ខេត្តកោះកុង ៖ ក្នុងរយៈពេល៦ខែដើម២០១៨នេះ ភ្ញៀវទេសចរជាតិ និងអន្តរជាតិដែលបានទៅទស្សនានៅខេត្តកោះកុងមានកំណើនគួរឲ្យកត់សម្គាល់ ដោយក្នុងនោះ ភ្ញៀវជាតិមានចំនួន១៧៩.៥៤៩នាក់ កើនឡើងប្រមាណ៤២.០១១នាក់ ស្មើនឹង៣០% បើធៀបនឹងគ្រាដូចគ្នាឆ្នាំ២០១៧…
ខេត្តកោះកុង ៖ ក្នុងរយៈពេល៦ខែដើម២០១៨នេះ ភ្ញៀវទេសចរជាតិ និងអន្តរជាតិដែលបានទៅទស្សនានៅខេត្តកោះកុងមានកំណើនគួរឲ្យកត់សម្គាល់ ដោយក្នុងនោះ ភ្ញៀវជាតិមានចំនួន១៧៩.៥៤៩នាក់ កើនឡើងប្រមាណ៤២.០១១នាក់ ស្មើនឹង៣០% បើធៀបនឹងគ្រាដូចគ្នាឆ្នាំ២០១៧ ខណៈភ្ញៀវអន្តរជាតិមានចំនួន៥១.១០៩នាក់ កើនឡើងចំនួន២៣.៣៦០នាក់ ស្មើនឹង៨៤% បើធៀបនឹងគ្រាដូចគ្នានៃឆ្នាំមុន ។ នេះបើយោងតាមរបាយការណ៍មន្ទីរទេសចរណ៍ខេត្ត ដែលកោះសន្ដិភាពទទួលបាន ។
កំណើនភ្ញៀវទេសចររបស់ខេត្តជាប់មាត់សមុទ្រមួយនេះ បើតាមប្រធានមន្ទីរទេសចរណ៍ខេត្តបានបញ្ជាក់ថា ដោយសារកត្តាមួយចំនួនដូចជា ការអភិវឌ្ឍផលិតផលថ្មីៗដែលបម្រើឲ្យវិស័យទេសចរណ៍ ការតភ្ជាប់ហេដ្ឋារចនាសម្ព័ន្ធ ដែលងាយស្រួលក្នុងការធ្វើដំណើរ ពិសេសគឺកត្តាសន្តិសុខ សុវត្ថិភាព រួមទាំងបរិស្ថានជា
ដើម ។
លោក ប៊ុន បៀវ ប្រធានមន្ទីរទេសចរណ៍ខេត្តបានថ្លែងថា ៖« ភ្ញៀវជាតិ និងអន្តរជាតិ មានការកើនឡើងខ្ពស់ដូច្នេះបណ្តាលមកពីខេត្តមានតំបន់ទេសចរណ៍ថ្មីៗមួយចំនួនដែលប្រកប ដោយភាពទាក់ទាញ់ ដូចជា ទឹកធ្លាក់តាចាត, ទឹកធ្លាក់សិលាមានជ័យ, តំបន់កោះស្តេច និងឆ្នេរ តារាសាគរជាដើម ។ ប៉ុន្តែអ្វីដែលសំខាន់នោះគឺការតភ្ជាប់ផ្លូវគមនាគមន៍, ហេដ្ឋារចនាសម្ពន្ធ័បម្រើសេវាទេសចរណ៍ កត្តាសន្តិសុខ សុវត្ថិភាព រួមទាំងបញ្ហាបរិស្ថានដែលទាំងអស់នេះហើយ ទើបញ៉ាំងឲ្យភ្ញៀវទេសចរមកសម្រាកលម្ហែកាយនៅទឹកដីខេត្តមួយនេះកើនឡើងឥតឈប់ឈរ »។ ក្រៅពីសក្ដានុពលសំខាន់ៗទាំងនោះ លោកថា ៖« ឥរិយាបថរបស់ប្រជាពលរដ្ឋក៏ជាកត្តាទាក់ទាញមួយផងដែរ ព្រោះថាប្រជាពលរដ្ឋក្នុងខេត្តមានភាពរួសរាយរាក់ទាក់ ដែលបង្ហាញនូវវប្បធម៌ប្រពៃណីដ៏ល្អផូរផង់របស់ជាតិយើង »។
លោកប្រធានមន្ទីរទេសចរណ៍ ក៏បានបង្ហាញនូវទិសដៅទៅថ្ងៃអនាគត ធ្វើយ៉ាងណាសំដៅទាក់ទាញភ្ញៀវទេសចរឲ្យកាន់តែមានកំណើនខ្ពស់ថែមទៀត ដោយក្នុងនោះរួមមានការជំរុញការផ្សព្វផ្សាយពីសក្តានុពលទេសចរណ៍ក្នុងខេត្តកោះកុងដល់ភ្ញៀវជាតិ និងអន្តរជាតិ តាមរយៈការបោះពុម្ពជាសៀវភៅ ខិត្តិប័ណ្ណផ្សព្វផ្សាយ រួមទាំងដាក់បញ្ជូលនូវព័ត៌មានទេសចរណ៍ថ្មីៗ និងធ្វើប័ណ្ណព័ត៌មានទេសចរណ៍តាមសហគមន៍នីមួយៗ ក៏ដូចជាការផ្សព្វផ្សាយប្រព័ន្ធបច្ចេកវិទ្យាឲ្យកាន់តែផុសផុលថែមទៀត ។ លោកបន្ថែមថា ៖« ក្រៅពីនេះ យើងនឹងចាត់មន្ត្រីជំនាញចុះជាប់ជាប្រចាំ ដើម្បីផ្សព្វផ្សាយយុទ្ធនាការភោជនីយដ្ឋានស្អាត សុវត្ថិភាពចំណីអាហារ និងផ្សព្វផ្សាយស្តីពីការរៀបចំព្រឹត្តិការណ៍បុណ្យសមុទ្រដល់អាជីវករទេសចរណ៍ទូទាំងខេត្ត ដោយគួបផ្សំនឹងការផ្សព្វផ្សាយអំពីការពង្រឹងគុណភាពសេវាកម្មទេសចរណ៍ និងតម្លៃសេវាទេសចរណ៍ដល់សេវាករទេសចរណ៍ទាំងអស់ផងដែរ » ។
គួរបញ្ជាក់ថា ខេត្តកោះកុងនឹងធ្វើជាម្ចាស់ផ្ទះក្នុងការរៀបចំពិធីបុណ្យសមុទ្រលើកទី៧ ជុំទី២ ដែលនឹងប្រព្រឹត្តទៅចាប់ពីថ្ងៃទី១៤ដល់ ១៦ ខែធ្នូ ឆ្នាំ២០១៨ខាងមុខ ដោយរំពឹងថា នឹងទទួលបានការចូលរួមពីភ្ញៀវជាតិ និងអន្តរជាតិប្រមាណ៣០ម៉ឺននាក់ ។ ព្រឹត្តិការណ៍បុណ្យសមុទ្រលើកនេះ បើតាមការអះអាងរបស់លោក ថោង ខុន រដ្ឋមន្ត្រីក្រសួងទេសចរណ៍ បានឲ្យដឹងថា នឹងរៀបចំឲ្យកាន់តែអធិកអធមជាងឆ្នាំមុនៗ ដោយមានការអញ្ជើញក្រុមសិល្បៈ និងក្រុមកីឡាមកពីប្រទេសជិតខាងចូលរួមផងដែរ ៕
ចែករំលែកព័តមាននេះ