ខេត្តកំពង់ធំ ៖ មនុស្សប្រុសស្រីចំនួន៣នាក់ បានពុលពងគីង្គក់ ត្រូវបានបញ្ចូនទៅសង្គ្រោះហើយដែរ ហេតុការណ៍គួរឲ្យភ្ញាក់ផ្អើលនេះបានកើតឡើង កាលពីវេលាម៉ោង០៨និង០០នាទីយប់ ថ្ងៃទី២០ ខែសីហា ឆ្នាំ២០១៨ នៅចំណុចភូមិសន្ទុកក្រៅ ឃុំកកោះ ស្រុកសន្ទុក ខេត្តកំពង់ធំ ។
សមត្ថកិច្ចបានឲ្យដឹងថា ជនរងគ្រោះទាំង៣នាក់រួមមានទី១ – ឈ្មោះ ផាន ភា ភេទស្រី អាយុ ៥០ឆ្នាំ មានស្ថានភាពធ្ងន់ធ្ងរជាងគេ ទី២- ឈ្មោះ សឿន ខន ភេទប្រុស អាយុ៥៥ឆ្នាំ មានអាការស្រាល និងទី៣-ឈ្មោះ ផាន គី ភេទប្រុស អាយុ៤៣ ឆ្នាំ មានអាការស្រាល អ្នកទាំងបីរស់នៅភូមិកើតហេតុខាងលើ ហើយត្រូវបានបបញ្ជូនទៅព្យាបាលនៅមន្ទីរពេទ្យខេត្តទាន់ពេលវេលាដោយសារ តែកាលពីល្ងាចថ្ងៃកើតហេតុ បន្ទាប់ពីពួកគាត់ចាប់សត្វគីង្គក់បានក៏នាំគ្នាធ្វើម្ហូបហូបសាច់ និងពងគីង្គក់ ។ ក្រោយពីហូបរួចមិនបានប៉ុន្មាននាទីផងក៏មានអាការក្អួតចង្អោរជាខ្លាំង សាច់ញាតិបានដឹងក៏នាំគ្នាដឹកជនរងគ្រោះទៅមន្ទីរពេទ្យទាន់ កុំអីអាចបណ្តាលឲ្យមានគ្រោះថ្នាក់ដល់អាយុជីវិតក៏ថាបានដែរ ។
ទន្ទឹមនឹងការកើតមាននូវករណីពុលពងគីង្គក់ខាងលើនេះក៏មានបងប្អូនប្រជាពលរដ្ឋមួយចំនួននិយាយថា« គួរឲ្យចង់សើចណាស់ មនុស្សចំណាស់នេះទៅហើយ នៅមិនដឹងថា ពងគីង្គក់ពុល ចេះនាំគ្នាស៊ីទៅកើតដែរ »។ ដំណឹងនេះក៏ជាការជូនដំណឹងដល់ពលរដ្ឋ សូមកុំឲ្យនាំគ្នាហូបពងគីង្គក់ឲ្យសោះប្រយ័ត្នពុលដូចករណីខាងលើ ៕
ចែករំលែកព័តមាននេះ