រាជធានីភ្នំពេញ ៖ សម្រាប់ការប្រឡងសញ្ញាប័ត្រមធ្យមសិក្សាទុតិយភូមិក្នុងរយៈពេលមួយថ្ងៃទី២០ សីហានេះ មានបេក្ខជនអវត្តមានជិត២ពាន់នាក់ ។ ទោះបីជាអវត្តមានបេក្ខជនចំនួនច្រើនយ៉ាងណាក្តីដំណើរការប្រឡងបានប្រព្រឹត្តិទៅដោយរលូន រក្សាភាពស្ងប់ស្ងាត់ល្អ ។ យោងតាមគេហទំព័រហ្វេសប៊ុករបស់ក្រសួងអប់រំយុវជន…
រាជធានីភ្នំពេញ ៖ សម្រាប់ការប្រឡងសញ្ញាប័ត្រមធ្យមសិក្សាទុតិយភូមិក្នុងរយៈពេលមួយថ្ងៃទី២០ សីហានេះ មានបេក្ខជនអវត្តមានជិត២ពាន់នាក់ ។ ទោះបីជាអវត្តមានបេក្ខជនចំនួនច្រើនយ៉ាងណាក្តីដំណើរការប្រឡងបានប្រព្រឹត្តិទៅដោយរលូន រក្សាភាពស្ងប់ស្ងាត់ល្អ ។
យោងតាមគេហទំព័រហ្វេសប៊ុករបស់ក្រសួងអប់រំយុវជន និងកីឡាចេញផ្សាយ ក្រោយបញ្ចប់ការប្រឡងរយៈពេលមួយព្រឹកនាថ្ងៃទី២០ ខែសីហានេះ បានឲ្យដឹងថា ក្នុងដំណើរការនាថ្ងៃទី១នេះ មានបេក្ខជនប្រឡងសរុបចំនួន១១៥២៦៨នាក់ ស្រី៥៨១៥៨នាក់ អវត្តមានសរុបចំនួន១ ៧០៨នាក់ ស្រី៦៩២នាក់ ។
បេក្ខជនប្រព្រឹត្តកំហុសឆ្គងមានចំនួន០៤ករណី ក្នុងនោះករណីដកហូតទូរស័ព្ទដៃទាំង០៣ករណី និងនាំឯកសារចូលចំនួន០១ករណី ដោយឡែកមានបេក្ខជនមានបញ្ហាសុខ ភាពធ្ងន់ធ្ងរចំនួន១១ករណី ប៉ុន្តែអាចដំណើរការប្រឡងបន្តទៀតបាន បន្ទាប់ពីទទួលបានការសង្គ្រោះបឋម ករណីបេក្ខជនជួបគ្រោះថ្នាក់ចរាចរណ៍ចំនួន០១ករណី និងមាន០១ករណីត្រូវបានបញ្ជូនទៅព្យាបាលនៅមន្ទីរពេទ្យ និងពុំអាចត្រឡប់មកបន្តការប្រឡងបាន ។
សម្រាប់ការប្រឡងមួយព្រឹកនេះបុគ្គលិកអប់រំមានកំហុសឆ្គង០១ករណី(ប្រើទូរស័ព្ទ) ត្រូវបានបញ្ឈប់មិនអនុញ្ញាតឲ្យបន្តការងារ ។ យ៉ាងណាក្តីសម្រាប់ដំណើរការសំណេរថ្ងៃទី១ នៃការប្រឡងសញ្ញាប័ត្រមធ្យមសិក្សាទុតិយភូមិបានប្រព្រឹត្តទៅដោយរលូនល្អ មិនមានបាតុភាពមិនប្រក្រតីណាមួយកើតឡើង គួរឲ្យកត់សម្គាល់ឡើយ នៅតាមមណ្ឌលប្រឡងនីមួយៗបានដំណើរការដោយភាពស្ងប់ស្ងាត់ និងរបៀបរៀបរយល្អ ដោយមានការយកចិត្តទុកដាក់ និងទំនួលខុសត្រូវខ្ពស់ពីគណៈកម្មការមេប្រយោគគ្រប់លំដាប់ថ្នាក់ មន្ត្រីអ្នកសង្កេតការណ៍ អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា និងអាជ្ញាធរមានសមត្ថកិច្ចពាក់ព័ន្ធ ។
ជាទូទៅបេក្ខជនបានគោរពបទប្បញ្ញត្តិនៃការប្រឡងបានយ៉ាងល្អ ដោយពុំមាននាំមកជាមួយនៅសំណៅឯកសារ ឬឧបករណ៍ហាមឃាត់ឡើយ និងប្រឹងប្រែងធ្វើកិច្ចការតាមសមត្ថ ភាពរៀងៗខ្លួន ៕
ចែករំលែកព័តមាននេះ