ខេត្តតាកែវ ៖ ជនសង្ស័យចំនួន២នាក់ត្រូវបានប៉ូលិសធ្វើការចាប់ខ្លួនរួចកសាងសំណុំរឿងដើម្បីបញ្ជូនបន្តមកកាន់ការិយាល័យព្រហ្មទណ្ទកម្រិតស្រាលខេត្តដើម្បីចាត់ការបន្ត ខណៈដែលជនសង្ស័យបានធ្វើសកម្មភាពលួចកាច់សោរ.កម៉ូតូរបស់គេ១គ្រឿង តែមិនបានសម្រេចក៏ត្រូវប៉ូលិសធ្វើការពួនស្ទាក់គ្រប់ច្រកល្ហកក៏បានចាប់ខ្លួនបានរួមជាមួយនឹងវត្ថុតាងជាក់ស្តែង ។ ហេតុការនេះបានកើតឡើងកាលពីវេលាម៉ោង០៨និង០០នាទីព្រឹក ថ្ងៃទី២០ ខែសីហា ឆ្នាំ២០១៨ ស្ថិតនៅភូមិរមេញខាងត្បូង ឃុំរមេញ ស្រុកកោះអណ្ដែត ខេត្តតាកែវ ។
លោកវរសេនីយ៍ ជា សុផាត អធិការនគរបាលស្រុកកោះអណ្តែតបានអោយដឹងថា ជនសង្ស័យចំនួន២នាក់ទី១-ឈ្មោះ ភួង សៅ ភេទប្រុស អាយុ៤៥ឆ្នាំ រស់នៅភូមិស្រម៉ ឃុំព្រៃខ្លា ស្រុកកោះអណ្តែត និងទី២-ឈ្មោះ ភិន ថន ភេទប្រុស អាយុ៤២ឆ្នាំ រស់នៅភូមិដូនភើ ឃុំខ្វាវ ស្រុកទ្រាំង ខេត្តតាកែវ បានធ្វើសកម្មភាពលួចកាច់សោរ.កម៉ូតូ១គ្រឿង ម៉ាកហុងដា C125 ស៊េរីឆ្នាំ២០១៣ ពាក់ផ្លាកលេខ តាកែវ 1J-1435 ជាកម្មសិទ្ធិរបស់ឈ្មោះ សុខ រីយ៉ា ភេទប្រុស អាយុ៥០ឆ្នាំ រស់នៅភូមិចំបក់ឯម ឃុំរមេញ ស្រុកកោះអណ្តែត ។
ក្រោយពេលកើតហេតុកម្លាំងជំនាញស្រុកសហការជាមួយកម្លាំងប៉ុស្តិ៍នគរបាលរដ្ឋបាលធ្វើការល្បាតពួនស្ទាក់គ្រប់ច្រកល្ហករហូតឈានដល់ការឃាត់ខ្លួនជនសង្ស័យទាំង២នាក់ខាងលើ និងដកហូតវត្ថុតាងម៉ូតូ ។ នៅចំពោះមុខប៉ូលិសជនសង្ស័យបានសារភាពថា ពួកគេពិតជាបានធ្វើសកម្មភាពលួចកាច់សោរ.កយកម៉ូតូរបស់គេពិតប្រាកដមែន តែគេចមិនរួចក៏ត្រូវប៉ូលិសចាប់ខ្លួនបានតែម្តង ៕
ចែករំលែកព័តមាននេះ