ខេត្តក្រចេះ ៖ មន្ត្រីនៃមន្ទីរអប់រំខេត្តក្រចេះ បានអះអាងថា ស្ថានភាពទឹកជំនន់ទន្លេមេគង្គនៅខេត្តក្រចេះដែលកំពុងតែជន់ឡើងដល់កំរិតប្រកាសអាសន្ន ដែរ តែមិនបានក្លាយជាឧបសគ្គដល់ការប្រឡងសញ្ញាប័ត្រមធ្យមសិក្សា ទុតិយភូមិ ឬបាក់ឌុបសម្រាប់ឆ្នាំសិក្សា២០១៧-២០១៨ នេះនោះទេ។
ប្រធានមន្ទីរអប់រំនិងកីឡា លោកឡាយ បូរា បានឲ្យដឹងនៅថ្ងៃទី២០ សីហា នេះថា អាជ្ញាធរបានរៀបចំមណ្ឌលប្រឡងដើម្បីធ្វើការផ្លាស់ប្តូរ ប្រសិនបើមានមណ្ឌលប្រឡងណាមួយដែលនិងអាចគំរាមកំហែងដោយទឹកជំនន់នោះ។ លោកបន្តថា មណ្ឌលប្រឡង១មណ្ឌលនៅវិទ្យាល័យព្រះមហាក្សត្រីយានីកុសុមៈមានបន្ទប់ប្រឡងចំនួន២០បន្ទប់ ស្ថិតនៅទីទំនាបដែលអាច ប្រឈមនិងការលិចលង់ តែអាជ្ញាធរបានត្រៀមការផ្លាស់ប្តូររួចជាស្រេច។
បើតាមមន្ត្រីនៃមន្ទីរអប់រំខេត្តបានឱ្យដឹងថា សម្រាប់ការប្រឡងសញ្ញាប័ត្រមធម្យមសិក្សា ទុតិយភូមិនៅខេត្តក្រចេះនៅឆ្នាំ២០១៨នេះ ការប្រឡងបានចែកចេញជាមាន៤មណ្ឌល បន្ទប់ប្រឡងមាន៧៩បន្ទប់ មានបេក្ខជនសរុបចំនួន១៩៤០នាក់ ក្នុងនោះស្រី១០៤០នាក់។
លោកប្រធានមន្ទីរអប់រំខេត្តបានលើកឡើងថា កន្លងមកទឹកជំនន់ធ្លាប់បានគំរាមកំហែង ការប្រឡង ដោយសារជន់លិចបន្ទប់ប្រឡង តែមិនគំរាមកំហែងខ្លាំង ដោយកាលនោះអាជ្ញាធរ ក៏បានធ្វើការទប់ទឹកនិងប្រើម៉ាស៊ីនបូម ទើបធ្វើឲ្យការប្រឡងរបស់បេក្ខជនដំណើរការទៅបាន តាមធម្មតា។
បើទោះបីជាឆ្នាំនេះ ស្ថានភាពទឹកជំនន់បានកំពុងជន់ឡើងខ្លាំងរហូតដល់កំរិតប្រកាសអាសន្នយ៉ាងណាក្តី តែការជន់ឡើងនេះមិនបានបង្កឧបសគ្គដល់ការប្រឡងនោះទេ ខណៈ ដែលមណ្ឌលប្រឡងទាំង៤មណ្ឌលនេះ ដែលស្ថិតក្នុងទីប្រជុំជនក្រុងក្រចេះ គឺស្ថិតនៅខ្ពស់ មិនប្រឈមនឹងការលិចលង់នោះឡើយ៕
ចែករំលែកព័តមាននេះ