ខេត្តព្រៃវែង ៖ ដើម្បីធានាបាននូវបរិមាណរង្វាស់រង្វាល់ និងគុណភាពនៃប្រេងសាំងនៅតាមស្ថានីយប្រេងឥន្ធនៈនីមួយៗ ក្នុងខេត្តព្រៃវែង មន្ត្រីជំនាញកាំកុងត្រូលសហការជាមួយមន្ទីរពាណិជ្ជកម្មខេត្តព្រៃវែងបានចុះត្រួតពិនិត្យស្ថានីយប្រេងឥន្ធនៈចំនួន១៩ទីតាំង នៅស្រុកស្វាយអន្ទរ និងស្រុកពាមរក៌ ដោយប្រើរយៈពេល២ថ្ងៃ គឺកាលពីថ្ងៃទី២០…
ខេត្តព្រៃវែង ៖ ដើម្បីធានាបាននូវបរិមាណរង្វាស់រង្វាល់ និងគុណភាពនៃប្រេងសាំងនៅតាមស្ថានីយប្រេងឥន្ធនៈនីមួយៗ ក្នុងខេត្តព្រៃវែង មន្ត្រីជំនាញកាំកុងត្រូលសហការជាមួយមន្ទីរពាណិជ្ជកម្មខេត្តព្រៃវែងបានចុះត្រួតពិនិត្យស្ថានីយប្រេងឥន្ធនៈចំនួន១៩ទីតាំង នៅស្រុកស្វាយអន្ទរ និងស្រុកពាមរក៌ ដោយប្រើរយៈពេល២ថ្ងៃ គឺកាលពីថ្ងៃទី២០ និង២១ សីហាកន្លងទៅនេះ ។
លោក អ៊ុត សុភាព ប្រធានសាខាកាំកុងត្រូលខេត្តព្រៃវែងដែលដឹកនាំមន្ត្រីជំនាញចុះត្រួតពិនិត្យដោយផ្ទាល់បានឲ្យដឹងថា សកម្មភាពចុះត្រួតពិនិត្យរយៈពេល២ថ្ងៃ នៅស្ថានីយប្រេងឥន្ធនៈទាំង១៩ ទីតាំងនោះជាលទ្ធផលបានរកឃើញថា មានស្ថានីយចំនួន៦បានលក់ត្រឹមត្រូវទាំងចំនួនបរិមាណ និងគុណភាព ដោយស្ថានីយចំនួន៥លក់ប្រេងសាំងមិនគ្រប់លីត្រ និង៦ស្ថានីយទៀតលក់មិនគ្រប់លីត្រ ហើយថែមទាំងបន្លំយកសាំងធម្មតាដាក់លក់ជាសាំងស៊ុបពែថែមទៀត ។
ចំណែកស្ថានីយ២កន្លែងទៀត មិនព្រមសហការជាមួយមន្ត្រីជំនាញទេ ក្នុងនោះស្ថានីយប្រេងឥន្ធនៈយីហោ ឈន់ គង់ ក្នុងស្រុកស្វាយអន្ទរ ម្ចាស់ស្ថានីយបានបដិសេធមិនឲ្យមន្ត្រីជំនាញត្រួតពិនិត្យតែម្តង និងស្ថានីយប្រេងឥន្ធនៈ យីហោ ឃី សុខជា នៅក្នុងស្រុកពាមរក៌ ពេលឃើញមន្ត្រីជំនាញចុះទៅដល់បានលួចទៅបិទភ្លើង ហើយឆ្លើយថា ភ្លើងដាច់ធ្វើឲ្យមន្ត្រីជំនាញមិនអាចពិនិត្យបានទើបមន្ត្រីជំនាញដាក់ការសង្ស័យថា ស្ថានីយទាំង២នេះលក់ប្រេងមិនគ្រប់លីត្រ ឬមានការលក់បន្លំគុណភាពប្រេងសាំង ទើបមិនព្រមឲ្យមន្ត្រីជំនាញត្រួតពិនិត្យ ។
លោក អ៊ុត សុភាព បានបញ្ជាក់ថា ចំពោះស្ថានីយដែលលក់ប្រេងសាំងមិនគ្រប់លីត្រ និងក្លែងបន្លំគុណភាពសាំងពីសាំងធម្មតាដាក់លក់ជាសាំងស៊ុបពែ លោកបានឲ្យធ្វើកិច្ចសន្យាកែប្រែ បើលើកក្រោយពិនិត្យឃើញមិនកែប្រែ លោក និងចាត់វិធានការព្រមានតាមផ្លូវច្បាប់ ។
ចំណែកស្ថានីយ២ ដែលមិនសហការក៏ត្រូវចាប់បង្ខំឲ្យចុះកិច្ចសន្យាដែរ បើលើកក្រោយនៅតែមិនសហការមន្ត្រីជំនាញ និងដាក់ពាក្យប្តឹងទៅតុលាការ ព្រមទាំងសុំគោលការណ៍បិទអាជីវករស្ថានីយនោះតែម្តង ៕
ចែករំលែកព័តមាននេះ