ខេត្តស្វាយរៀង ៖ ប្រជាពលរដ្ឋជាមាតាបីតាសិស្សអនុវិទ្យាល័យ និងសាលាបឋមសិក្សាកៀនតាស៊ីវ រាប់រយនាក់បានផ្ទុះការតវ៉ា ដោយចោទប្រកាន់ថា លោកសេង ហៃ អាយុ៦៦ឆ្នាំ អតីតនាយកសាលាបឋមសិក្សាកៀនតាស៊ីវ ឃុបឃិតជាមួយលោកទៀង ឆើត នាយកស្តីទីសាលាបឋមសិក្សាកៀនតាស៊ីវ ដែលជាកូនប្រសាររំលោភយកដីសាលាទំហំ៦០អា នៅប៉ែកខាងមុខធ្វើជាកម្មសិទ្ធិ។
ប្រជាពលរដ្ឋមាតាបីតាសិស្សផ្ទុះការតវ៉ានេះកើតឡើងកាលពីល្ងាចថ្ងៃទី១៨ សីហា នៅមុខអនុវិទ្យាល័យ និងសាលាបឋមសិក្សាកៀនតាស៊ីវ ស្ថិតក្នុងភូមិកៀនតាស៊ីវ ឃុំស្វាយយាស្រុកស្វាយជ្រំ។
បើតាមលោក ម៉ៅ ខុន អាយុ៦០ឆ្នាំ តំណាងឲ្យមាតាបីតាសិស្សបានឲ្យដឹងថា សាលាបឋមសិក្សាកៀនតាស៊ីវ បង្កើតឡើងនៅឆ្នាំ១៩៨០ មានផ្ទៃដីទំហំបណ្តោយ២៥០ម៉ែត្រ ទទឹង១៥០ម៉ែត្រ ខាងជើងទល់ផ្ទះប្រជាពលរដ្ឋប៉ែកខាងត្បូងធ្វើស្រែ សាលាខាងលិចទល់ថ្នល់ (មានដី៦០អា ធ្វើស្រែសាលា) ខាងកើតជិតអូរ ហើយសាងសង់សាលានៅចំកណ្តាលលើផ្ទៃដីប្រមាណ១ហិកតា គឺនៅសល់ដីខាងមុខសាលា៦០អា ជាដីស្រែ ។
តំណាងប្រជាពលរដ្ឋបន្តទៀតថា លោក សេង ហៃ អតីតនាយកសាលាបឋមសិក្សារំលោភយកធ្វើជាកម្មសិទ្ធិ ( ១០អាចាក់ដីលើកធ្វើជាដីលំនៅដ្ឋាន ៥០អាធ្វើជាដីស្រែ) ដោយធ្វើរបងហ៊ុមព័ទ្ធបម្រុងចាក់ដី តែត្រូវប្រជាពលរដ្ឋរារាំង។ ដីប៉ែកខាងត្បូងសាលា លោកស្រីអនុភូមិកៀនតាស៊ីវ រំលោភយកធ្វើជាកម្មសិទ្ធិ។ ប៉ែកខាងកើតសាលាទំហំប្រមាណជាង៧០អា ប្រជាពលរដ្ឋ៥គ្រួសារខ្ចីដាំដំណាំធ្វើឲ្យប៉ះពាល់ និងបាត់ដីរបស់សាលា គ្មានដីសាងសង់អគារឲ្យសិស្សានុសិស្សចូលសិក្សា។
ទាក់ទិនការចោទប្រកាន់នេះដែរ លោកទៀង ឆើត នាយកស្តីទីសាលាបឋមសិក្សាកៀនតាស៊ីវ បានមានប្រសាសន៍ថា ចំពោះប្រជាពលរដ្ឋចោទថា លោករំលោភយកដីសាសានោះមិនពិតទេ ដោយលោកទើបតែមកកាន់ជានាយកស្តីទីបាន៤ឆ្នាំទេ ហើយដីសាលា គឺមានប្លង់ដីចាស់ត្រឹមត្រូវ គឺមានផ្ទៃដីសរុប១០,០៥៥ម៉ែត្រការ៉េប៉ុណ្ណោះ នេះបើតាមប្លង់ដែលមន្ត្រីសុរិយោដីស្រុកស្វាយជ្រំ បានមកចុះវាស់វែងគូប្លង់នៅថ្ងៃទី២១ មីនា ឆ្នាំ២០០០ ដោយលោកសូរ អុន និងចុះហត្ថលេខាដោយលោកមាស សុជាតិ ប្រធានភូមិបាលស្រុកស្វាយជ្រំ នៅថ្ងៃទី២៥ មីនា២០០០។
ចំណែកលោកសេង ហៃ អាយុ៦៦ឆ្នាំ អតីតនាយកសាលាបឋមសិក្សាកៀនតាស៊ីវ (ចូលនិវត្ស)បានឲ្យដឹងថា លោកភ្លេចហើយ មិនដឹងថាដីសាលាទំហំប៉ុណ្ណាទេ ហើយលោកសូមបដិសេធការចោទប្រកាន់របស់ប្រជាពលរដ្ឋចោទថា លោករំលោភយកដីសាលាធ្វើជាកម្មសិទ្ធិ ។ លោកធ្វើជានាយកសាលានៅឆ្នាំ១៩៨៤ កាលណោះសម័យសង្គមនិយមរដ្ឋកម្ពុជា ដីស្រែជុំវិញសាលា គឺធ្វើជាស្រែសាលា កាលណោះគ្រូដឹកនាំសិស្សធ្វើស្រែ គឺគ្រូភ្ជួររាស់ សិស្សស្ទូង និងច្រូតបានផលទុកសម្រាប់ដោះស្រាយភ្ញៀវ និងសម្ភារៈសិក្សា។
លោកអតីតនាយកសាលាបឋមសិក្សាបន្តថា ក្រោយមកឆ្នាំ១៩៩១ សិស្សលែងធ្វើស្រែទៀតហើយ ដូច្នេះដីស្រែខាងមុខសាលា រូបគាត់បានកាន់កាប់ធ្វើស្រែរហូតមកដល់បច្ចុប្បន្នជិត៣០ឆ្នាំមកហើយ ហើយសម្តេចតេជោបានមានប្រសាសន៍ថា ប្រជាពលរដ្ឋគ្រប់រូបចូលកាន់កាប់ដីរយៈពេល៥ឆ្នាំ គឺក្លាយជាកម្មសិទ្ធិស្របច្បាប់ ហើយគ្រួសាររបស់គាត់ធ្វើស្រែជិត៣០ឆ្នាំហើយ ទើបរូបគាត់ធ្វើរបងហ៊ុមព័ទ្ធយកធ្វើជាកម្មសិទ្ធិ។
ចែករំលែកព័តមាននេះ