រាជធានីភ្នំពេញ ៖ ជនសង្ស័យម្នាក់ជិះម៉ូតូមិនចាំម៉ាកធ្វើសកម្មភាពឆក់កាបូបពីស្ត្រីម្នាក់ជិះម៉ូតូអាយខនមិនបានសម្រេចបណ្តាលអោយស្ត្រីរងគ្រោះដួលសន្លប់មួយភាំងរងរបួសស្មាខាងឆ្វេង ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៩និង៣០នាទីយប់ ថ្ងៃទី១៩ ខែសីហា ឆ្នាំ២០១៨ តាមបណ្តោយផ្លូវជាតិលេខ៥ នៅចំណុចក្បែរនឹងបារចតុមុខ ស្ថិតនៅក្នុងសង្កាត់ស្រះចក ខណ្ឌដូនពេញ ។ ជនរងគ្រោះមានឈ្មោះ ម៉ៅ សុផុន ភេទស្រី អាយុ៦៥ឆ្នាំ ស្នាក់នៅផ្លូវជាតិលេខ៥ សង្កាត់ឬស្សីកែវ ខណ្ឌឬស្សីកែវ ។
សាក្សីដែលឃើញហេតុការណបានអោយដឹងថា មុនពេលកើតហេតុគេបានឃើញស្ត្រីរង គ្រោះជិះម៉ូតូមួយគ្រឿងម៉ាកអាយខន ពណ៌ទឹកក្រូច បើកបរតាមបណ្តោយផ្លូវជាតិលេខ៥ក្នុងទិសដៅពីត្បូងទៅជើងគោលបំណងជិះទៅផ្ទះនៅឯម្តុំភូមិសាមគ្គី ផ្លូវជាតិលេខ៥ ប៉ុន្តែគាត់មានស្ពាយកាបូបជាប់នៅនឹងខ្លួន ខណៈជិះមកដល់ចំណុចកើតហេតុស្រាប់តែលេចមុខជនសង្ស័យម្នាក់មិនស្គាល់អត្តសញ្ញាណជិះម៉ូតូមួយគ្រឿងមិនចាំម៉ាកបើកបរតាមបណ្តោយផ្លូវជាតិលេខ៥ទិសដៅស្របទិសគ្នារួចហើយជិះទៅជិតក៏ស្រាប់តែធ្វើសកម្មភាពឆក់កាបូប ប៉ុន្តែមិនបានសម្រេចធ្វើអោយស្ត្រីរងគ្រោះដួលសន្លប់អស់មួយភាំងបានប្រជាពលរដ្ឋនៅម្តុំនោះគាត់ជួយដើរគន្លងទើបដឹងខ្លួន ចំណែកជនសង្ស័យបានបើកម៉ូតូជិះរត់គេចខ្លួនបាត់ស្រមោល ។
ក្រោយកើតហេតុមានសមត្ថកិច្ចមូលដ្ឋានប៉ុស្តិ៍ស្រះចកបានមកដល់ហើយសួរអុំស្រីនោះថា នៅក្នុងកាបូបនោះមានអីខ្លះ ប៉ុន្តែដោយសារតែគាត់ដួលសន្លប់ទើបវង្វេងវង្វាន់អត់ចាំអីនោះទេបានកូនប្រុសមកដល់ដឹកយកទៅព្យាបាលនៅមន្ទីរពេទ្យបង្អែកដូនពេញ ដោយមិនបានទៅដាក់ពាក្យបណ្តឹងនោះទេ ៕
ចែករំលែកព័តមាននេះ