ខេត្តព្រះវិហារ ៖ អភិបាលខេត្តព្រះវិហារចាត់ឲ្យក្រុមការងារស្រុករៀបស្ពានក្តារសម្រាប់ឲ្យពលរដ្ឋនៅស្រុកជ័យសែនធ្វើដំណើរបណ្តោះអាសន្ន ដែលផ្លូវក្រាលគ្រួសក្រហមប្រវែង៤គីឡូម៉ែត្រ ស្ថិតក្នុងឃុំខ្យង ស្រុកជ័យសែន ខេត្តព្រះវិហារ រងការខូចខាតទាំងស្រុង ដោយសារតែជំនន់ទឹកភ្លៀង កាលពីពេលកន្លងទៅនេះ តែទោះបីជាបែបនេះក្តី លោក អ៊ុន ចាន់ដា អភិបាលខេត្តព្រះវិហារបានចាត់មន្ត្រីជំនាញចុះសិក្សាពីការខូចខាត និងរៀបចំក្តារសម្រាប់ឆ្លងកាត់បណ្តោះអាសន្នសិន ។
ថ្លែងប្រាប់សារព័ត៌មានក្នុងដំណើរចុះត្រួតពិនិត្យស្ថានភាពផ្លូវខូចខាតដោយជំនន់ទឹកភ្លៀងកាលពីពេលកន្លងទៅនៅព្រឹកថ្ងៃទី២០ ខែសីហា ឆ្នាំ២០១៨នេះ ឯកឧត្តម អ៊ុន ចាន់ដា អភិបាលខេត្តព្រះវិហារមានប្រសាសន៍ថា ដើម្បីដោះស្រាយបញ្ហាចំពោះមុខ ជូនដល់ប្រជាពលរដ្ឋនៅឃុំខ្យង ស្រុកជ័យសែន ដែលរងការលំបាកក្នុងការធ្វើដំណើរឆ្លងកាត់ផ្លូវក្រាលគ្រួសក្រហម ក្នុងឃុំខ្យងជាបណ្តោះអាសន្នសិន នោះអាជ្ញាធរខេត្តព្រះវិហារបានចាត់ឲ្យអាជ្ញាធរស្រុករៀបចំក្តារក្រាលពីលើផ្លូវដែលរងការខូចខាតទាំងស្រុងនេះ ដើម្បីឲ្យប្រជាពលរដ្ឋបានឆ្លងកាត់ធ្វើដំណើរប្រកបរបរចិញ្ចឹមជីវិតជាបណ្តោះអាសន្ននៅក្នុងរដូវវស្សានេះ ។
លោកអភិបាលខេត្តបន្តថា ដោយសារតែរដូវវស្សានេះក្រុមការងារជំនាញមិនអាចធ្វើការជួសជុលបាននោះទេ ដោយសារតែភ្លៀងបានធ្លាក់ជាប្រចាំ ដូច្នេះដើម្បីស្ថាបនាឡើងវិញបានជាថ្មី អាជ្ញាធរខេត្តបានឲ្យមន្ត្រីជំនាញនៃមន្ទីរអភិវឌ្ឍន៍ជនបទចុះមកពិនិត្យ និងសិក្សាពីផលខូច ខាតឲ្យបានច្បាស់លាស់ដាក់សំណើរសុំទៅក្រសួង ដើម្បីបានជួសជុលផ្លូវមួយខ្សែនេះឡើងវិញនៅពេលអស់ទឹកភ្លៀងខាងមុខនេះ ។
លោក សេង សារី ប្រធានមន្ទីរអភិវឌ្ឍន៍ជនបទខេត្តព្រះវិហារបានលើកឡើងថា កំណាត់ផ្លូវ ក្រាលគ្រួសក្រហមដែលរងការខូចខាតចាប់ពីចំណុចឃុំស្អាង ចូលទៅកាន់ឃុំខ្យង ស្រុកជ័យសែនមានប្រវែង១៦គីឡូម៉ែត្រ ក្នុងនោះការខូចខាតធ្ងន់ធ្ងរមិនអាចធ្វើដំណើរបាន មានប្រវែង៤គីឡូម៉ែត្រ ពេលនេះក្រុមការងារបានរៀបចំក្រាលក្តារបណ្តោះអាសន្នបានសម្រាប់តូចក្រយានយន្ត និងអ្នកថ្មើរជើងប៉ុណ្ណោះ ។
លោក ម៉ា យី ជាប្រជាពលរដ្ឋរស់នៅឃុំខ្យងបានប្រាប់ថា ក្រោយពេលដែលផ្លូវនេះបានខូចខាតពួកគាត់មានការលំបាកក្នុងធ្វើដំណើរប្រកបរបរចិញ្ចឹមជីវិតដូចជា ការដឹកជញ្ជូនកសិផលនានាទៅកាន់ទីផ្សារ តែទោះជាយ៉ាងនេះក្តីលោកបានសង្ឃឹមថា នៅរដូវប្រាំងនេះអាជ្ញាធរនឹងរៀបចំជួសជុលផ្លូវនេះឡើងវិញ ឲ្យប្រជាពលរដ្ឋធ្វើដំណើរបានងាយស្រួលដូចមុនវិញ ៕
ចែករំលែកព័តមាននេះ