រាជធានីភ្នំពេញ ៖ អ្នកស្រី ទេព វន្នី អ្នកភូមិបឹងកក់ត្រូវបានតុលាការក្រុងភ្នំពេញបានដោះលែងឲ្យមានសេរីភាពឡើងវិញ កាលពីថ្ងៃទី២០ ខែសីហា ឆ្នាំ២០១៨នេះ បើយោងតាមដីការបស់សាលាដំបូងរាជធានីភ្នំពេញ ហើយអ្នកស្រីបានចាកចេញពីពន្ធនាគារដោយមានអ្នកភូមិបឹងកក់មួយក្រុមបានទៅទទួលគាត់នៅខាងមុខច្រកចេញពីគុកផង ។
សូមបញ្ជាក់ថា ការដោះលែងបានធ្វើឡើងបន្ទាប់មានព្រះរាជក្រិត្យលើកលែងទោសពីព្រះមហាក្សត្រជាមួយនឹងស្ត្រីអ្នកភូមិបឹងកក់ចំនួន៣នាក់ទៀត ដែលតុលាការបានចោទប្រកាន់លកន្លងមក ។
លោក គុជ គឹមឡុង ព្រះរាជអាជ្ញាបានបញ្ជាក់ថា អ្នកស្រី ទេព វន្នី អាយុ៣៧ឆ្នាំ ត្រូវបានតុលាការផ្តន្ទាទោសដាក់ពន្ធនាគារ៦ខែ បទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈមានស្ថានទម្ងន់ទោស តាមសាលក្រមចុះថ្ងៃទី៤ ខែធ្នូ ឆ្នាំ២០១៧ របស់តុលាការកំពូល ។
ចំណែកសំណុំរឿងមួយផ្សេងទៀតបទហិង្សាដោយចេតនាមានស្ថានទម្ងន់ទោសត្រូវបានផ្តន្ទាទោស២ឆ្នាំ ៦ខែ តាមសាលក្រមតុលាការកំពូលចុះថ្ងៃទី៧ ខែកុម្ភៈ ឆ្នាំ២០១៨ របស់តុលាការកំពូល ។ អ្នកស្រីត្រូវបានឃុំខ្លួននៅពន្ធនាគារព្រៃស ។
ដីការបស់លោកព្រះរាជអាជ្ញារងបានបញ្ជាក់ថា«តាមអំណាចព្រះរាជក្រិត្យលើកលែងទោសចុះថ្ងៃទី២០ ខែសីហានេះ ឈ្មោះ ទេព វន្នី ត្រូវបានលើកលែងទោស ដោះលែងឲ្យមានសេរីភាពវិញ » ៕
ចែករំលែកព័តមាននេះ