ខេត្តស្ទឹងត្រែង ៖ លោក ហ៊ុន សំអឿន នាយរងសង្កាត់បាលព្រៃឈើអូពង់មាន់បានសហការជាមួយនឹងកម្លាំងនគរបាលប្រឆាំងបទល្មើសសេដ្ឋកិច្ចខេត្តដឹកនាំដោយលោក វ៉ា សុផាន់ បានឆ្មក់បង្ក្រាបទូកដឹកឈើមួយគ្រឿងខ្នាតធំ កាលពីរំលងអធ្រាត្រថ្ងៃទី២០ ខែសីហា ឆ្នាំ២០១៨ ស្ថិតនៅចំណុចគល់ស្ពានសេកុង (ទន្លេរសេកុង) ស្ថិតនៅក្រុងស្ទឹងត្រែង ។
តាមប្រភពមួយបានឲ្យដឹងថា ទូកដឹកឈើមួយគ្រឿងខាងលើនេះបានដឹកចេញពីចំណុចភូមិសាស្ត្រភូមិញឿន ឃុំស្តៅស្រុកសេសាន ។ ទូកដឹកឈើខាងលើនោះគឺបង្ក្រាបបានបន្ទាប់ពីមានប្រជាពលរដ្ឋបានរាយការណ៍មកថា មានទូកដឹកឈើ១គ្រឿងឆ្លងកាត់ក្រោមស្ពានសេកុងបម្រុងលោតឆត្រទៅខេត្តក្រចេះ តែត្រូវអស់លក្ខណ៍ជាប់អន្ទាក់សមត្ថកិច្ចបង្ក្រាបបាននៅពេលយប់តែម្ដង ។
លោក ហ៊ុន សំអឿន បានបន្ថែមថា ទូកនេះគឺដឹកឈើលេខ២ ហើយបច្ចុប្បន្នកំពុងតែធ្វើការរុះរើចេញពីទូក និងធ្វើការដឹកជញ្ជូនយកទៅទុកនៅខណ្ឌរដ្ឋបាលព្រៃឈើគល់ស្ពានសេកុងខេត្តដើម្បីធ្វើការវាស់វែងបន្តទៀត ៕
ចែករំលែកព័តមាននេះ