ខេត្តស្វាយរៀង ៖ មានការភ្ញាក់ផ្អើលដល់ប្រជាពលរដ្ឋតាមដងផ្លូវនាំគ្នាមកចោមរោមមើល ហើយបង្កការភ្ញាក់ផ្អើលដល់សមត្ថកិច្ច ខណៈដែលប្រទះឃើញសាកសពបុរសម្នាក់អណ្តែតទឹក រសាត់មកទើរជាប់កញ្ឆែតក្នុងទន្លេវ៉ៃគោ ជិតកន្លែងរថយន្តកុងតឺន័រធ្លាក់ទឹក ហើយសង្ស័យថា ជាតៃកុងរថយន្តកុងតឺន័រ។
ការប្រទះឃើញ និងបង្កឲ្យមានការភ្ញាក់ផ្អើលកើតឡើងកាលពីវេលាម៉ោង៦ និង១០នាទីល្ងាច ថ្ងៃទី២១ ខែសីហា ឆ្នាំ២០១៨ ត្រង់ចំណុចគល់ស្ពានខាងកើតឆៀងខាងជើង ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀងខេត្តស្វាយរៀង។ បើយោងតាមសមត្ថកិច្ច បានដាក់សង្ស័យថា ជាតៃកុងរថយន្តកុងតឺន័រ ដែលជួបគ្រោះថ្នាក់ចរាចរណ៍កាលពីម្សិលមិញ (ថ្ងៃទី២០ ខែសីហា) ពីព្រោះបុរសម្នាក់ដែលត្រូវសមត្ថកិច្ចឃាត់ខ្លួនកាលម្សិលមិញថា ខ្លួនជាព្រូរថយន្តទេបាត់អ្នក បើកបររថយន្ត។
ហើយនៅកន្លែងកើតហេតុក៏មានតំណាងខាងក្រុមហ៊ុនរថយន្តមកប្រាប់ថា មិនអាចទាក់ទងទៅតៃកុងដែលបើកបររថយន្តបង្កគ្រោះថ្នាក់កាលពីម្សិលមិញបាននោះដែរ។ ទោះបីជាយ៉ាងណាក៏ដោយការប្រទះឃើញសាកសពនេះ សមត្ថកិច្ចមិនទាន់ដឹងថា តើការស្លាប់របស់ជនរងគ្រោះដោយសារអ្វីនៅឡើយទេ ខណៈដែលពេលនេះសមត្ថកិច្ច បានដុតដៃដុតជើងយកសាកសពចេញពីទឹក និងទំនាក់ទំនងទៅក្រុមហ៊ុនម្ចាស់រថយន្តកុងតឺន័រ ដើម្បីរកអត្តសញ្ញាណអ្នកបើកបររថយន្តកុងតឺន័រ៕
ចែករំលែកព័តមាននេះ