាគីខាងក្លឹបកម្សាន្តម្នាក់ណាចេញមកបញ្ជាក់ឲ្យបានដឹងពីរឿងហេតុនោះទេ ។ អស់រយៈពេលជាងមួយម៉ោងក្រោយមកក៏ឃើញកម្លាំងកងរាជអាវុធហ្ថតខណ្ឌសែនសុខចុះមកកន្លែងកើតហេតុ ។
ក្រោយពេលកើតហេតុកម្លាំងកងរាជអាវុធហ្ថតក៏បាននាំបុរសខាងលើ និងមិត្តភក្តិចំនួនបីនាក់របស់បុរសខាងលើចេញពីក្នុងក្លឹបយកទៅសាកសួរនាំនៅកងរាជអាវុធហ្ថតខណ្ឌសែនសុខ ដើម្បីធ្វើការដោះស្រាយគ្នាជាមួយ និងភាគីខាងក្លឹបកម្សាន្ត ហ្ស៊ូក ក្លឹបខាងលើ ៕
ចែករំលែកព័តមាននេះ