រាជធានីភ្នំពេញ ៖ សាលាដំបូងរាជធានីភ្នំពេញ នាព្រឹកថ្ងៃទី២១ សីហា បានប្រកាសសាលក្រមសម្រេចផ្ដន្ទាទោសស្ត្រីម្នាក់ដែលជួលឃាតករឱ្យសម្លាប់ប្ដី និងជនដៃដល់ម្នាក់ ដាក់ពន្ធនាគារកំណត់អស់មួយជីវិត ក្រោមការចោទប្រកាន់ពីបទឃាតកម្មគិតទុកជាមុន និងបទសមគំនិតក្នុងអំពើឃាតកម្ម…
រាជធានីភ្នំពេញ ៖ សាលាដំបូងរាជធានីភ្នំពេញ នាព្រឹកថ្ងៃទី២១ សីហា បានប្រកាសសាលក្រមសម្រេចផ្ដន្ទាទោសស្ត្រីម្នាក់ដែលជួលឃាតករឱ្យសម្លាប់ប្ដី និងជនដៃដល់ម្នាក់ ដាក់ពន្ធនាគារកំណត់អស់មួយជីវិត ក្រោមការចោទប្រកាន់ពីបទឃាតកម្មគិតទុកជាមុន និងបទសមគំនិតក្នុងអំពើឃាតកម្ម តាមមាត្រា២៨ និង មាត្រា២០០ នៃក្រមព្រហ្មទណ្ឌ ។
ជនជាប់ចោទម្នាក់ឈ្មោះ សូ ផា ភេទប្រុស អាយុ២៩ឆ្នាំ ជាជនដៃដល់ និងត្រូវជាកូនធម៌ជនរងគ្រោះ និងម្នាក់ទៀតឈ្មោះ សៅ សំអឿន ភេទស្រី អាយុ៤៦ឆ្នាំ ជាប្រពន្ធរបស់ជនរងគ្រោះ ។ រីឯជនរងគ្រោះដែលស្លាប់ឈ្មោះ កៅ ផា ភេទប្រុស អាយុ៥០ឆ្នាំ មុខរបរអ្នករត់តាក់ស៊ី ត្រូវបានក្រុមឃាតកររួមគំនិតគ្នាសម្លាប់កាលពីយប់ថ្ងៃទី១១ តុលា ឆ្នាំ២០១៦ ។
គួរំលឹកថា កាលពីថ្ងៃទី២០ តុលា ឆ្នាំ២០១៦ កម្លាំងសមត្ថកិច្ចកងរាជអាវុធហត្ថរាជធានីភ្នំពេញ បានធ្វើការស្រាវជ្រាវ និងឈានដល់ការឃាត់ខ្លួនសង្ស័យ២នាក់ (ប្រពន្ធ និងកូនធម៌សម្លាប់ប្តី) បន្ទាប់ពីពលរដ្ឋបានប្រទះឃើញសពជនរងគ្រោះត្រូវគេចងផ្អោបនឹងដុំថ្មយកទៅទម្លាក់ក្នុងប្រឡាយទឹកស្អុយនៅចំណុចតាមបណ្តោយផ្លូវលំ ខាងក្រោយសួនកាណាឌីយ៉ា ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី១៤ តុលា ។
ពេលចាប់ខ្លួន ជនជាប់ចោទឈ្មោះ សូ ផា បានសារភាពថា ខ្លួនពិតជាបានសម្លាប់ជនរងគ្រោះមែន ការសម្លាប់នោះដោយសារឈ្មោះ សៅ សំអឿន ជាប្រពន្ធជនរងគ្រោះ បានជួលខ្លួនក្នុងតម្លៃ១ពាន់ដុល្លារ ឲ្យសម្លាប់ប្តី ។ រីឯជនសង្ស័យឈ្មោះ សៅ សំអឿន ជាប្រពន្ធជនរងគ្រោះ បានសារភាពថា ខ្លួនពិតជាបានជួលកូនធម៌ឱ្យសម្លាប់ប្តី ព្រោះខឹងយកលុយកូន ដែលខំធ្វើការនៅប្រទេសកូរ៉េចំនួន១២០០០ដុល្លារ ទិញរថយន្តឱ្យរត់តាក់ស៊ី បែរជាទៅចិញ្ចឹមស្រីស្នេហ៍ ហើយថែមទាំងចុះចោលប្រពន្ធកូនទៀត ៕
ចែករំលែកព័តមាននេះ