ខេត្តបន្ទាយមានជ័យ ៖ នាងក្រមុំម្នាក់ ព្រោះតែតូចចិត្តខឹងនឹងម្តាយស្តីបន្ទោស បានយកថ្នាំពុលមកផឹកសម្លាប់ខ្លួន បង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី២០ ខែសីហា ឆ្នាំ២០១៨ នៅភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។
ជនរងគ្រោះដែលស្លាប់ខាងលើឈ្មោះហ៊ន ស្រីល័ក្ខ ភេទស្រី អាយុ២៣ឆ្នាំ នៅភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា៖ នៅមុនពេលកើតហេតុ នារីរងគ្រោះបានដើរចេញពីផ្ទះរបស់ខ្លួនទៅតូបបងថ្លៃរបស់នាងដើម្បីទិញទឹកសុទ្ធ ពេលដែលលើកទឹកផឹកស្រាប់តែនាងមានអាការៈក្អួត ។ ពេលនោះបងថ្លៃក៏បានសួរថា «អាល័ក្ខស្រវឺងស្រាមែន?» នាងបានប្រាប់ថាអត់ទេ គឺនាងផឹកថ្នាំសម្លាប់សត្វកណ្តុរ ។ ពេលនោះបងថ្លៃក៏រត់ទៅហៅឪពុកម្ដាយក្មេកដែលត្រូវជាឪពុកម្តាយរបស់នារីរងគ្រោះ ហើយក៏នាំគ្នាបញ្ជូននារីរងគ្រោះទៅសង្គ្រោះនៅមន្ទីពេទ្យបង្អែកស្រុកព្រះនេត្រព្រះ ប៉ុន្តែគ្រូពេទ្យពិនិត្យរួចហើយក៏បានឱ្យក្រុមគ្រួសារយកនារីរងគ្រោះទៅមន្ទីពេទ្យស្រុកមង្គលបូរី តែក្រុមគ្រួសារនារីរងគ្រោះបានដឹកទៅមន្ទីពេទ្យបង្អែកក្រុងសិរីសោភ័ណវិញដើម្បីសង្គ្រោះបន្ទាន់ ជាអកុសលនារីរងគ្រោះបានបាត់បង់ជីវិតនៅម៉ោង១២និង៣០នាទីឈានចូលថ្ងៃទី២១ សីហា ឆ្នាំ២០១៨ ទៅហើយ។
លោកអធិការបានបញ្ជាក់ទៀតថា តាមការសាកសួរព័ត៌មានក្នុងក្រុមគ្រួសារបានប្រាប់សមត្ថកិច្ចថា មូលហេតុដែលនារីរងគ្រោះដាច់ចិត្តសម្លាប់ខ្លួនបែបនេះ គឺដោយសារតែនាងដើរលេងពេលថ្ងៃ លុះពេលល្ងាចបានត្រឡប់មកផ្ទះ ហើយត្រូវម្តាយស្តីបន្ទោស ក៏សម្រេចចិត្តផឹកថ្នាំសម្លាប់កណ្តុរបណ្តាលឱ្យស្លាប់តែម្តង។បច្ចុប្បន្ន សពត្រូវបានក្រុមគ្រួសាររៀបចំធ្វើបុណ្យតាមប្រពៃណី៕
ចែករំលែកព័តមាននេះ