ខេត្តកំពង់ធំ ៖ សេចក្តីរាយការណ៍បឋមឱ្យដឹងថា កាលពីវេលាម៉ោង២រំលងអធ្រាត្រថ្ងៃទី១៨ សីហា ចោរបានលួចក្របីចំនួន៣ក្បាលនៅភូមិគោកងួន ឃុំត្រពាំងឫស្សី ស្រុកកំពង់ស្វាយ ដែលមានម្ចាស់ឈ្មោះ ហ៊ន សុផល ភេទប្រុស អាយុ៤២ឆ្នាំ ប្រពន្ធឈ្មោះ ឆេង សុខន អាយុ៤២ឆ្នាំ គឺលួចដឹកចេញពីផ្ទះដោយសុវត្ថិភាពទៅ ។
ក្របីដែលបាត់ចំនួន៣ក្បាល មានមេធំ១ក្បាល មេក្រមំុ១ និងឈ្មោលស្ទាវ១ក្បាល ។ ក្រោយពីទទួលបានព័ត៌មាននោះ នគរបាលស្រុកបានចេញអន្តរាគមន៍ជាបន្ទាន់ ដោយចុះធ្វើការស្រាវជ្រាវ ដោយនាំគ្នាតាមដានជើងក្របី ដែលចោរដឹកចេញពីផ្ទះទៅ ។
តាមរយៈដានជើងក្របីនារដូវវស្សា ត្រូវបានតាមរកឃើញគេដឹកចូលទៅក្នុងផ្ទះឈ្មោះ នុត សុធា ភេទប្រុស អាយុ៤៣ឆ្នាំ និងប្រពន្ធឈ្មោះ មឿន ផល្លី អាយុ៣៨ឆ្នាំ នៅភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ។
ការតាមដានជើងក្របីជាប់រហូតដឹងថា ចូលផ្ទះហ្នឹងហើយ ក៏ចូលតាមទៅពិនិត្យក្នុងផ្ទះទើបដឹងថា ទីនោះគឺជាកន្លែងធ្វើអាជីវកម្ម(សត្តឃាតគោក្របី) ឃើញពិតដូច្នោះ សមត្ថកិច្ចបានសុំដីកាអនុញ្ញាតពីព្រះរាជអាជ្ញាអមសាលាដំបូងខេត្ត ដើម្បីចូលធ្វើការឆែកឆេរ ហើយបានរកឃើញវត្ថុតាងស្បែកក្របីចំនួន៣ សាច់ក្របី ដាក់ក្នុងបាវជាច្រើន, គ្រឿងក្នុងដាក់ក្នុងធុងក្លាស្សេ និងខ្សែចងក្របី គឺពិតជាវត្ថុតាងដែលម្ចាស់ក្របីស្គាល់ថា ជាសត្វពាហនៈរបស់ខ្លួនពិតប្រាកដមែន ជាពិសេសគឺស្បែកនិងខ្សែចំណងក្របី ។
ដោយសារតែបែកការណ៍ ម្ចាស់ផ្ទះជាចោរលួចក្របីមកកាប់សាច់ក្រោមផ្ទះ បានរត់គេចខ្លួនទាំងប្តីនិងប្រពន្ធបាត់ស្រមោល ។ ទោះជាយ៉ាងនេះក្តី សមត្ថកិច្ចជំនាញបាន និងកំពុងអនុវត្តន៍នីតិវិធីសុំដីកាតាមចាប់ខ្លួនប្តីប្រពន្ធទាំង២នាក់នោះ ឱ្យមកទទួលទោសតាមផ្លូវច្បាប់ ៕
ចែករំលែកព័តមាននេះ