រាជធានីភ្នំពេញ ៖ ក្នុងដំណើរការប្រឡងសញ្ញាបត្របាក់ឌុប២ថ្ងៃ គឺថ្ងៃទី២០-២១ ខែសីហា ឆ្នាំ២០១៨ មានបេក្ខជនអវត្តមានចំនួន១៨៩៩នាក់ ស្រី៧៤៤នាក់ ត្រូវជា១.៦៥% នៃចំនួនសិស្សចុះឈ្មោះប្រឡងសរុប១១៥២៦៨នាក់ ស្រី៥៨១៥៨នាក់ ។
នេះបើតាមប្រកាសរបស់ក្រសួងអប់រំកាលពីរសៀលថ្ងៃទី២១ ខែសីហា ដែលអ្នកសារព័ត៌មានទទួលបាន ។ មុខវិជ្ជាប្រឡងមានចំនួន៧ ចែកចេញជាថ្នាក់វិទ្យាសាស្ត្រ និងវិទ្យាសាស្ត្រសង្គម ។
ទោះបីយ៉ាងណាក្រសួងអប់រំយុវជន និងកីឡាបានអះអាងថា ដំណើរការប្រឡងឆ្នាំនេះដំណើរការបានល្អប្រសើរជាងឆ្នាំកន្លងទៅ ។ ដំណើរការសំណេរប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាបានប្រព្រឹត្រទៅពីរថ្ងៃគឺថ្ងៃទី២០-២១ ខែសីហា ឆ្នាំ២០១៨ មានបេក្ជជនចុះឈ្មោះសរុប១១៥២៦៨នាក់ ស្រី៥៨១៦៨នាក់ និងមានមណ្ឌលប្រឡង១៩៦មណ្ឌល ក្នុងនោះមណ្ឌលវិទ្យាសាស្ត្រ៩៩ និងវិទ្យាសាស្ត្រសង្គម៩៧ ត្រូវជា៤៦៥៥បន្ទប់ ។ ការប្រកាសលទ្ធផលប្រឡងនឹងគ្រោងធ្វើឡើងនៅថ្ងៃទី១១-១២ ខែកញ្ញា ឆ្នាំ២០១៨ ខាងមុខនេះ ៕
ចែករំលែកព័តមាននេះ