រាជធានីភ្នំពេញ ៖ សាលាដំបូងរាជធានីភ្នំពេញ នៅល្ងាចថ្ងៃទី២១ ខែសីហានេះ បានសម្រេចដោះលែង ឲ្យអតីតបុគ្គលិកវិទ្យុអាស៊ីសេរី ចំនួន២នាក់ ឲ្យនៅក្រៅឃុំបណ្តោះអាសន្ន បន្ទាប់ពីឃុំខ្លួនជិតមួយឆ្នាំ…
រាជធានីភ្នំពេញ ៖ សាលាដំបូងរាជធានីភ្នំពេញ នៅល្ងាចថ្ងៃទី២១ ខែសីហានេះ បានសម្រេចដោះលែង ឲ្យអតីតបុគ្គលិកវិទ្យុអាស៊ីសេរី ចំនួន២នាក់ ឲ្យនៅក្រៅឃុំបណ្តោះអាសន្ន បន្ទាប់ពីឃុំខ្លួនជិតមួយឆ្នាំ នៅក្នុងពន្ធនាគារព្រៃស។ ជនជាប់ចោទលោក អួន ឈិន និងលោក យាង សុជាមេត្តា អតីតបុគ្គលិកវិទ្យុ អាស៊ីសេរី ត្រូវបានតំណាងអយ្យការ អមសាលាដំបូងចោទប្រកាន់ផ្លូវការ និងបញ្ជូនសំណុំរឿងទៅចៅក្រម ស៊ើបសួរ។
គួរបញ្ជាក់ថា លោក អួន ឈិន និងលោក យាង សុជាមេត្តា អតីតបុគ្គលិកវិទ្យុអាស៊ីសេរី ត្រូវបានសមត្ថកិច្ចនាំខ្លួនទៅកាន់សាលាដំបូងរាជធានីភ្នំពេញ កាលពីរសៀលថ្ងៃទី១៦ ខែវិច្ឆិកា ឆ្នាំ២០១៧ បន្ទាប់ពីត្រូវបានឃាត់ខ្លួនក្នុងផ្ទះសំណាក់ ម៉ារឌីក្នុងទីក្រុងភ្នំពេញ ដែលនគរបាលបានចោទថា សង្ស័យបទលួចលាក់បញ្ជូនទៅក្រៅប្រទេសគ្មានច្បាប់អនុញ្ញាត បន្ទាប់ពីបានពិនិត្យសំណុំរឿង រួមទាំងឆ្លងកាត់ការស្រាវជ្រាវស៊ើបអង្កេត ដោយបានពិនិត្យភស្តុតាង និងផ្ទៀងផ្ទាត់ ចម្លើយជនសង្ស័យរួចមក ព្រមទាំងយល់ឃើញថា មានមូលដ្ឋានគ្រប់គ្រាន់ឲ្យតំណាង អយ្យការអមសាលាដំបូង រាជធានីភ្នំពេញ ធ្វើការចោទប្រកាន់ដោយបើកការស៊ើបសួរ ពីបទ ប្រគល់ឲ្យរដ្ឋបរទេសនូវព័ត៌មានជាអាទិដែលបង្កឲ្យមានការអន្តរាយដល់ការការពារជាតិ។
តាមបញ្ញត្តិមាត្រា ៤៤៥ នៃក្រមព្រហ្មទណ្ឌ ព្រះរាជាណាចក្រកម្ពុជា ហើយបញ្ជូនទៅចៅក្រមស៊ើបសួរ នៃសាលាដំបូងរាជធានីភ្នំពេញ ដើម្បីចាត់ការបន្តតាមនីតិវីធី។ កាលពីថ្ងៃទី១៣ ខែវិច្ឆិកា ឆ្នាំ២០១៧ ជនជាប់ចោទត្រូវបានសមត្ថកិច្ចសន្តិសុខផ្ទៃក្នុងក្រសួងមហាផ្ទៃបានឃាត់ខ្លួននៅក្នុងផ្ទះសំណាក់ម៉ារឌី ក្នុងខណ្ឌមានជ័យ បញ្ជូនទៅកាន់ស្នងការរាជធានីភ្នំពេញ សង្ស័យបទលួចលាក់បញ្ជូនព័ត៌មានទៅបរទេសដោយខុសច្បាប់។
នៅរសៀលថ្ងៃទី១៦ ខែវិច្ឆិកា ឆ្នាំ២០១៧ ត្រូវបានបញ្ជូនទៅសាលាដំបូងរាជធានីភ្នំពេញ បន្ទាប់ពីនាំខ្លួនទៅឆែកឆេររកភស្តុតាងបន្ថែម។ ទោះបីយ៉ាងណាតាមអ្នកច្បាប់លើកឡើងយោងតាមច្បាប់កម្ពុជាជនជាប់ចោទអាចប្រឈមនឹងទោសជាប់គុកពី៧ដល់១៥ឆ្នាំ ប្រសិនជាតុលាការរកឃើញកំហុសមែន៕
ចែករំលែកព័តមាននេះ