ឥណ្ឌា ៖ តាមប្រភពព័ត៌មាន Metro បានឲ្យដឹងថា គ្រោះទឹកជំនន់នៅភាគខាងត្បូងប្រទេសឥណ្ឌា បានធ្វើឲ្យមនុស្សយ៉ាងតិច៣២៤នាក់ស្លាប់ និង២០ម៉ឺននាក់ត្រូវជន្លៀសទៅកាន់ជំរុំសុវត្ថិភាព។
តាមប្រសាសន៍របស់លោករដ្ឋមន្ត្រី Pinarayi Vijayan ទឹកជំនន់នេះ ត្រូវបានគេចាត់ទុកថាអាក្រក់ជាងគេក្នុងរយៈពេល១០០ឆ្នាំ។
នាយករដ្ឋមន្ត្រីឥណ្ឌា លោក Narendra Modi បានធ្វើដំណើរទៅកាន់តំបន់រងគ្រោះកាលពីល្ងាចថ្ងៃទី១៧ កន្លងមកនេះ ដើម្បីពិនិត្យមើលការជួយសង្គ្រោះប្រជាជនដោយប្រើប្រាស់ឧទ្ធម្ភាគចក្រនិងទូក។
ហើយទឹកជំនន់ដែលបានកើតឡើងតាំងពី៩ថ្ងៃមុនកន្លងមកនេះ ធ្វើឲ្យមានការបាក់ដី និងលិចអស់ផ្ទះជាច្រើនខ្នង។ មនុស្សជាង២២៣០០០នាក់ ត្រូវបានបង្ខំចិត្តចាកចោលផ្ទះសម្បែងទៅកាន់ជំរុំសុវត្ថិភាព។
អ្នកដែលបានឃើញផ្ទាល់ភ្នែកពេលជិះឧទ្ធម្ភាគចក្រមកចុះមកដីនៅក្រុង Chengannur បានប្រាប់ថា ឃើញប្រជាជនឈរលើដំបូងផ្ទះបកដៃយ៉ាងកំសត់មកកាន់ក្រុមសង្គ្រោះ។ ផ្ទះនីមួយៗមើលទៅហាក់បីដូចជាកោះ ដែលផុសចេញត្រឹមតែដំបូល។ ឧទ្ធម្ភាគចក្របានទម្លាក់អាហារ និងទឹកស្អាតដាក់ក្នុងល្អី ដើម្បីឲ្យជនរងគ្រោះ និងជួយយកមនុស្សយ៉ាងតិច៤នាក់ទៅកាន់ទីតាំងមានសុវត្ថិភាព។
រដ្ឋ Kerala ដែលទទួលរងគ្រោះទឹកជំនន់នេះ គឺជាតំបន់ទាក់ទាញភ្ញៀវទេសចរណ៍ទាំងជាតិ និងអន្តរជាតិ។ លើសពីនេះទៀត វាក៏ជាតំបន់សំខាន់ក្នុងការផលិតកៅស៊ូ តែ កាហ្វេ និង គ្រឿងទេសផងដែរ។ ដោយសារតែលិចអស់ជាច្រើនកន្លែង អាកាសយានដ្ឋាននៅក្រុង Kochi ត្រូវផ្អាកដំណើរការរហូតដល់ថ្ងៃទី២៦ ខែសីហា ខណៈដែលផ្លូវថ្នល់ត្រូវបានបិទចរាចរណ៍៕
ចែករំលែកព័តមាននេះ