រាជធានីភ្នំពេញ ៖ មន្ត្រីជាន់ខ្ពស់ស្ថានទូតឥណ្ឌូណេស៊ីបានឱ្យដឹងថា ទំហំពាណិជ្ជកម្មរវាងកម្ពុជា និងឥណ្ឌូណេស៊ី មានទឹកប្រាក់ចំនួន៥៥០លានដុល្លារអាមេរិកនៅឆ្នាំ២០១៧ កើនឡើងប្រមាណ១៤,៥% បើធៀបនឹងឆ្នាំ២០១៦ មានទឹកប្រាក់ចំនួន៤៨០លានដុល្លារ ។
ឯកអគ្គរដ្ឋទូតឥណ្ឌូណេស៊ី ប្រចាំកម្ពុជា លោក ស៊ូរឌីម៉ាន់ ហាសែង បានមានប្រសាសន៍ក្នុងឱកាសប្រារព្ធខួបបុណ្យឯករាជ្យជាតិឥណ្ឌូណេស៊ី លើកទី៧៣ កាលពីថ្ងៃទី១៧ សីហា ថា ការធ្វើពាណិជ្ជកម្មរវាងប្រទេសទាំងពីរកម្ពុជា-ឥណ្ឌូណេស៊ី មានភាពប្រសើរឡើងជាបន្តបន្ទាប់ ។ ជាក់ស្ដែងក្នុងឆ្នាំ២០១៧ ប្រទេសទាំងពីរមានទំហំពាណិជ្ជកម្មសរុបចំនួន៥៥០លានដុល្លារពោលគឺកើនឡើងប្រចាំឆ្នាំជាមធ្យម២០% បើធៀបពីមួយឆ្នាំទៅមួយឆ្នាំ ។ លោកឯកអគ្គរដ្ឋទូតបន្ដថា ៖« ពាណិជ្ជកម្មទ្វេភាគីរវាងកម្ពុជា-ឥណ្ឌូណេស៊ីនៅពេលកន្លងមក ទំនិញដែលឥណ្ឌណេស៊ីនាំចូលមកកម្ពុជាភាគច្រើនជាប្រភេទថ្នាំពេទ្យ ។ រីឯទំនិញដែលកម្ពុជានាំចេញទៅវិញភាគច្រើនជាប្រភេទក្រណាត់ » ។
ការកើនឡើងនៃទំហំពាណិជ្ជកម្មរវាងប្រទេសទាំងពីរដោយសារតែការផ្តល់សេវាផ្នែករដ្ឋទៅដល់វិស័យឯកជននៅប៉ុន្មានឆ្នាំចុងក្រោយនេះមានភាពងាយស្រួល ដែលធ្វើឱ្យការនាំចេញទំនិញពីទីផ្សារប្រទេសមួយទៅមួយបានទាន់ពេលវេលា និងមិនស្មុគស្មាញ ។
បើតាមអ្នកស្រី ទូច ភក្តី នាយិកាក្រុមហ៊ុន Salak K.A.K Trading មានប្រសាសន៍ថា ដោយសារទំនាក់ទំនងល្អរវាងប្រទេសទាំងពីរ ពិសេសការផ្ដល់សេវាផ្នែករដ្ឋមានលក្ខណៈងាយស្រួល បានធ្វើឲ្យការនាំចូលទំនិញពីឥណ្ឌូណេស៊ី មកកម្ពុជា ពុំមានបញ្ហាស្មុគស្មាញ
ឡើយ ។ អ្នកស្រីបន្ដថា ៖« ពាក់ព័ន្ធនឹងការនាំចូលផលិតផលមកទីផ្សារកម្ពុជាបច្ចុប្បន្ននេះអត់មានអ្វីជាការលំបាក ឬជាឧបស័គ្គនោះទេ ឲ្យតែយើងមានឯកសារគ្រប់គ្រាន់ »។ អ្នកស្រីបញ្ជាក់ថា ៖« នៅពេលប្រទេសទាំងពីរផ្តល់សេវាកាន់តែងាយស្រួល វាជាឱកាសល្អសម្រាប់ពាណិជ្ជករដែលចង់នាំចេញនាំចូលសេវាកម្ម ឬផលិតផលពីទីផ្សារមួយទៅទីផ្សារមួយទៀត។ ជាក់ស្តែង យើងនាំចូលផ្លែសាឡាក់ពីឥណ្ឌូណេស៊ីមកកម្ពុជា រយៈពេលពីរបីឆ្នាំចុងក្រោយនេះ មានលក្ខណៈល្អប្រសើរ ហើយតម្រូវការទីផ្សារមានការកើនឡើងជាបន្ត
បន្ទាប់ »។
លោកឯកអគ្គរដ្ឋទូតឥណ្ឌូណេស៊ី បានបញ្ជាក់ថា ៖« កម្ពុជានិងឥណ្ឌូណេស៊ី មានទំនាក់ទំនងជាមួយគ្នាយូរអង្វែងណាស់មកហើយ ។ យើងតែងតែសហការគ្នាក្នុងនាមប្រទេសជាមិត្តក្នុងការដោះស្រាយបញ្ហាមួយចំនួនដែលកើតមានឡើងក្នុងសង្គមយើង ។ លោកថា ៖« តាមខ្ញុំសង្កេត ទំនាក់ទំនងរវាងប្រជាជន និងប្រជាជននៃប្រទេសទាំងពីរកាន់តែមានលក្ខណៈល្អជាលំដាប់ ហើយកាន់តែរឹងមាំថែមទៀត ពិសេសគឺមានប្រជាជនកម្ពុជាជាច្រើនដែលចាប់អារម្មណ៍ជាមួយនឹងវប្បធម៌ ក៏ដូចជាសិក្សាភាសាឥណ្ឌូណេស៊ី ។ យ៉ាងណាមិញ ប្រជាជនឥណ្ឌូណេស៊ីក៏ដូច្នេះដែរ កំពុងតែចាប់អារម្មណ៍នឹងសិល្បៈវប្បធម៌របស់កម្ពុជា » ៕
ចែករំលែកព័តមាននេះ