ខេត្តបាត់ដំបង ៖ បើតាមប្រភពពីសមត្ថកិច្ចបានបង្ហើបឱ្យដឹងថា រហូតមកដល់ពេលនេះ សំណុំរឿងបាញ់សម្លាប់អ្នកបើករថយន្តដឹកទឹកកកម្នាក់យ៉ាងសាហាវព្រៃផ្សៃ ដែលគេសង្ស័យផ្ដើមចេញពីរឿង «ស្នេហាត្រីកោណ» ដែលកើតឡើងនៅឃុំភ្នំសំពៅ ស្រុកបាណន់ កាលពីកន្លះខែមុននេះ…
ខេត្តបាត់ដំបង ៖ បើតាមប្រភពពីសមត្ថកិច្ចបានបង្ហើបឱ្យដឹងថា រហូតមកដល់ពេលនេះ សំណុំរឿងបាញ់សម្លាប់អ្នកបើករថយន្តដឹកទឹកកកម្នាក់យ៉ាងសាហាវព្រៃផ្សៃ ដែលគេសង្ស័យផ្ដើមចេញពីរឿង «ស្នេហាត្រីកោណ» ដែលកើតឡើងនៅឃុំភ្នំសំពៅ ស្រុកបាណន់ កាលពីកន្លះខែមុននេះ នៅតែមិនទាន់បញ្ចប់ការស៊ើបអង្កេតនៅឡើយទេ ។
បើទោះជាជនសង្ស័យចំនួន២នាក់ ត្រូវសមត្ថកិច្ចតាមចាប់ខ្លួនបាន កាលពីបួនថ្ងៃមុននៅឯប្រទេសថៃក្ដី ព្រោះសំណុំរឿងបាញ់ប្រហារដ៏ឃោឃៅនេះ ទំនងអាចជាប់ពាក់ព័ន្ធនឹងមនុស្សមួយចំនួនទៀត ដែលបានរួមសមគំនិត ។
ជនសង្ស័យទាំង២នាក់ ម្នាក់ឈ្មោះប៊ុន ពន្លក អាយុ២២ឆ្នាំ ជាជនដៃដល់ និងម្នាក់ទៀតឈ្មោះហួន វាសនា អាយុ២៣ឆ្នាំ ជាអ្នករួមគំនិត ។ ជនទាំង២នាក់បានរត់គេចខ្លួនឆ្លងដែនទៅកាន់ប្រទេសថៃ ក្រោយបាញ់សម្លាប់មនុស្ស តែត្រូវកម្លាំងសមត្ថកិច្ចថៃស្រាវជ្រាវចាប់ខ្លួនបាន នៅទឹកដីខេត្តស្រះកែវ ប្រទេសថៃ កាលពីថ្ងៃទី១៦ សីហា ក្រោយពីមានការស្នើសុំសហការពីភាគីកម្ពុជា ។
សូមបញ្ជាក់ថា កាលពីវេលាម៉ោង១០យប់ថ្ងៃទី០៥ សីហា ២០១៨ មានខ្មាន់កាំភ្លើងចំនួន២នាក់ ជិះរថ
យន្តម៉ាកហាយឡិនឌ័របានតាមស្ទាក់បាញ់អ្នកបើកបររថយន្តដឹកទឹកកកម្នាក់ ឈ្មោះពេជ្រ ភិសា ភេទ
ប្រុស អាយុ២៣ឆ្នាំ ខណ:ពេលកំពុងធ្វើដំណើរដល់ចំណុចវាលអន្ទង់ស្ថិតក្នុងភូមិក្រពើជើង ឃុំភ្នំសំពៅ
ស្រុកបាណន់ ដោយបាញ់ត្រូវជនរងគ្រោះចំនួន៥គ្រាប់។
ក្រោយពេលបាញ់សម្លាប់មនុស្សបានសម្រេច ក្រុមខ្មាន់កាំភ្លើងបានបើករថយន្តត្រឡប់ ដើម្បីគេចខ្លួន។ បន្ទាប់ពីបើកការស៊ើបអង្កេតជាបឋមដំបូង ដែលមានការបំភ្លឺពីសាក្សី និងប្រភពមួយចំនួនផង គេបានដាក់ការសន្និដ្ឋានជាបឋមថា នៅជាអំពើឃាតកម្មដែលអាចផ្ដើមចេញពីសំណរឿង «ស្នេហាត្រីកោណ»។
ជាមួយនឹងការតាមចាប់ខ្លួនបានជនសង្ស័យ២នាក់ខាងលើនេះ បើតាមចម្លើយបឋមរបស់ជនសង្ស័យឈ្មោះប៊ុន ពន្លក គឺការបាញ់សម្លាប់តៃកុងរថយន្តដឹកទឹកកកនេះ ពិតជាមានជាប់ពាក់ព័ន្ធនិងរឿងស្នេហាត្រីកោណមែន ។ ជននេះបានសារភាពថា ខ្លួនជាអ្នកបាញ់សម្លាប់ជនរងគ្រោះផ្ទាល់ដៃ រីឯឈ្មោះហួន វាសនា ត្រូវជាបងជីដូនមួយ និងជាអ្នកបើករថយន្តជួនខ្លួន ដើម្បីតាមបាញ់សម្លាប់សត្រូវ ដែលហ៊ានប្លន់សង្សារខ្លួនយកទៅរៀបការ ។
ក្រោយពីបាញ់សម្លាប់គូសត្រូវ ពួកខ្លួនបានបើករថយន្តគេចទៅភ្នំពេញទាំងយប់ លុះប៉ុន្មានថ្ងៃក្រោយទើបខ្លួនធ្វើដំណើរត្រឡប់មកវិញ ដើម្បីឆ្លងដែនទៅសម្ងំលាក់ខ្លួននៅក្នុងទឹកដីថៃ តែស្មានមិនដល់ថា ត្រូវសមត្ថកិច្ចថៃ តាមចាប់ពួកខ្លួនបាននោះទេ ។
បើតាមប្រភពពីសមត្ថកិច្ចខេត្តបាត់ដំបងបានឱ្យដឹងថា សមត្ថកិច្ចថៃបានប្រើប្រាស់សត្វឆ្កែងរាប់សិបក្បាល ដើម្បីស្វែងរកចាប់ខ្លួនជនសង្ស័យទាំង២នាក់ខាងលើនេះ ។ ទោះយ៉ាងណា បើតាមមន្ត្រីជំនាញនៃស្នងការខេត្តបានបញ្ជាក់ថា សំណុំរឿងនេះ នៅមិនទាន់បិទបញ្ចប់នៅឡើយទេ ព្រោះទំនងអាចនៅមានជាប់ពាក់ព័ន្ធនឹងបុគ្គលមួយចំនួនទៀត ដែលរួមគំនិតក្នុងអំពើឃាតកម្មនេះ ។
ចែករំលែកព័តមាននេះ