ញឹម សួនសោភាទេពី លេចមុខប្រឡងសិល្បៈបុរាណ

ថ្ងៃទី ២១ ខែ សីហា ឆ្នាំ ២០១៨
ម៉ោង ០៨:០០
ខាត់ សាមឿន

រាជធានីភ្នំពេញ៖ធ្លាប់តែឃើញចូលរួមប្រលងចម្រៀងសម័យក្នុងកម្មវិធីដ៏ធំមួយ មិននឹកស្មានដល់ថាកញ្ញាញឹម សួនសោភាទេពី គឺជាសិស្សហាត់រៀនសិល្បៈបុរាណ នៅសាលាវិចិត្រសិល្បៈ ។ ប្រលងចម្រៀងសម័យ តែហាត់រៀនសិល្បៈបុរាណ តើទៅថ្ងៃអនាគតទេពី ប្រាថ្នាចង់ចាប់អាជីពមួយណា ?

កញ្ញាញឹម សួនសោភាទេពី កាន់តែលេចធ្លោឡើងក្នុងអាជីពសិល្បៈ ។ សោភា ទេពី មិនចោលការសិក្សាផ្នែកសិល្បៈទេ ទោះបីជានាងរវល់នឹងការងារសិល្បៈក្តី ។

ថ្មីៗកន្លងមកកញ្ញាញឹម សួនសោភាទេពី បានចូលរូមប្រឡងយកសញ្ញាបត្រមធ្យមសិក្សាបឋមភូមិ ផ្នែកសិល្បៈ នៅសាលាមធ្យមវិចិត្រសិល្បៈ។ ទេពីចូលរួមប្រឡងលើវិញ្ញាសាល្ខោនយីកេរឿង«មាយើង»ដើរតួជានាងកញ្ជើរធ្លុះ ។ ទស្សនិកជនមានការចាប់អារម្មណ៍ដែលសោភាទេពី មានទេពកោសល្យសម្តែងបញ្ចូលអារម្មណ៍តាមសាច់រឿងជាស្ត្រីកញ្ជើរធ្លុះបានល្អធ្វើឲ្យស្លុងអារម្មណ៍តាមដាន ។

ញឹម សួនសោភាទេពី និយាយថាចំពោះការសម្តែងរឿង«មាយើង»នាងមានការបារម្ភបំផុតគ្រាដែលនាងមមាញឹកសិល្បៈខាងក្រៅ ហើយឆ្លៀតមករៀនហាត់នៅសាលារដ្ឋទាំងប្រថុចញុ៉ច និងសល់ពេលមិនច្រើនដល់ថ្ងៃប្រឡង ។ ដូចនេះហើយនាងតែងតែព្យាយាមមើលរបៀបសម្តែងរៀមច្បង ព្រមទាំងខំត្រងត្រប់តាមការបង្ហាញរបស់លោកគ្រូអ្នកគ្រូ ។

ញឹម សួនសោភាទេពី ទើបតែប្តូរទៅរៀនជំនាញយីកេជាង១ឆ្នាំប៉ុណ្ណោះ ដោយពីមុននៅសាលាវិចិត្រសិល្បៈនាងរៀនផ្នែករបាំបុរាណ។ ដោយរៀនរបាំបុរាណលំបាកពេក នាងក៏ប្តូរជំនាញ ។ «មូលហេតុដែលនាងខ្ញុំចាប់យកជំនាញយីកេ ហើយរៀននៅសាលាមួយនេះមកពីយល់ថាខ្លួននឹងចំណេញបាន៣ចំណុច សំខាន់ៗដូចជាចេះពីរបៀបសម្តែង ការលេងទឹកមុខនៃសិល្បៈ ។

ទី២នាងខ្ញុំអាចចេះច្រៀងតាមរបៀបបទបុរាណយើងដែលកម្រនឹងមានឱកាស ហើយជាតារាបើចេះច្រៀងបុរាណ ចាប់យកសម័យរឹតតែល្អ និងចំនុចទី៣នាងខ្ញុំអាចចេះរាំទាំងរបាំបែបបុរាណ និងរាំបែបយីកេ ។ ទាំងអស់នេះហើយដែលយល់ថាជាសម្បត្តិដ៏ពិសេសមួយសម្រាប់នាងខ្ញុំចំពោះការសិក្សានៅទីនេះ ។

ខ្ញុំសូមស្នើដល់អ្នកស្រឡាញ់សិល្បៈ មិនថាច្រៀង មិនថាសម្តែង គួរកុំមើលរំលងសាលាវិចិត្រសិល្បៈអាចមករៀនយកចំណេះសិល្បៈដែលមានលោកគ្រូអ្នកគ្រូមានជំនាញច្បាស់លាស់ចាំស្រាយបំភ្លឺ វែកផ្លូវឲ្យយើងយល់ពីរបៀបសម្តែងតាមចរិតតួអង្គធ្វើឲ្យយើងកាន់តែមានឱកាសច្រើនពេលចាប់យកអាជីពសិល្បៈពេញលេញទៅថ្ងៃក្រោយ»។

កញ្ញាញឹម សួនសោភាទេពី ជាបេក្ខនារីចូលរួមប្រលងក្នុងកម្មវិធីខេមបូឌា អាយដល រដូវកាលទី៣ តែមិនបានជោគជ័យទេ ។ តាមរយៈកម្មវិធីនោះមានទស្សនិកជនច្រើនបានស្គាល់នាង ។

ទៅថ្ងៃអនាគតញឹម សួនសោភាទេពី ចង់ប្រឡងចូលបម្រើការនៅសាលាវិចិត្រសិល្បៈយកក្របខណ្ឌរដ្ឋ ពិសេសបានធ្វើជាគ្រូបណ្តុះបណ្តាលអ្នកជំនាន់ក្រោយឲ្យរីកដុះដាលផ្នែកសិល្បៈបុរាណ ៕