រាជធានីភ្នំពេញ ៖ ព្រឹកថ្ងៃទី២១ សីហា សាលាដំបូងរាជធានីភ្នំពេញ បានប្រកាសសាលក្រមសម្រេចផ្ដន្ទាទោសស្ត្រីម្នាក់ ដែលជួលឃាតករឱ្យសម្លាប់ប្ដីរបស់ខ្លួន និងជនដៃដល់ដាក់ពន្ធនាគារកំណត់អស់មួយជីវិត ក្រោមការចោទប្រកាន់ពីបទឃាតកម្មគិតទុកជាមុន និងបទសមគំនិតក្នុងអំពើឃាតកម្ម យោងតាមមាត្រា២៨ និងមាត្រា២០០ នៃក្រមព្រហ្មទណ្ឌ ។
ជនជាប់ចោទមាន២នាក់ ដែលម្នាក់ឈ្មោះ សូ ផា ភេទប្រុស អាយុ២៩ឆ្នាំ ជាជនដៃដល់ និងជាកូនធម៌ជនរងគ្រោះ និងម្នាក់ទៀតឈ្មោះ សៅ សំអឿន ភេទស្រី អាយុ៤៦ឆ្នាំ ជាប្រពន្ធជនរងគ្រោះ ។ រីឯជនរងគ្រោះឈ្មោះ កៅ ផា ភេទប្រុស អាយុ៥០ឆ្នាំ មុខរបរអ្នករត់តាក់ស៊ី ត្រូវបានក្រុមឃាតកររួមគំនិតគ្នាសម្លាប់ កាលពីយប់ថ្ងៃទី១១ ខែតុលា ឆ្នាំ២០១៦ ។
គួររំឭកថា កាលពីថ្ងៃទី២០ ខែតុលា ឆ្នាំ២០១៦ កម្លាំងកងរាជអាវុធហត្ថរាជធានីភ្នំពេញ បានធ្វើការស្រាវជ្រាវនិងឈានដល់ការឃាត់ខ្លួនជនសង្ស័យជាប្រពន្ធនិងកូនធម៌ជនរងគ្រោះ បន្ទាប់ពីពលរដ្ឋបានប្រទះឃើញសពជនរងគ្រោះត្រូវគេចងផ្អោបនឹងដុំថ្ម យកទៅទម្លាក់ក្នុងប្រឡាយទឹកស្អុយ នៅតាមផ្លូវលំ ខាងក្រោយសួនកាណាឌីយ៉ា ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី១៤ ខែតុលា ។
នៅពេលចាប់ខ្លួនជនជាប់ចោទឈ្មោះ សូ ផា សារភាពថា ខ្លួនពិតជាបានសម្លាប់ជនរងគ្រោះមែន ហើយការសម្លាប់នោះដោយសារឈ្មោះ សៅ សំអឿន ជាប្រពន្ធជនរងគ្រោះ ជួលខ្លួនក្នុងតម្លៃ១ពាន់ដុល្លារអាមេរិក ។ ឯជនជាប់ចោទឈ្មោះ សៅ សំអឿន ជាប្រពន្ធសារភាពថា ខ្លួនពិតជាបានជួលកូនធម៌ឱ្យសម្លាប់ប្តីមែនព្រោះខឹងយកលុយកូន ដែលខំធ្វើការនៅប្រទេសកូរ៉េចំនួន១២.០០០ដុល្លារ ទិញរថយន្តឲ្យរត់តាក់សុីទៅចិញ្ចឹមស្រីស្នេហ៍ ហើយថែមទាំងចុះចោលប្រពន្ធកូនទៀត ៕
ចែករំលែកព័តមាននេះ