ខេត្តកំពត ៖ ដោយសារឆ្នាំនេះភ្លៀងធ្លាក់ច្រើន បានធ្វើឲ្យការផលិតអំបិលធ្លាក់ដល់កម្រិតសូន្យ ខណៈដីស្រែអំបិលមួយចំនួនធំបានក្លាយជាកន្លែងចិញ្ចឹមក្ដាម និងបង្គា និងមួយចំនួនទៀតត្រូវម្ចាស់បោះបង់ចោល ស្មៅដុះពេញស្រែក្លាយជាកន្លែងឃ្វាលគោក្របីទៅហើយ ។
បើតាមលោក សេង សន ជាអ្នកចាំឃ្លាំងអំបិលនៅឃុំអង្គោល ស្រុកដំណាក់ចង្អើរ ខេត្តកែប បានឲ្យដឹងថា ការផលិតអំបិលឆាំ្ននេះគឺមិនបានផលនោះទេ ដោយសារភ្លៀងធ្លាក់តាំងពីខែប្រាំងរហូតដល់វស្សាតែម្ដង ហើយដីស្រែអំបិលវិញមួយចំនួនធំ ត្រូវម្ចាស់ជួលទៅឲ្យវិនិយោគិនកូរ៉េសម្រាប់ចិញ្ចឹមក្តាម និងបង្គា និងមួយចំនួនទៀតស្មៅដុះពេញស្រែក្លាយជាកន្លែងឃ្វាលគោក្របីទៅហើយ ។ ចំណែកឃ្លាំងស្ដុកអំបិលវិញ ត្រូវគេបោះបង់ចោល និងត្រូវខ្យល់បក់បោកដួលរាបពេញដី ។ លោកបន្ដថា ៖« ដីស្រែផលិតអំបិលរបស់កម្ពុជា អាចនឹងត្រូវបាត់បង់ ហើយត្រូវពឹងផ្អែកលើការនាំចូលទាំងស្រុង បើសិនជាយើងមិននាំគ្នាជួយស្រោចស្រង់ទេ ខណៈប៉ុន្មានថ្ងៃមុននេះ ជនជាតិចិនមួយក្រុមក៏បានចុះមកពិនិត្យស្រែអំបិលដែលនៅសេសសល់ដែរ »។
បើតាមលោក ប៊ុន យោង ម្ចាស់ស្រែអំបិល បានឲ្យដឹងថា ឆ្នាំនេះ ភ្លៀងធ្លាក់ច្រើនពេក ធ្វើឲ្យការផលិតអំបិលមិនទទួលបានទិន្នផលទេ ។ លោកបន្ដថា ៖« ការផលិតអំបិលបច្ចុប្បន្ននេះ គឺធ្វើទៅតាមប្រពៃណីសុទ្ធសាធ ។ មានន័យថា ត្រូវពឹងលើកម្ដៅថ្ងៃទាំងស្រុង បើអាកាសធាតុមិនអំណោយផលហើយ អំបិលគឺមិនកើតនោះទេ »។ លោកថា ៖« ពិតជាពិបាកណាស់របរពឹងផ្អែកលើកម្ដៅថ្ងៃមួយនេះ »។
ប្រធានរដ្ឋបាលនៃសហគមន៍អ្នកផលិតអំបិលកំពត-កែប លោក អ៊ុំ ឈុន បានឲ្យដឹងថា កាលពីឆ្នាំ២០១៧ សហគមន៍ផលិតអំបិលបានចំនួន៣ម៉ឺន៣ពាន់តោន តែឆ្នាំនេះការផលិតអំបិល គឺសូន្យតែម្ដង ដោយសារតែអាកាសធាតុមិនអំណោយផល ។ លោកបន្ដថា ៖« ឆ្នាំនេះភ្លៀងធ្លាក់ច្រើននៅតាមមាត់សមុទ្រ ធ្វើឲ្យការផលិតអំបិលនៅខេត្តកែបនិងកំពត មិនទទួលបានផលនោះទេ ហើយបច្ចុប្បន្ន ដីស្រែអំបិលចំនួន២០០ហិកតា ត្រូវបានម្ចាស់ជួលឲ្យវិនិយោគិនកូរ៉េ សម្រាប់ចិញ្ចឹមក្ដាម និងបង្គាទៅហើយ នៅសល់ប៉ុន្មានត្រូវម្ចាស់បោះបង់ចោលស្មៅដុះពេញស្រែ »។
លោកបញ្ជាក់ថា ៖« ឆ្នាំនេះ កសិករផលិតអំបិលខាតបង់យ៉ាងខ្លាំង ដោយសារតែភាគច្រើនគឺខ្ចីលុយពីមីក្រូហិរញ្ញវត្ថុ និងធនាគារ ដើម្បីមករៀបចំស្រែអំបិល ប៉ុន្តែក្រោយពេលរៀបចំនិងបញ្ចូលទឹករួច ស្រាប់តែភ្លៀងធ្លាក់ជាប់ៗគ្នាតាំងពីដើមឆ្នាំមក និងត្រូវខូចខាតទាំងស្រុង ដូច្នេះហើយទើបពួកគេជួលដីស្រែឲ្យវិនិយោគិនកូរ៉េសម្រាប់ចិញ្ចឹមក្តាម និងបង្គាវិញ ដើម្បីយកប្រាក់មកទូទាត់បំណុល »។ អំបិលកម្ពុជា ត្រូវបានទទួលស្គាល់ជាអំបិលដែលមានគុណភាព និងបាននាំចេញទៅកាន់ទីផ្សារអន្តរជាតិជាច្រើនដូចជា ទីផ្សារប្រទេសអង់គ្លេស ស្វ៊ីស និងបណ្ដាប្រទេសមួយចំនួនទៀតនៅអឺរ៉ុប ក៏ប៉ុន្តែការនាំចេញនោះ គឺតែផលិតផលផ្កាអំបិលប៉ុណ្ណោះ ដែលជាផលិតផលកម្រ និងមានគុណប្រយោជន៍ខ្ពស់សម្រាប់សុខភាព ។
យោងតាមប្រធានការិយាល័យរដ្ឋបាលអំបិលកំពត-កែប លោក អ៊ុំ ឈុន បានប្រាប់កោះសន្តិភាពកន្លងមកថា ឆ្នាំនេះ សមាគមបានស្នើទៅរាជរដ្ឋាភិបាលសម្រាប់នាំចូលអំបិលប្រមាណពី៤ទៅ៥ម៉ឺនតោន មកផ្គត់ផ្គង់ក្នុងប្រទេស ។ ប្រជាពលរដ្ឋកំពុងតែបារម្ភថា បើសិនជាស្រែអំបិលក្លាយជាកន្លែងចិញ្ចឹមក្តាម និងបង្គា បែបនេះ តើថ្ងៃអនាគត វាសនាស្រែអំបិលរបស់កម្ពុជានឹងទៅជាយ៉ាងណា ?
ចែករំលែកព័តមាននេះ