រាជធានីភ្នំពេញ ៖ វាមិនខុសអ្វីទៅនឹងបណ្តាឆ្នាំមុនៗនោះទេ ខណៈពេលមុនមួយថ្ងៃ នៃការប្រឡងបាក់ឌុបចូលមកដល់ មានសិស្សានុសិស្សប្រុស ស្រីរាប់រយនាក់ បាននាំគ្នាទិញធូប និងផ្កាឈូកចូលទៅអុជធូបមុខព្រះអង្គដងកើ ដែលមានទីតាំងមុខព្រះបរមរាជវាំង តាមបណ្តោយវិថីព្រះស៊ីសុវត្ថិ ស្ថិតក្នុងសង្កាត់ជ័យជម្នះ ខណ្ឌដូនពេញ រាជធានីភ្នំពេញ។
យុវជន ប៉ាច វុទ្ធ សិស្សវិទ្យាល័យបាក់ទូក ដែលនៅនឹងដៃមានកាន់ផ្កាឈូក និងធូប ហើយឈរតម្រង់ជួរដើម្បីចូលទៅ អុជធូបក្នុងទីសក្ការៈព្រះអង្គដងកើបានឲ្យដឹងថា នៅថ្ងៃស្អែកត្រូវនឹងថ្ងៃទី២០ សីហា ប្អូននឹងត្រូវទៅប្រឡង បាក់ឌុប នៅវិទ្យាល័យព្រះស៊ីសុត្ថិ ដោយមានការភ័យខ្លាចប្រឡងធ្លាក់ និងបញ្ហាណាមួយ នៅពេលប្រឡងនោះ ប្អូននិងមិត្តភក្តិក៏នាំគ្នាមកអុជធូបនៅព្រះអង្គដងកើ ដើម្បីឲ្យព្រះអង្គជួយពឹងរឹងស្មារតី និងជួយឲ្យរូបគេប្រឡងជាប់ដូចក្តីប្រាថ្នា។ និយាយបែបនេះមិនមែនមានន័យថា ប្អូនមិនបានខិតខំរៀនសូត្រនោះទេ ហើយរូបប្អូនក៏បានរៀនកួរបន្ថែមទៀតផង ហើយពេលនេះអាចសង្ឃឹមដល់ទៅ៧០% ថានឹងជាប់បាក់ឌុប ។
ការមកបន់ស្រន់នេះគឺធ្វើឡើងតាមជំនឿសាសនា និងមានការនាំពីឪពុកម្តាយផងដែរ។ កញ្ញា វ៉ាន់ សូនីតា សិស្សវិទ្យាល័យទួលទំពូង ដែលត្រូវប្រឡងបាក់ឌុបដែរនោះនិយាយថា នាងបានជាវទានធូប និងផ្កាឈូកមកអុជថ្វាយដល់ព្រះអង្គដងកើ មុនពេលប្រឡងបាក់នៅថ្ងៃច័ន្ទនេះ ឲ្យព្រះអង្គថែរក្សាដល់ រូបនាង នៅពេលប្រឡងកុំឲ្យជួបហេតុចង្រៃណាមួយកើតឡើងចំពោះនាង។
ហើយការប្រឡងនេះដែរ នាងរៀបចំរួចជាស្រេចដូចជាការមើលមេរៀនឡើងវិញរួមទាំងទៅរៀនកួរបន្ថែមទៀងផង ការមកបុណ្យនេះគឺធ្វើឡើងទៅតាមជំនឿសាសនាតែប៉ុណ្ណោះ បើយើងមិនខំរៀនផង តើប្រឡងជាប់ម្តេចនឹងកើត។ លោក អ៊ុំ ហេង អាចារ្យនៅថែរក្សាទីសក្ការៈព្រះអង្គដងកើបានលើកឡើងថា សិស្សានុសិស្សរាប់រយនាក់បានមកអុជធូប និងថ្វាយផ្កាឈូកនៅព្រះអង្គដងកើនេះ វាមិនមានអ្វីប្លែកនោះទេ ហើយវាក៏មិនខុសពីបណ្តាឆ្នាំមុនៗដែរ ។
មានអ្នកខ្លះទាំងនាំគ្នាសុំទឹកមន្ត ពីកន្លែងព្រះអង្គយកទៅលុបមុខ និងអ្នកខ្លះមិនទាន់ដឹងអ្វីផងទិញសត្វចាបប្រលែងផងដែរ នេះវាគឺជាជំនឿតាមការយល់ឃើញរបស់មនុស្សម្នាក់ៗ។ ជារៀងឆ្នាំមុនមិនថាពេលប្រឡងបាក់ឌុប ឬប្រឡងឌីប្លូមនោះទេ ប្អូនៗ និងក្មួយសិស្សានុសិស្សរាប់រយនាក់បានមកអុជធូបថ្វាយផ្កា តាំងពីម៉ោង៦ព្រឹករហូតដល់យប់តែម្តង៕
https://www.youtube.com/watch?v=cpXxzS1xH40
ចែករំលែកព័តមាននេះ