អ៊ីរ៉ង់ ៖គ្មានសមាជិក OPEC ណា អាចជំនួសការនាំចេញប្រេងអ៊ីរ៉ង់បានទេ

ថ្ងៃទី ២១ ខែ សីហា ឆ្នាំ ២០១៨

ម៉ោង ១០:១២

ទីក្រុងឡុងដ៍ ៖ ប្រទេសអ៊ីរ៉ង់បានប្រាប់ដល់អង្គការប្រទេសនាំចេញប្រេង (OPEC) កាលពីថ្ងៃអាទិត្យ ថា មិនមានសមាជិកណាមួយអាចជំនួសចំណែកប្រេងនាំចេញរបស់ប្រទេសខ្លួនបានទេ និងបានបង្ហាញពីការព្រួយបារម្ភលើសំណើរបស់អារ៉ាប៊ីសាអូឌីតថា នឹងបង្កើនការបូមប្រេង ខណៈដែលអាមេរិកដាក់ទណ្ឌកម្មលើប្រេងអ៊ីរ៉ង់ ។

ក្នុងកិច្ចប្រជុំមួយជាមួយនឹងអគ្គលេខាធិកា លោកMohammad Barkindo អ្នកការទូតជាន់ខ្ពស់អ៊ីរ៉ង់់ម្នាក់បានជំរុញឲ្យរក្សាក្រុមប្រទេសនេះនៅឲ្យឆ្ងាយពីនយោបាយ ។

បេសកជនអចិន្ត្រៃយ៍ លោក Kazem Gharibabadi បាននិយាយថា ៖« មិនមានប្រទេសណាមួយដែលត្រូវបានអនុញ្ញាតឲ្យគ្រប់គ្រងចំណែកផលិតកម្ម និងការនាំចេញប្រេងរបស់សមាជិកមួយទៀតឡើយ ហើយសន្និសីទរដ្ឋមន្ត្រី OPEC មិនបានចេញប័ណ្ណអនុញ្ញាតសកម្មភាពដូច្នេះឡើយ »។

គួរបញ្ជាក់ដែរថា កាលពីខែឧសភា លោកប្រធានាធិបតីដូណាល់ ត្រាំ(Donald Trump) បានដកសហរដ្ឋអាមេរិកចេញពីកិច្ចព្រមព្រៀងអាវុធនុយក្លេអ៊ែរជាមួយអ៊ីរ៉ង់ និងបានប្រកាសថា នឹងដាក់ទណ្ឌកម្មលើអ៊ីរ៉ង់ថែមទៀត ។ សហរដ្ឋអាមេរិកកំពុងតែជំរុញឲ្យសម្ព័ន្ធមិត្តកាត់បន្ថយការនាំចូលប្រេងអ៊ីរ៉ង់ដល់កម្រិតសូន្យ ហើយនឹងដាក់ទណ្ឌកម្មថ្មីលើអ៊ីរ៉ង់នៅខែវិច្ឆិកាខាងមុខនេះ ។ លោកប្រធានាធិបតីត្រាំ ក៏បានជំរុញឲ្យOPECបូមប្រេងច្រើនជាងមុនដើម្បីកាត់បន្ថយតម្លៃផងដែរ ។

រដ្ឋមន្ត្រីថាមពលអារ៉ាប៊ីសាអូឌីត និងរុស្ស៊ីបាននិយាយកាលពីខែឧសភា កន្លងមកថា ពួកគេបានត្រៀមខ្លួនរួចជាស្រេចក្នុងការបង្កើនផលិតកម្ម ដើម្បីកាត់បន្ថយកង្វល់របស់អតិថិជនពីការផ្គត់ផ្គង់ ។

អ៊ីរ៉ង់និងប្រទេសដទៃក្នុងកិច្ចព្រមព្រៀងខាងលើដែលរួមមានអង់គ្លេស បារាំង អាល្លឺម៉ង់ រុស្ស៊ី និងប្រទេសចិន បានសហការដើម្បីស្វែងរកវិធីសង្គ្រោះកិច្ចព្រមព្រៀងនោះ បើទោះជាទទួលរងសម្ពាធពីសហរដ្ឋអាមេរិកក៏ដោយ ។

អ៊ីរ៉ង់បានដាក់លក្ខខណ្ឌជាច្រើនសម្រាប់ប្រទេសនៅអឺរ៉ុប ប្រសិនបើពួកគេចង់ឲ្យអ៊ីរ៉ង់បន្តស្ថិតក្នុងកិច្ចព្រមព្រៀងនេះ ដែលរួមមានលក្ខខណ្ឌឲ្យធនាគារអឺរ៉ុបការពារការធ្វើពាណិជ្ជកម្មជាមួយអុីរ៉ង់ និងធានាដល់ការលក់ប្រេងរបស់អ៊ីរ៉ង់ជាដើម ៕