រាជធានីភ្នំពេញ ៖ ស្ត្រីជាអាជីវករលក់សាច់ជ្រូកម្នាក់ បានត្រូវក្រុមចោរប្រដាប់អាវុធប្លន់យកម៉ូតូ ខណៈជិះម៉ូតូទៅទិញសាច់ជ្រូក កាលពីវេលាម៉ោង៤ទៀបភ្លឺថ្ងៃទី២១ ខែសីហា នៅខាងកើតសាលាឃុំប្រមាណ១០០ម៉ែត្រ តាមផ្លូវលេខ២០១១ ក្នុងសង្កាត់ក្រាំងធ្នង់ ខណ្ឌសែនសុខ ។
ជនរងគ្រោះឈ្មោះ ស៊ី ណាត់ អាយុ២៥ឆ្នាំ ស្នាក់នៅក្នុងបុរីមហាសែនសុខ ស្ថិតក្នុងសង្កាត់ក្រាំងធ្នង់ ។បើតាមជនរងគ្រោះរៀបរាប់ថា នាវេលាទៀបភ្លឺនោះ គាត់បានជិះម៉ូតូមួយគ្រឿងម៉ាកហុងដាស្គូពី ពណ៌ខ្មៅ ពាក់ផ្លាកលេខ ភ្នំពេញ១CC-៥០២៦ ទៅទិញសាច់ជ្រូកនៅផ្សារដីហុយ ដើម្បីយកមកលក់ ដោយធ្វើដំណើរតាមផ្លូវលេខ២០១១ពីខាងលិចទៅខាងកើត ។ ខណៈនោះស្រាប់តែមានជន៤នាក់ជិះម៉ូតូ២គ្រឿង មួយគ្រឿងម៉ាកស៊ុយហ្សុ៊យគីណិច និងមួយគ្រឿងទៀតម៉ាកហុងដាឌ្រីម មិនចាំផ្លាកលេខ ប្រដាប់ទៅដោយដាវសាមូរ៉ៃដេញតាមពីក្រោយ ។
លុះទៅដល់ចំណុចខាងលើ ដែលមានភ្លើងភ្លឺនៅតាមមុខផ្ទះ ដោយដឹងថា មានក្រុមចោរកំពុងជិះដេញតាម គាត់ក៏ឈប់ម៉ូតូព្រោះគិតថា មានមនុស្សអាចពឹងពាក់បាន ប៉ុន្តែបែរជាគ្មានមនុស្សនៅទៅវិញ ។ ពេលនោះក្រុមចោរបានមកកាក់ម៉ូតូគាត់ ហើយដោយភ័យខ្លាំងពេកគាត់ក៏ចុះពីលើម៉ូតូប្រគល់ឱ្យតាមសម្រួល ឯក្រុមចោរក៏យកម៉ូតូឡើងជិះរត់គេចខ្លួនបាត់ស្រមោល ។
នៅក្រោមកែបម៉ូតូដែលត្រូវចោរប្លន់យកទៅនោះមាន ទូរស័ព្ទដៃចំនួន២គ្រឿង និងលុយ២០០ដុល្លារ ។
ក្រោយកើតហេតុ ស្ត្រីរងគ្រោះបានហៅប្តីឱ្យមកដឹកទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលក្រាំងធ្នង់ ដើម្បីឱ្យសមត្ថកិច្ចជួយស្រាវជ្រាវរកម៉ូតូរបស់ខ្លួនមកវិញ ៕
ចែករំលែកព័តមាននេះ