រាជធានីភ្នំពេញ ៖ ជនជាតិវៀតណាមចំនួន៧នាក់ ត្រូវបានកម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ឃាត់ខ្លួនពីបទស្នាក់នៅខុសច្បាប់នៃព្រះជាណាចក្រកម្ពុជា ។ ការឃាត់ខ្លួនជនជាតិវៀតណាមនេះធ្វើឡើងនៅវេលាម៉ោង០៦ព្រឹកថ្ងៃទី២១ ខែសីហានេះ នៅក្នុងប្រតិបត្តិការត្រូតពិនិត្យ រដ្ឋាបាលតំបន់និគមវៀតណាម ស្នាក់នៅក្នុងភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ។
ក្រោមការដឹកនាំដោយលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងមានការចូលរួមពីលោក លឹម ស៊ាងហៃ ក្រឡាបញ្ជីព្រមទាំងមានការសហកាជាមួយស្នងការដ្ឋាននគរបាលរាជធានីភ្នំពេញផងដែរ ។
តាមនគរបាលបានឲ្យដឹងថា នៅក្នុងការត្រួតពិនិត្យសមត្ថកិច្ចចម្រុះបានរកឃើញជនបរទេសចំនួន៥៣នាក់ មានស្រី៣៥នាក់ ជាជនជាតិវៀតណាមក្នុងនោះចំនួន៤៦នាក់ មានស្រី៣៣នាក់ មានឯកសារប្រើប្រាស់ត្រឹមត្រូវតាមច្បាប់អន្តោប្រវេសន៍ ។ ដោយឡែកជនជាតិវៀត ណាម ចំនួន០៧នាក់ ស្រី០២នាក់ បានលួចស្នាក់នៅ និងប្រកបរបរដោយខុសច្បាប់គ្មានលិខិតឆ្លងដែន និងប្រើប្រាស់ឯកសារមិនត្រឹមត្រូវ ។
តាមនគរបាលបានឲ្យដឹងថា ជនបរទេសចំនួន០៧នាក់ ត្រូវបានកម្លាំងនគរបាលនាំខ្លួនទៅកាន់អគ្គនាយកដ្ឋានអន្តោប្រវេសន៍ ដើម្បីសាកសួរ និងពិនិត្យឯកសារតាមនីតិវិធី ៕
ចែករំលែកព័តមាននេះ