ទីក្រុងវ៉ាស៊ីនតោន ៖ ប្រភព៣រូបបានឲ្យដឹងថា រដ្ឋាភិបាលអាមេរិកកំពុងតែចង់បង្ខំក្រុមហ៊ុន Facebook Inc. ឲ្យអនុញ្ញាតដល់ខាងនីតិប្រតិបត្តិ ដើម្បីលួចស្តាប់ការសន្ទនានៅលើកម្មវិធីMessenger ។ ប្រភពនេះបានឲ្យដឹងទៀតថា…
ទីក្រុងវ៉ាស៊ីនតោន ៖ ប្រភព៣រូបបានឲ្យដឹងថា រដ្ឋាភិបាលអាមេរិកកំពុងតែចង់បង្ខំក្រុមហ៊ុន Facebook Inc. ឲ្យអនុញ្ញាតដល់ខាងនីតិប្រតិបត្តិ ដើម្បីលួចស្តាប់ការសន្ទនានៅលើកម្មវិធីMessenger ។
ប្រភពនេះបានឲ្យដឹងទៀតថា រដ្ឋាភិបាលចោទប្រកាន់ដល់Facebookថាបានប្រមាថតុលាការ ព្រោះតែបដិសេធនឹងសំណើនេះ ។ បញ្ហានេះកើតមានឡើងនៅក្រុងFresno នៃរដ្ឋកាលីហ្វ័រនីញ៉ា ក្នុងផ្នែកមួយនៃការស៊ើបអង្កេតទៅលើក្រុម MS-13 ។
ប្រធានាធិបតីអាមេរិកលោក ដូណាល់ ត្រាំ (Donald Trump) តែងតែប្រើក្រុមឧក្រឹដ្ឋជននេះជាអត្តសញ្ញាណបង្ហាញពីភាពទន់ខ្សោយនៃគោលនយោបាយអន្តោប្រវេសន៍របស់សហរដ្ឋអាមេរិក និងជាមូលហេតុក្នុងការវាយប្រហារលើច្បាប់ដែលហាមឃាត់ប៉ូលិសមិនឲ្យឃុំឃាំងមនុស្សដើម្បីអនុម័តច្បាប់អន្តោប្រវេសន៍ ។
អ្នកជំនាញផ្លូវច្បាប់បាននិយាយថា ប្រសិនបើរដ្ឋាភិបាលអាមេរិកឈ្នះក្តីខាងលើនេះ ពួកគេអាចប្រើអំណះអំណាងដដែលក្នុងការបង្ខំឲ្យក្រុមហ៊ុនដទៃកែច្នៃសេវាកម្មផ្សេងៗ ដូចជា Signal និងWhatsAppជាដើម ហើយការធ្វើដូច្នេះ នឹងប៉ះពាល់ដល់ក្រុមហ៊ុនដែលចាត់ទុកខ្លួនជាអ្នកការពារឯកជនភាពរបស់អ្នកប្រើប្រាស់ ។
ករណីនេះស្រដៀងទៅនឹងករណីនៅឆ្នាំ ២០១៦ រវាងFBI និងApple Inc. ដែលទាក់ទិននឹងទូរស័ព្ទ iPhone មួយគ្រឿងរបស់អ្នកគាំទ្រក្រុមភេរវកម្ម Islamic State នៅទីក្រុង San Bernardino រដ្ឋកាលីហ្វ័រនីញ៉ា ។
ក្នុងករណីនេះ Apple អះអាងថា រដ្ឋាភិបាលមិនអាចបង្ខំឲ្យពួកគេបង្កើតកម្មវិធីមួយដែលអាចចូលទៅប្រើទូរស័ព្ទដោយមិនល្មើសនឹងសិទ្ធិក្នុងការបញ្ចេញមតិរបស់ក្រុមហ៊ុនទេ ។
យ៉ាងណាក្តី Facebook កំពុងតែអះអាងថាការសន្ទនាជាសំឡេងលើកម្មវិធី Messenger មានលក្ខណៈសម្ងាត់ ដែលមានន័យថា មានតែភាគីទាំងសងខាងប៉ុណ្ណោះដែលអាចស្តាប់លើការសន្ទនារបស់ពួកគេបាន ៕
ចែករំលែកព័តមាននេះ