រាជធានីភ្នំពេញ ៖ បុរសម្នាក់ជិះម៉ូតូមួយគ្រឿងបោះពួយយ៉ាងលឿន ខណៈមកដល់ផ្លូវកោងបត់មិនទាន់ក៏ជ្រុលចង្កូតទៅបុករបងថ្មដីឡូត៍ទុកចោលមួយកន្លែង បណ្តាលឲ្យបោកក្បាលស្លាប់ភ្លាមៗ កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២១ ខែសីហា ឆ្នាំ២០១៨ តាមបណ្តោយផ្លូវ១៣២ ស្ថិតក្នុងសង្កាត់ស្រះចក ខណ្ឌដូនពេញ ។
ជនរងគ្រោះដែលស្លាប់មានឈ្មោះ ម៉ក់ អីហុង ភេទប្រុស អាយុ២៥ឆ្នាំ ស្នាក់នៅផ្ទះលេខ១៨C ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសរងគ្រោះខាងលើបើកបរម៉ូតូមួយគ្រឿងម៉ាកហុងដាស្កុបភី ស៊េរី០១៨ ពណ៌ស ពាក់ស្លាកលេខ ភ្នំពេញ 1GR-5731 ដោយធ្វើដំណើរតាមបណ្តោយផ្លូវ១៣២ ក្នុងទិសដៅពីត្បូងទៅជើង និងក្នុងល្បឿនយ៉ាងលឿន ។ លុះមកដល់ចំណុចកើតហេតុដែលជាផ្លូវកោង ស្រាប់តែម៉ូតូខាងលើបត់មិនទាន់ក៏ជ្រុលចង្កូតទៅខាងស្តាំទៅបុករបងថ្មរបស់ដីឡូត៍ទុកចោល បណ្តាលឲ្យជនរងគ្រោះបោកក្បាលទៅនឹងរបងថ្មស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធម៌ ។ រីឯម៉ូតូរងការខូចខាតបែកក្បាំងផ្នែកខាងមុខ ចំណែកឯរបងថ្មដីឡូត៍មិនមានរងការខូចខាតនោះទេ ។
ក្រោយពេលសមត្ថកិច្ចមូលដ្ឋាន និងសមត្ថកិច្ចជំនាញបានចុះមកដល់ចំណុចកើតហេតុហើយក៏បានទំនាក់ទំនងទៅរកសាច់ញាតិរបស់ជនរងគ្រោះ និងយកម៉ូតូរបស់ជនរងគ្រោះខាងលើទៅរក្សាទុកនៅអធិការដ្ឋាននគរបាលខណ្ឌដូនពេញ ។ ដោយឡែកសពបុរសរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯផ្ទះ ៕
ចែករំលែកព័តមាននេះ